Brahma Purana · Chapter 199

bhīṣmakaḥ kuṇḍine rājā vidarbhaviṣaye 'bhavat
rukmiṇī tasya duhitā rukmī caiva suto dvijāḥ //

rukmiṇīṃ cakame kṛṣṇaḥ sā ca taṃ cāruhāsinī
na dadau yācate caināṃ rukmī dveṣeṇa cakriṇe //

dadau sa śiśupālāya jarāsaṃdhapracoditaḥ
bhīṣmako rukmiṇā sārdhaṃ rukmiṇīm uruvikramaḥ //

vivāhārthaṃ tataḥ sarve jarāsaṃdhamukhā nṛpāḥ
bhīṣmakasya puraṃ jagmuḥ śiśupālaś ca kuṇḍinam //

kṛṣṇo 'pi balabhadrādyair yadubhiḥ parivāritaḥ
prayayau kuṇḍinaṃ draṣṭuṃ vivāhaṃ caidyabhūpateḥ //

śvobhāvini vivāhe tu tāṃ kanyāṃ hṛtavān hariḥ
vipakṣabhāvam āsādya rāmādyeṣv eva bandhuṣu //

tataś ca pauṇḍrakaḥ śrīmān dantavaktro vidūrathaḥ
śiśupālo jarāsaṃdhaḥ śālvādyāś ca mahībhṛtaḥ //

kupitās te hariṃ hantuṃ cakrur udyogam uttamam
nirjitāś ca samāgamya rāmādyair yadupuṃgavaiḥ //

kuṇḍinaṃ na pravekṣyāmi ahatvā yudhi keśavam
kṛtvā pratijñāṃ rukmī ca hantuṃ kṛṣṇam abhidrutaḥ //

hatvā balaṃ sa nāgāśva pattisyandanasaṃkulam
nirjitaḥ pātitaś corvyāṃ līlayaiva sa cakriṇā //

nirjitya rukmiṇaṃ samyag upayeme sa rukmiṇīm
rākṣasena vidhānena saṃprāpto madhusūdanaḥ //

tasyāṃ jajñe ca pradyumno madanāṃśaḥ sa vīryavān
jahāra śambaro yaṃ vai yo jaghāna ca śambaram //