Brahma Purana · Chapter 207

cakre karma mahac chaurir bibhrad yo mānuṣīṃ tanum
jigāya śakraṃ śarvaṃ ca sarvadevāṃś ca līlayā //

yac cānyad akarot karma divyaceṣṭāvighātakṛt
kathyatāṃ tan muniśreṣṭha paraṃ kautūhalaṃ hi naḥ //

gadato me muniśreṣṭhāḥ śrūyatām idam ādarāt
narāvatāre kṛṣṇena dagdhā vārāṇasī yathā //

pauṇḍrako vāsudevaś ca vāsudevo 'bhavad bhuvi
avatīrṇas tvam ity ukto janair ajñānamohitaiḥ //

sa mene vāsudevo 'ham avatīrṇo mahītale
naṣṭasmṛtis tataḥ sarvaṃ viṣṇucihnam acīkarat
dūtaṃ ca preṣayām āsa sa kṛṣṇāya dvijottamāḥ //

tyaktvā cakrādikaṃ cihnaṃ madīyaṃ nāma mātmanaḥ
vāsudevātmakaṃ mūḍha muktvā sarvam aśeṣataḥ //

ātmano jīvitārthaṃ ca tathā me praṇatiṃ vraja //

ity uktaḥ sa prahasyaiva dūtaṃ prāha janārdanaḥ //

nijacihnam ahaṃ cakraṃ samutsrakṣye tvayīti vai
vācyaś ca pauṇḍrako gatvā tvayā dūta vaco mama //

jñātas tvadvākyasadbhāvo yat kāryaṃ tad vidhīyatām
gṛhītacihna evāham āgamiṣyāmi te puram //

utsrakṣyāmi ca te cakraṃ nijacihnam asaṃśayam
ājñāpūrvaṃ ca yad idam āgaccheti tvayoditam //

saṃpādayiṣye śvas tubhyaṃ tad apy eṣo 'vilambitam
śaraṇaṃ te samabhyetya kartāsmi nṛpate tathā
yathā tvatto bhayaṃ bhūyo naiva kiṃcid bhaviṣyati //

ity ukte 'pagate dūte saṃsmṛtyābhyāgataṃ hariḥ
garutmantaṃ samāruhya tvaritaṃ tatpuraṃ yayau //

tasyāpi keśavodyogaṃ śrutvā kāśipatis tadā
sarvasainyaparīvāra pārṣṇigrāham upāyayau //

tato balena mahatā kāśirājabalena ca
pauṇḍrako vāsudevo 'sau keśavābhimukhaṃ yayau //

taṃ dadarśa harir dūrād udārasyandane sthitam
cakraśaṅkhagadāpāṇiṃ pāṇinā vidhṛtāmbujam //

sragdharaṃ dhṛtaśārṅgaṃ ca suparṇaracanādhvajam
vakṣasthalakṛtaṃ cāsya śrīvatsaṃ dadṛśe hariḥ //

kirīṭakuṇḍaladharaṃ pītavāsaḥsamanvitam
dṛṣṭvā taṃ bhāvagambhīraṃ jahāsa madhusūdanaḥ //

yuyudhe ca balenāsya hastyaśvabalinā dvijāḥ
nistriṃśarṣṭigadāśūla śaktikārmukaśālinā //

kṣaṇena śārṅganirmuktaiḥ śarair agnividāraṇaiḥ
gadācakrātipātaiś ca sūdayām āsa tadbalam //

kāśirājabalaṃ caiva kṣayaṃ nītvā janārdanaḥ
uvāca pauṇḍrakaṃ mūḍham ātmacihnopalakṣaṇam //

pauṇḍrakoktaṃ tvayā yat tad dūtavaktreṇa māṃ prati
samutsṛjeti cihnāni tat te saṃpādayāmy aham //

cakram etat samutsṛṣṭaṃ gadeyaṃ te visarjitā
garutmān eṣa nirdiṣṭaḥ samārohatu te dhvajam //

ity uccārya vimuktena cakreṇāsau vidāritaḥ
pothito gadayā bhagno garutmāṃś ca garutmatā //

tato hāhākṛte loke kāśīnām adhipas tadā
yuyudhe vāsudevena mitrasyāpacitau sthitaḥ //

tataḥ śārṅgavinirmuktaiś chittvā tasya śaraiḥ śiraḥ
kāśipuryāṃ sa cikṣepa kurvaṃl lokasya vismayam //

hatvā tu pauṇḍrakaṃ śauriḥ kāśirājaṃ ca sānugam
reme dvāravatīṃ prāpto 'maraḥ svargagato yathā //

tacchiraḥ patitaṃ tatra dṛṣṭvā kāśipateḥ pure
janaḥ kim etad ity āha kenety atyantavismitaḥ //

jñātvā taṃ vāsudevena hataṃ tasya sutas tataḥ
purohitena sahitas toṣayām āsa śaṃkaram //

avimukte mahākṣetre toṣitas tena śaṃkaraḥ
varaṃ vṛṇīṣveti tadā taṃ provāca nṛpātmajam //

sa vavre bhagavan kṛtyā pitur hantur vadhāya me
samuttiṣṭhatu kṛṣṇasya tvatprasādān maheśvara //

evaṃ bhaviṣyatīty ukte dakṣiṇāgner anantaram
mahākṛtyā samuttasthau tasyaivāgniniveśanāt //

tato jvālākarālāsyā jvalatkeśakalāpikā
kṛṣṇa kṛṣṇeti kupitā kṛtvā dvāravatīṃ yayau //

tām avekṣya janaḥ sarvo raudrāṃ vikṛtalocanām
yayau śaraṇyaṃ jagatāṃ śaraṇaṃ madhusūdanam //

kāśirājasuteneyam ārādhya vṛṣabhadhvajam
utpāditā mahākṛtyā vadhāya tava cakriṇaḥ
jahi kṛtyām imām ugrāṃ vahnijvālājaṭākulām //

cakram utsṛṣṭam akṣeṣu krīḍāsaktena līlayā
tad agnimālājaṭilaṃ jvālodgārātibhīṣaṇam //

kṛtyām anujagāmāśu viṣṇucakraṃ sudarśanam
tataḥ sā cakravidhvastā kṛtyā māheśvarī tadā //

jagāma veginī vegāt tad apy anujagāma tām
kṛtyā vārāṇasīm eva praviveśa tvarānvitā //

viṣṇucakrapratihata prabhāvā munisattamāḥ
tataḥ kāśibalaṃ bhūri pramathānāṃ tathā balam //

samastaśastrāstrayutaṃ cakrasyābhimukhaṃ yayau
śastrāstramokṣabahulaṃ dagdhvā tad balam ojasā //

kṛtvākṣemām aśeṣāṃ tāṃ purīṃ vārāṇasīṃ yayau
prabhūtabhṛtyapaurāṃ tāṃ sāśvamātaṅgamānavām //

aśeṣadurgakoṣṭhāṃ tāṃ durnirīkṣyāṃ surair api
jvālāparivṛtāśeṣa gṛhaprākāratoraṇām //

dadāha tāṃ purīṃ cakraṃ sakalām eva satvaram
akṣīṇāmarṣam atyalpa sādhyasādhananispṛham
tac cakraṃ prasphuraddīpti viṣṇor abhyāyayau karam //