Brahma Purana · Chapter 202

dvāravatyāṃ tataḥ śauriṃ śakras tribhuvaneśvaraḥ
ājagāmātha munayo mattairāvatapṛṣṭhagaḥ //

praviśya dvārakāṃ so 'tha samīpe ca hares tadā
kathayām āsa daityasya narakasya viceṣṭitam //

tvayā nāthena devānāṃ manuṣyatve 'pi tiṣṭhatā
praśamaṃ sarvaduḥkhāni nītāni madhusūdana //

tapasvijanarakṣāyai so 'riṣṭo dhenukas tathā
pralambādyās tathā keśī te sarve nihatās tvayā //

kaṃsaḥ kuvalayāpīḍaḥ pūtanā bālaghātinī
nāśaṃ nītās tvayā sarve ye 'nye jagadupadravāḥ //

yuṣmaddordaṇḍasaṃbuddhi paritrāte jagattraye
yajñe yajñahaviḥ prāśya tṛptiṃ yānti divaukasaḥ //

so 'haṃ sāṃpratam āyāto yannimittaṃ janārdana
tac chrutvā tatpratīkāra prayatnaṃ kartum arhasi //

bhaumo 'yaṃ narako nāma prāgjyotiṣapureśvaraḥ
karoti sarvabhūtānām apaghātam ariṃdama //

devasiddhasurādīnāṃ nṛpāṇāṃ ca janārdana
hatvā tu so 'suraḥ kanyā rurodha nijamandire //

chattraṃ yat salilasrāvi taj jahāra pracetasaḥ
mandarasya tathā śṛṅgaṃ hṛtavān maṇiparvatam //

amṛtasrāviṇī divye mātur me 'mṛtakuṇḍale
jahāra so 'suro 'dityā vāñchaty airāvataṃ dvipam //

durnītam etad govinda mayā tasya tavoditam
yad atra pratikartavyaṃ tat svayaṃ parimṛśyatām //

iti śrutvā smitaṃ kṛtvā bhagavān devakīsutaḥ
gṛhītvā vāsavaṃ haste samuttasthau varāsanāt //

saṃcintitam upāruhya garuḍaṃ gaganecaram
satyabhāmāṃ samāropya yayau prāgjyotiṣaṃ puram //

āruhyairāvataṃ nāgaṃ śakro 'pi tridaśālayam
tato jagāma sumanāḥ paśyatāṃ dvārakaukasām //

prāgjyotiṣapurasyāsya samantāc chatayojanam
ācitaṃ bhairavaiḥ pāśaiḥ parasainyanivāraṇe //

tāṃś ciccheda hariḥ pāśān kṣiptvā cakraṃ sudarśanam
tato muraḥ samuttasthau taṃ jaghāna ca keśavaḥ //

muros tu tanayān sapta sahasrās tāṃs tato hariḥ
cakradhārāgninirdagdhāṃś cakāra śalabhān iva //

hatvā muraṃ hayagrīvaṃ tathā pañcajanaṃ dvijāḥ
prāgjyotiṣapuraṃ dhīmāṃs tvarāvān samupādravat //

narakenāsya tatrābhūn mahāsainyena saṃyugaḥ
kṛṣṇasya yatra govindo jaghne daityān sahasraśaḥ //

śastrāstravarṣaṃ muñcantaṃ sa bhaumaṃ narakaṃ balī
kṣiptvā cakraṃ dvidhā cakre cakrī daiteyacakrahā //

hate tu narake bhūmir gṛhītvāditikuṇḍale
upatasthe jagannāthaṃ vākyaṃ cedam athābravīt //

yadāham uddhṛtā nātha tvayā śūkaramūrtinā
tvatsaṃsparśabhavaḥ putras tadāyaṃ mayy ajāyata //

so 'yaṃ tvayaiva datto me tvayaiva vinipātitaḥ
gṛhāṇa kuṇḍale ceme pālayāsya ca saṃtatim //

bhārāvataraṇārthāya mamaiva bhagavān imam
aṃśena lokam āyātaḥ prasādasumukha prabho //

tvaṃ kartā ca vikartā ca saṃhartā prabhavo 'vyayaḥ
jagatsvarūpo yaś ca tvaṃ stūyase 'cyuta kiṃ mayā //

vyāpī vyāpyaḥ kriyā kartā kāryaṃ ca bhagavān sadā
sarvabhūtātmabhūtātmā stūyase 'cyuta kiṃ mayā //

paramātmā tvam ātmā ca bhūtātmā cāvyayo bhavān
yadā tadā stutir nāsti kimarthaṃ te pravartatām //

prasīda sarvabhūtātman narakena kṛtaṃ ca yat
tat kṣamyatām adoṣāya matsutaḥ sa nipātitaḥ //

tatheti coktvā dharaṇīṃ bhagavān bhūtabhāvanaḥ
ratnāni narakāvāsāj jagrāha munisattamāḥ //

kanyāpure sa kanyānāṃ ṣoḍaśātulavikramaḥ
śatādhikāni dadṛśe sahasrāṇi dvijottamāḥ //

caturdaṃṣṭrān gajāṃś cogrān ṣaṭ sahasrāṇi dṛṣṭavān
kāmbojānāṃ tathāśvānāṃ niyutāny ekaviṃśatim //

kanyās tāś ca tathā nāgāṃs tān aśvān dvārakāṃ purīm
prāpayām āsa govindaḥ sadyo narakakiṃkaraiḥ //

dadṛśe vāruṇaṃ chattraṃ tathaiva maṇiparvatam
āropayām āsa harir garuḍe patageśvare //

āruhya ca svayaṃ kṛṣṇaḥ satyabhāmāsahāyavān
adityāḥ kuṇḍale dātuṃ jagāma tridaśālayam //