Brahma Purana · Chapter 201

cārudeṣṇaṃ sudeṣṇaṃ ca cārudehaṃ ca śobhanam
suṣeṇaṃ cāruguptaṃ ca bhadracāruṃ tathāparam //

cāruvindaṃ sucāruṃ ca cāruṃ ca balināṃ varam
rukmiṇy ajanayat putrān kanyāṃ cārumatīṃ tathā //

anyāś ca bhāryāḥ kṛṣṇasya babhūvuḥ sapta śobhanāḥ
kālindī mitravindā ca satyā nāgnajitī tathā //

devī jāmbavatī cāpi sadā tuṣṭā tu rohiṇī
madrarājasutā cānyā suśīlā śīlamaṇḍalā //

sātrājitī satyabhāmā lakṣmaṇā cāruhāsinī
ṣoḍaśātra sahasrāṇi strīṇām anyāni cakriṇaḥ //

pradyumno 'pi mahāvīryo rukmiṇas tanayāṃ śubhām
svayaṃvarasthāṃ jagrāha sāpi taṃ tanayaṃ hareḥ //

tasyām asyābhavat putro mahābalaparākramaḥ
aniruddho raṇe ruddho vīryodadhir ariṃdamaḥ //

tasyāpi rukmiṇaḥ pautrīṃ varayām āsa keśavaḥ
dauhitrāya dadau rukmī spardhayann api śauriṇā //

tasyā vivāhe rāmādyā yādavā hariṇā saha
rukmiṇo nagaraṃ jagmur nāmnā bhojakaṭaṃ dvijāḥ //

vivāhe tatra nirvṛtte prādyumneḥ sumahātmanaḥ
kaliṅgarājapramukhā rukmiṇaṃ vākyam abruvan //

anakṣajño halī dyūte tathāsya vyasanaṃ mahat
tan nayāmo balaṃ tasmād dyūtenaiva mahādyute //

tatheti tān āha nṛpān rukmī balasamanvitaḥ
sabhāyāṃ saha rāmeṇa cakre dyūtaṃ ca vai tadā //

sahasram ekaṃ niṣkāṇāṃ rukmiṇā vijito balaḥ
dvitīye divase cānyat sahasraṃ rukmiṇā jitaḥ //

tato daśa sahasrāṇi niṣkāṇāṃ paṇam ādade
balabhadraprapannāni rukmī dyūtavidāṃ varaḥ //

tato jahāsātha balaṃ kaliṅgādhipatir dvijāḥ
dantān vidarśayan mūḍho rukmī cāha madoddhataḥ //

avidyo 'yaṃ mahādyūte balabhadraḥ parājitaḥ
mṛṣaivākṣāvalepatvād yo 'yaṃ mene 'kṣakovidam //

dṛṣṭvā kaliṅgarājaṃ tu prakāśadaśanānanam
rukmiṇaṃ cāpi durvākyaṃ kopaṃ cakre halāyudhaḥ //

tataḥ kopaparītātmā niṣkakoṭiṃ halāyudhaḥ
glahaṃ jagrāha rukmī ca tatas tv akṣān apātayat //

ajayad baladevo 'tha prāhoccais taṃ jitaṃ mayā
mameti rukmī prāhoccair alīkoktair alaṃ balam //

tvayokto 'yaṃ glahaḥ satyaṃ na mamaiṣo 'numoditaḥ
evaṃ tvayā ced vijitaṃ na mayā vijitaṃ katham //

tato 'ntarikṣe vāg uccaiḥ prāha gambhīranādinī
baladevasya taṃ kopaṃ vardhayantī mahātmanaḥ //

jitaṃ tu baladevena rukmiṇā bhāṣitaṃ mṛṣā
anuktvā vacanaṃ kiṃcit kṛtaṃ bhavati karmaṇā //

tato balaḥ samutthāya krodhasaṃraktalocanaḥ
jaghānāṣṭāpadenaiva rukmiṇaṃ sa mahābalaḥ //

kaliṅgarājaṃ cādāya visphurantaṃ balād balaḥ
babhañja dantān kupito yaiḥ prakāśaṃ jahāsa saḥ //

ākṛṣya ca mahāstambhaṃ jātarūpamayaṃ balaḥ
jaghāna ye tatpakṣās tān bhūbhṛtaḥ kupito balaḥ //

tato hāhākṛtaṃ sarvaṃ palāyanaparaṃ dvijāḥ
tad rājamaṇḍalaṃ sarvaṃ babhūva kupite bale //

balena nihataṃ śrutvā rukmiṇaṃ madhusūdanaḥ
novāca vacanaṃ kiṃcid rukmiṇībalayor bhayāt //

tato 'niruddham ādāya kṛtodvāhaṃ dvijottamāḥ
dvārakām ājagāmātha yaducakraṃ sakeśavam //