Brahma Purana · Chapter 206

bāṇo 'pi praṇipatyāgre tataś cāha trilocanam //

deva bāhusahasreṇa nirviṇṇo 'haṃ vināhavam
kaccin mamaiṣāṃ bāhūnāṃ sāphalyakaraṇo raṇaḥ
bhaviṣyati vinā yuddhaṃ bhārāya mama kiṃ bhujaiḥ //

mayūradhvajabhaṅgas te yadā bāṇa bhaviṣyati
piśitāśijanānandaṃ prāpsyasi tvaṃ tadā raṇam //

tataḥ praṇamya muditaḥ śaṃbhum abhyāgato gṛhāt
bhagnaṃ dhvajam athālokya hṛṣṭo harṣaṃ paraṃ yayau //

etasminn eva kāle tu yogavidyābalena tam
aniruddham athāninye citralekhā varā sakhī //

kanyāntaḥpuramadhye taṃ ramamāṇaṃ sahoṣayā
vijñāya rakṣiṇo gatvā śaśaṃsur daityabhūpateḥ //

vyādiṣṭaṃ kiṃkarāṇāṃ tu sainyaṃ tena mahātmanā
jaghāna parighaṃ lauham ādāya paravīrahā //

hateṣu teṣu bāṇo 'pi rathasthas tadvadhodyataḥ
yudhyamāno yathāśakti yadā vīreṇa nirjitaḥ //

māyayā yuyudhe tena sa tadā mantracoditaḥ
tataś ca pannagāstreṇa babandha yadunandanam //

dvāravatyāṃ kva yāto 'sāv aniruddheti jalpatām
yadūnām ācacakṣe taṃ baddhaṃ bāṇena nāradaḥ //

taṃ śoṇitapure śrutvā nītaṃ vidyāvidagdhayā
yoṣitā pratyayaṃ jagmur yādavā nāma vairiti //

tato garuḍam āruhya smṛtamātrāgataṃ hariḥ
balapradyumnasahito bāṇasya prayayau puram //

purīpraveśe pramathair yuddham āsīn mahābalaiḥ
yayau bāṇapurābhyāśaṃ nītvā tān saṃkṣayaṃ hariḥ //

tatas tripādas triśirā jvaro māheśvaro mahān
bāṇarakṣārtham atyarthaṃ yuyudhe śārṅgadhanvanā //

tadbhasmasparśasaṃbhūta tāpaṃ kṛṣṇāṅgasaṃgamāt
avāpa baladevo 'pi samaṃ saṃmīlitekṣaṇaḥ //

tataḥ saṃyudhyamānas tu saha devena śārṅgiṇā
vaiṣṇavena jvareṇāśu kṛṣṇadehān nirākṛtaḥ //

nārāyaṇabhujāghāta paripīḍanavihvalam
taṃ vīkṣya kṣamyatām asyety āha devaḥ pitāmahaḥ //

tataś ca kṣāntam eveti procya taṃ vaiṣṇavaṃ jvaram
ātmany eva layaṃ ninye bhagavān madhusūdanaḥ //

mama tvayā samaṃ yuddhaṃ ye smariṣyanti mānavāḥ
vijvarās te bhaviṣyantīty uktvā cainaṃ yayau hariḥ //

tato 'gnīn bhagavān pañca jitvā nītvā kṣayaṃ tathā
dānavānāṃ balaṃ viṣṇuś cūrṇayām āsa līlayā //

tataḥ samastasainyena daiteyānāṃ baleḥ sutaḥ
yuyudhe śaṃkaraś caiva kārttikeyaś ca śauriṇā //

hariśaṃkarayor yuddham atīvāsīt sudāruṇam
cukṣubhuḥ sakalā lokāḥ śastrāstrair bahudhārditāḥ //

pralayo 'yam aśeṣasya jagato nūnam āgataḥ
menire tridaśā yatra vartamāne mahāhave //

jṛmbhaṇāstreṇa govindo jṛmbhayām āsa śaṃkaram
tataḥ praṇeśur daiteyāḥ pramathāś ca samantataḥ //

jṛmbhābhibhūtaś ca haro rathopastham upāviśat
na śaśāka tadā yoddhuṃ kṛṣṇenākliṣṭakarmaṇā //

garuḍakṣatabāhuś ca pradyumnāstreṇa pīḍitaḥ
kṛṣṇahuṃkāranirdhūta śaktiś cāpayayau guhaḥ //

jṛmbhite śaṃkare naṣṭe daityasainye guhe jite
nīte pramathasainye ca saṃkṣayaṃ śārṅgadhanvanā //

nandīśasaṃgṛhītāśvam adhirūḍho mahāratham
bāṇas tatrāyayau yoddhuṃ kṛṣṇakārṣṇibalaiḥ saha //

balabhadro mahāvīryo bāṇasainyam anekadhā
vivyādha bāṇaiḥ pradyumno dharmataś cāpalāyataḥ //

ākṛṣya lāṅgalāgreṇa muśalena ca pothitam
balaṃ balena dadṛśe bāṇo bāṇaiś ca cakriṇaḥ //

tataḥ kṛṣṇasya bāṇena yuddham āsīt samāsataḥ
parasparaṃ tu saṃdīptān kāyatrāṇavibhedinaḥ //

kṛṣṇaś ciccheda bāṇāṃs tān bāṇena prahitāñ śaraiḥ
bibheda keśavaṃ bāṇo bāṇaṃ vivyādha cakradhṛk //

mumucāte tathāstrāṇi bāṇakṛṣṇau jigīṣayā
parasparakṣatiparau parighāṃś ca tato dvijāḥ //

chidyamāneṣv aśeṣeṣu śastreṣv astre ca sīdati
prācuryeṇa harir bāṇaṃ hantuṃ cakre tato manaḥ //

tato 'rkaśatasaṃbhūta tejasā sadṛśadyuti
jagrāha daityacakrārir hariś cakraṃ sudarśanam //

muñcato bāṇanāśāya tac cakraṃ madhuvidviṣaḥ
nagnā daiteyavidyābhūt koṭarī purato hareḥ //

tām agrato harir dṛṣṭvā mīlitākṣaḥ sudarśanam
mumoca bāṇam uddiśya chettuṃ bāhuvanaṃ ripoḥ //

krameṇāsya tu bāhūnāṃ bāṇasyācyutacoditam
chedaṃ cakre 'surasyāśu śastrāstrakṣepaṇād drutam //

chinne bāhuvane tat tu karasthaṃ madhusūdanaḥ
mumukṣur bāṇanāśāya vijñātas tripuradviṣā //

sa utpatyāha govindaṃ sāmapūrvam umāpatiḥ
vilokya bāṇaṃ dordaṇḍa cchedāsṛksrāvavarṣiṇam //

kṛṣṇa kṛṣṇa jagannātha jāne tvāṃ puruṣottamam
pareśaṃ paramātmānam anādinidhanaṃ param //

devatiryaṅmanuṣyeṣu śarīragrahaṇātmikā
līleyaṃ tava ceṣṭā hi daityānāṃ vadhalakṣaṇā //

tat prasīdābhayaṃ dattaṃ bāṇasyāsya mayā prabho
tat tvayā nānṛtaṃ kāryaṃ yan mayā vyāhṛtaṃ vacaḥ //

asmatsaṃśrayavṛddho 'yaṃ nāparādhas tavāvyaya
mayā dattavaro daityas tatas tvāṃ kṣamayāmy aham //

ity uktaḥ prāha govindaḥ śūlapāṇim umāpatim
prasannavadano bhūtvā gatāmarṣo 'suraṃ prati //

yuṣmaddattavaro bāṇo jīvatād eṣa śaṃkara
tvadvākyagauravād etan mayā cakraṃ nivartitam //

tvayā yad abhayaṃ dattaṃ tad dattam abhayaṃ mayā
matto 'vibhinnam ātmānaṃ draṣṭum arhasi śaṃkara //

yo 'haṃ sa tvaṃ jagac cedaṃ sadevāsuramānuṣam
avidyāmohitātmānaḥ puruṣā bhinnadarśinaḥ //

ity uktvā prayayau kṛṣṇaḥ prādyumnir yatra tiṣṭhati
tadbandhaphaṇino neśur garuḍānilaśoṣitāḥ //

tato 'niruddham āropya sapatnīkaṃ garutmati
ājagmur dvārakāṃ rāma kārṣṇidāmodarāḥ purīm //