Brahma Purana · Chapter 205

pradyumnādyā hareḥ putrā rukmiṇyāṃ kathitā dvijāḥ
bhānvādikāṃś ca vai putrān satyabhāmā vyajāyata //

dīptimantaḥ prapakṣādyā rohiṇyās tanayā hareḥ
babhūvur jāmbavatyāś ca sāmbādyā bāhuśālinaḥ //

tanayā bhadravindādyā nāgnajityāṃ mahābalāḥ
saṃgrāmajitpradhānās tu śaibyāyāṃ cābhavan sutāḥ //

vṛkādyās tu sutā mādrī gātravatpramukhān sutān
avāpa lakṣmaṇā putrān kālindyāś ca śrutādayaḥ //

anyāsāṃ caiva bhāryāṇāṃ samutpannāni cakriṇaḥ
aṣṭāyutāni putrāṇāṃ sahasrāṇi śataṃ tathā //

pradyumnaḥ pramukhas teṣāṃ rukmiṇyās tu sutas tataḥ
pradyumnād aniruddho 'bhūd vajras tasmād ajāyata //

aniruddho raṇe ruddho baleḥ pautrīṃ mahābalaḥ
bāṇasya tanayām ūṣām upayeme dvijottamāḥ //

yatra yuddham abhūd ghoraṃ hariśaṃkarayor mahat
chinnaṃ sahasraṃ bāhūnāṃ yatra bāṇasya cakriṇā //

kathaṃ yuddham abhūd brahmann uṣārthe harakṛṣṇayoḥ
kathaṃ kṣayaṃ ca bāṇasya bāhūnāṃ kṛtavān hariḥ //

etat sarvaṃ mahābhāga vaktum arhasi no 'khilam
mahat kautūhalaṃ jātaṃ śrotum etāṃ kathāṃ śubhām //

uṣā bāṇasutā viprāḥ pārvatīṃ śaṃbhunā saha
krīḍantīm upalakṣyoccaiḥ spṛhāṃ cakre tadā svayam
tataḥ sakalacittajñā gaurī tām āha bhāminīm //

alam ity anutāpena bhartrā tvam api raṃsyase //

ity uktā sā tadā cakre kadeti matim ātmanaḥ
ko vā bhartā mamety enāṃ punar apy āha pārvatī //

vaiśākhe śukladvādaśyāṃ svapne yo 'bhibhavaṃ tava
kariṣyati sa te bhartā rājaputri bhaviṣyati //

tasyāṃ tithau pumān svapne yathā devyā udīritaḥ
tathaivābhibhavaṃ cakre rāgaṃ cakre ca tatra sā
tataḥ prabuddhā puruṣam apaśyantī tam utsukā //

kva gato 'sīti nirlajjā dvijāś coktavatī sakhīm
bāṇasya mantrī kumbhāṇḍaś citralekhā tu tatsutā //

tasyāḥ sakhy abhavat sā ca prāha ko 'yaṃ tvayocyate
yadā lajjākulā nāsya kathayām āsa sā sakhī //

tadā viśvāsam ānīya sarvam evānvavedayat
viditāyāṃ tu tām āha punar ūṣā yathoditam
devyā tathaiva tatprāptau yo 'bhyupāyaḥ kuruṣva tam //

tataḥ paṭe surān daityān gandharvāṃś ca pradhānataḥ
manuṣyāṃś cābhilikhyāsau citralekhāpy adarśayat //

apāsya sā tu gandharvāṃs tathoragasurāsurān
manuṣyeṣu dadau dṛṣṭiṃ teṣv apy andhakavṛṣṇiṣu //

kṛṣṇarāmau vilokyāsīt subhrūr lajjāyatekṣaṇā
pradyumnadarśane vrīḍā dṛṣṭiṃ ninye tato dvijāḥ //

dṛṣṭvāniruddhaṃ ca tato lajjā kvāpi nirākṛtā
so 'yaṃ so 'yaṃ mamety ukte tayā sā yogagāminī
yayau dvāravatīm ūṣāṃ samāśvāsya tataḥ sakhī //