Brahma Purana · Chapter 204

saṃstuto bhagavān itthaṃ devarājena keśavaḥ
prahasya bhāvagambhīram uvācedaṃ dvijottamāḥ //

devarājo bhavān indro vayaṃ martyā jagatpate
kṣantavyaṃ bhavataivaitad aparādhakṛtaṃ mama //

pārijātataruś cāyaṃ nīyatām ucitāspadam
gṛhīto 'yaṃ mayā śakra satyāvacanakāraṇāt //

vajraṃ cedaṃ gṛhāṇa tvaṃ yaṣṭavyaṃ prahitaṃ tvayā
tavaivaitat praharaṇaṃ śakra vairividāraṇam //

vimohayasi mām īśa martyo 'ham iti kiṃ vadan
jānīmas tvāṃ bhagavato 'nantasaukhyavido vayam //

yo 'si so 'si jagannātha pravṛttau nātha saṃsthitaḥ
jagataḥ śalyaniṣkarṣaṃ karoṣy asurasūdana //

nīyatāṃ pārijāto 'yaṃ kṛṣṇa dvāravatīṃ purīm
martyaloke tvayā mukte nāyaṃ saṃsthāsyate bhuvi //

tathety uktvā tu devendram ājagāma bhuvaṃ hariḥ
prayuktaiḥ siddhagandharvaiḥ stūyamānas tv atharṣibhiḥ //

jagāma kṛṣṇaḥ sahasā gṛhītvā pādapottamam
tataḥ śaṅkham upādhmāya dvārakopari saṃsthitaḥ //

harṣam utpādayām āsa dvārakāvāsināṃ dvijāḥ
avatīryātha garuḍāt satyabhāmāsahāyavān //

niṣkuṭe sthāpayām āsa pārijātaṃ mahātarum
yam abhyetya janaḥ sarvo jātiṃ smarati paurvikīm //

vāsyate yasya puṣpāṇāṃ gandhenorvī triyojanam
tatas te yādavāḥ sarve devagandhān amānuṣān //

dadṛśuḥ pādape tasmin kurvato mukhadarśanam
kiṃkaraiḥ samupānītaṃ hastyaśvādi tato dhanam //

striyaś ca kṛṣṇo jagrāha narakasya parigrahāt
tataḥ kāle śubhe prāpta upayeme janārdanaḥ //

tāḥ kanyā narakāvāsāt sarvato yāḥ samāhṛtāḥ
ekasminn eva govindaḥ kālenāsāṃ dvijottamāḥ //

jagrāha vidhivat pāṇīn pṛthagdehe svadharmataḥ
ṣoḍaśa strīsahasrāṇi śatam ekaṃ tathādhikam //

tāvanti cakre rūpāṇi bhagavān madhusūdanaḥ
ekaikaśaś ca tāḥ kanyā menire madhusūdanam //

mamaiva pāṇigrahaṇaṃ govindaḥ kṛtavān iti
niśāsu jagataḥ sraṣṭā tāsāṃ geheṣu keśavaḥ
uvāsa viprāḥ sarvāsāṃ viśvarūpadharo hariḥ //