Brahma Purana · Chapter 203

garuḍo vāruṇaṃ chattraṃ tathaiva maṇiparvatam
sabhāryaṃ ca hṛṣīkeśaṃ līlayaiva vahan yayau //

tataḥ śaṅkham upādhmāya svargadvāraṃ gato hariḥ
upatasthus tato devāḥ sārghapātrā janārdanam //

sa devair arcitaḥ kṛṣṇo devamātur niveśanam
sitābhraśikharākāraṃ praviśya dadṛśe 'ditim //

sa tāṃ praṇamya śakreṇa sahitaḥ kuṇḍalottame
dadau narakanāśaṃ ca śaśaṃsāsyai janārdanaḥ //

tataḥ prītā jaganmātā dhātāraṃ jagatāṃ harim
tuṣṭāvāditir avyagraṃ kṛtvā tatpravaṇaṃ manaḥ //

namas te puṇḍarīkākṣa bhaktānām abhayaṃkara
sanātanātman bhūtātman sarvātman bhūtabhāvana //

praṇetar manaso buddher indriyāṇāṃ guṇātmaka
sitadīrghādiniḥśeṣa kalpanāparivarjita //

janmādibhir asaṃspṛṣṭa svapnādivārivarjitaḥ
saṃdhyā rātrir ahar bhūmir gaganaṃ vāyur ambu ca //

hutāśano mano buddhir bhūtādis tvaṃ tathācyuta
sṛṣṭisthitivināśānāṃ kartā kartṛpatir bhavān //

brahmaviṣṇuśivākhyābhir ātmamūrtibhir īśvaraḥ
māyābhir etad vyāptaṃ te jagat sthāvarajaṅgamam //

anātmany ātmavijñānaṃ sā te māyā janārdana
ahaṃ mameti bhāvo 'tra yayā samupajāyate //

saṃsāramadhye māyāyās tavaitan nātha ceṣṭitam
yaiḥ svadharmaparair nātha narair ārādhito bhavān //

te taranty akhilām etāṃ māyām ātmavimuktaye
brahmādyāḥ sakalā devā manuṣyāḥ paśavas tathā //

viṣṇumāyāmahāvarte mohāndhatamasāvṛtāḥ
ārādhya tvām abhīpsante kāmān ātmabhavakṣaye //

pade te puruṣā baddhā māyayā bhagavaṃs tava
mayā tvaṃ putrakāminyā vairipakṣakṣayāya ca //

ārādhito na mokṣāya māyāvilasitaṃ hi tat
kaupīnācchādanaprāyā vāñchā kalpadrumād api //

jāyate yad apuṇyānāṃ so 'parādhaḥ svadoṣajaḥ
tat prasīdākhilajagan māyāmohakarāvyaya //

ajñānaṃ jñānasadbhāva bhūtabhūteśa nāśaya
namas te cakrahastāya śārṅgahastāya te namaḥ //

gadāhastāya te viṣṇo śaṅkhahastāya te namaḥ
etat paśyāmi te rūpaṃ sthūlacihnopaśobhitam
na jānāmi paraṃ yat te prasīda parameśvara //

adityaivaṃ stuto viṣṇuḥ prahasyāha surāraṇim //

mātā devi tvam asmākaṃ prasīda varadā bhava //

evam astu yathecchā te tvam aśeṣasurāsuraiḥ
ajeyaḥ puruṣavyāghra martyaloke bhaviṣyasi //

tato 'nantaram evāsya śakrāṇīsahitāṃ ditim
satyabhāmā praṇamyāha prasīdeti punaḥ punaḥ //

matprasādān na te subhru jarā vairūpyam eva ca
bhaviṣyaty anavadyāṅgi sarvakāmā bhaviṣyasi //

adityā tu kṛtānujño devarājo janārdanam
yathāvat pūjayām āsa bahumānapuraḥsaram //

tato dadarśa kṛṣṇo 'pi satyabhāmāsahāyavān
devodyānāni sarvāṇi nandanādīni sattamāḥ //

dadarśa ca sugandhāḍhyaṃ mañjarīpuñjadhāriṇam
śaityāhlādakaraṃ divyaṃ tāmrapallavaśobhitam //

mathyamāne 'mṛte jātaṃ jātarūpasamaprabham
pārijātaṃ jagannāthaḥ keśavaḥ keśisūdanaḥ
taṃ dṛṣṭvā prāha govindaṃ satyabhāmā dvijottamāḥ //

kasmān na dvārakām eṣa nīyate kṛṣṇa pādapaḥ
yadi te tad vacaḥ satyaṃ satyātyarthaṃ priyeti me //

madgṛhe niṣkuṭārthāya tad ayaṃ nīyatāṃ taruḥ
na me jāmbavatī tādṛg abhīṣṭā na ca rukmiṇī //

satye yathā tvam ity uktaṃ tvayā kṛṣṇāsakṛt priyam
satyaṃ tad yadi govinda nopacārakṛtaṃ vacaḥ //

tad astu pārijāto 'yaṃ mama gehavibhūṣaṇam
bibhratī pārijātasya keśapāśena mañjarīm
sapatnīnām ahaṃ madhye śobheyam iti kāmaye //

ity uktaḥ sa prahasyainaṃ pārijātaṃ garutmati
āropayām āsa haris tam ūcur vanarakṣiṇaḥ //

bhoḥ śacī devarājasya mahiṣī tatparigraham
pārijātaṃ na govinda hartum arhasi pādapam //

śacīvibhūṣaṇārthāya devair amṛtamanthane
utpādito 'yaṃ na kṣemī gṛhītvainaṃ gamiṣyasi //

mauḍhyāt prārthayase kṣemī gṛhītvainaṃ ca ko vrajet
avaśyam asya devendro vikṛtiṃ kṛṣṇa yāsyati //

vajrodyatakaraṃ śakram anuyāsyanti cāmarāḥ
tad alaṃ sakalair devair vigraheṇa tavācyuta
vipākakaṭu yat karma na tac chaṃsanti paṇḍitāḥ //

ity ukte tair uvācaitān satyabhāmātikopinī //

kā śacī pārijātasya ko vā śakraḥ surādhipaḥ
sāmānyaḥ sarvalokānāṃ yady eṣo 'mṛtamanthane //

samutpannaḥ purā kasmād eko gṛhṇāti vāsavaḥ
yathā surā yathā cendur yathā śrīr vanarakṣiṇaḥ //

sāmānyaḥ sarvalokasya pārijātas tathā drumaḥ
bhartṛbāhumahāgarvād ruṇaddhy enam atho śacī //

tat kathyatāṃ drutaṃ gatvā paulomyā vacanaṃ mama
satyabhāmā vadaty evaṃ bhartṛgarvoddhatākṣaram //

yadi tvaṃ dayitā bhartur yadi tasya priyā hy asi
madbhartur harato vṛkṣaṃ tat kāraya nivāraṇam //

jānāmi te patiṃ śakraṃ jānāmi tridaśeśvaram
pārijātaṃ tathāpy enaṃ mānuṣī hārayāmi te //

ity uktā rakṣiṇo gatvā proccaiḥ procur yathoditam
śacī cotsāhayām āsa tridaśādhipatiṃ patim //

tataḥ samastadevānāṃ sainyaiḥ parivṛto harim
pravṛktaḥ pārijātārtham indro yodhayituṃ dvijāḥ //

tataḥ parighanistriṃśa gadāśūladharāyudhāḥ
babhūvus tridaśāḥ sajjāḥ śakre vajrakare sthite //

tato nirīkṣya govindo nāgarājopari sthitam
śakraṃ devaparīvāraṃ yuddhāya samupasthitam //

cakāra śaṅkhanirghoṣaṃ diśaḥ śabdena pūrayan
mumoca ca śaravrātaṃ sahasrāyutasaṃmitam //

tato diśo nabhaś caiva dṛṣṭvā śaraśatācitam
mumucus tridaśāḥ sarve śastrāṇy astrāṇy anekaśaḥ //

ekaikam astraṃ śastraṃ ca devair muktaṃ sahasradhā
ciccheda līlayaiveśo jagatāṃ madhusūdanaḥ //

pāśaṃ salilarājasya samākṛṣyoragāśanaḥ
cacāla khaṇḍaśaḥ kṛttvā bālapannagadehavat //

yamena prahitaṃ daṇḍaṃ gadāprakṣepakhaṇḍitam
pṛthivyāṃ pātayām āsa bhagavān devakīsutaḥ //

śibikāṃ ca dhaneśasya cakreṇa tilaśo vibhuḥ
cakāra śaurir arkendū dṛṣṭipātahataujasau //

nīto 'gniḥ śataśo bāṇair drāvitā vasavo diśaḥ
cakravicchinnaśūlāgrā rudrā bhuvi nipātitāḥ //

sādhyā viśve ca maruto gandharvāś caiva sāyakaiḥ
śārṅgiṇā preritāḥ sarve vyomni śālmalitūlavat //

garuḍaś cāpi vaktreṇa pakṣābhyāṃ ca nakhāṅkuraiḥ
bhakṣayann ahanad devān dānavāṃś ca sadā khagaḥ //

tataḥ śarasahasreṇa devendramadhusūdanau
parasparaṃ vavarṣāte dhārābhir iva toyadau //

airāvatena garuḍo yuyudhe tatra saṃkule
devaiḥ sametair yuyudhe śakreṇa ca janārdanaḥ //

chinneṣu śīryamāṇeṣu śastreṣv astreṣu satvaram
jagrāha vāsavo vajraṃ kṛṣṇaś cakraṃ sudarśanam //

tato hāhākṛtaṃ sarvaṃ trailokyaṃ sacarācaram
vajracakradharau dṛṣṭvā devarājajanārdanau //

kṣiptaṃ vajram athendreṇa jagrāha bhagavān hariḥ
na mumoca tadā cakraṃ tiṣṭha tiṣṭheti cābravīt //

pranaṣṭavajraṃ devendraṃ garuḍakṣatavāhanam
satyabhāmābravīd vākyaṃ palāyanaparāyaṇam //

trailokyeśvara no yuktaṃ śacībhartuḥ palāyanam
pārijātasragābhogāt tvām upasthāsyate śacī //

kīdṛśaṃ deva rājyaṃ te pārijātasragujjvalām
apaśyato yathāpūrvaṃ praṇayābhyāgatāṃ śacīm //

alaṃ śakra prayāsena na vrīḍāṃ yātum arhasi
nīyatāṃ pārijāto 'yaṃ devāḥ santu gatavyathāḥ //

patigarvāvalepena bahumānapuraḥsaram
na dadarśa gṛhāyātām upacāreṇa māṃ śacī //

strītvād agurucittāhaṃ svabhartuḥ ślāghanāparā
tataḥ kṛtavatī śakra bhavatā saha vigraham //

tad alaṃ pārijātena parasvena hṛtena vā
rūpeṇa yaśasā caiva bhavet strī kā na garvitā //

ity ukte vai nivavṛte devarājas tayā dvijāḥ
prāha cainām alaṃ caṇḍi sakhi khedātivistaraiḥ //

na cāpi sargasaṃhāra sthitikartākhilasya yaḥ
jitasya tena me vrīḍā jāyate viśvarūpiṇā //

yasmiñ jagat sakalam etad anādimadhye yasmād yataś ca na bhaviṣyati sarvabhūtāt
tenodbhavapralayapālanakāraṇena vrīḍā kathaṃ bhavati devi nirākṛtasya

sakalabhuvanamūrtir alpā susūkṣmā viditasakalavedair jñāyate yasya nānyaiḥ
tam ajam akṛtam īśaṃ śāśvataṃ svecchayainaṃ jagadupakṛtim ādyaṃ ko vijetuṃ samarthaḥ