બ્રહ્મ પુરાણ · અધ્યાય 199

ભીષ્મકઃ કુણ્ડિને રાજા વિદર્ભવિષયે ઽભવત્
રુક્મિણી તસ્ય દુહિતા રુક્મી ચૈવ સુતો દ્વિજાઃ ॥

રુક્મિણીં ચકમે કૃષ્ણઃ સા ચ તં ચારુહાસિની
ન દદૌ યાચતે ચૈનાં રુક્મી દ્વેષેણ ચક્રિણે ॥

દદૌ સ શિશુપાલાય જરાસંધપ્રચોદિતઃ
ભીષ્મકો રુક્મિણા સાર્ધં રુક્મિણીમ્ ઉરુવિક્રમઃ ॥

વિવાહાર્થં તતઃ સર્વે જરાસંધમુખા નૃપાઃ
ભીષ્મકસ્ય પુરં જગ્મુઃ શિશુપાલશ્ ચ કુણ્ડિનમ્ ॥

કૃષ્ણો ઽપિ બલભદ્રાદ્યૈર્ યદુભિઃ પરિવારિતઃ
પ્રયયૌ કુણ્ડિનં દ્રષ્ટું વિવાહં ચૈદ્યભૂપતેઃ ॥

શ્વોભાવિનિ વિવાહે તુ તાં કન્યાં હૃતવાન્ હરિઃ
વિપક્ષભાવમ્ આસાદ્ય રામાદ્યેષ્વ્ એવ બન્ધુષુ ॥

તતશ્ ચ પૌણ્ડ્રકઃ શ્રીમાન્ દન્તવક્ત્રો વિદૂરથઃ
શિશુપાલો જરાસંધઃ શાલ્વાદ્યાશ્ ચ મહીભૃતઃ ॥

કુપિતાસ્ તે હરિં હન્તું ચક્રુર્ ઉદ્યોગમ્ ઉત્તમમ્
નિર્જિતાશ્ ચ સમાગમ્ય રામાદ્યૈર્ યદુપુંગવૈઃ ॥

કુણ્ડિનં ન પ્રવેક્ષ્યામિ અહત્વા યુધિ કેશવમ્
કૃત્વા પ્રતિજ્ઞાં રુક્મી ચ હન્તું કૃષ્ણમ્ અભિદ્રુતઃ ॥

હત્વા બલં સ નાગાશ્વ પત્તિસ્યન્દનસંકુલમ્
નિર્જિતઃ પાતિતશ્ ચોર્વ્યાં લીલયૈવ સ ચક્રિણા ॥

નિર્જિત્ય રુક્મિણં સમ્યગ્ ઉપયેમે સ રુક્મિણીમ્
રાક્ષસેન વિધાનેન સંપ્રાપ્તો મધુસૂદનઃ ॥

તસ્યાં જજ્ઞે ચ પ્રદ્યુમ્નો મદનાંશઃ સ વીર્યવાન્
જહાર શમ્બરો યં વૈ યો જઘાન ચ શમ્બરમ્ ॥