Brahma Purana · Chapter 198

vane viharatas tasya saha gopair mahātmanaḥ
mānuṣacchadmarūpasya śeṣasya dharaṇībhṛtaḥ //

niṣpāditorukāryasya kāryeṇaivāvatāriṇaḥ
upabhogārtham atyarthaṃ varuṇaḥ prāha vāruṇīm //

abhīṣṭāṃ sarvadā hy asya madire tvaṃ mahaujasaḥ
anantasyopabhogāya tasya gaccha mude śubhe //

ity uktā vāruṇī tena saṃnidhānam athākarot
vṛndāvanataṭotpanna kadambatarukoṭare //

vicaran baladevo 'pi madirāgandham uddhatam
āghrāya madirāharṣam avāpātha purātanam //

tataḥ kadambāt sahasā madyadhārāṃ sa lāṅgalī
patantīṃ vīkṣya munayaḥ prayayau paramāṃ mudam //

papau ca gopagopībhiḥ samaveto mudānvitaḥ
upagīyamāno lalitaṃ gītavādyaviśāradaiḥ //

śramato 'tyantagharmāmbhaḥ kaṇikāmauktikojjvalaḥ
āgaccha yamune snātum icchāmīty āha vihvalaḥ //

tasya vācaṃ nadī sā tu mattoktām avamanya vai
nājagāma tataḥ kruddho halaṃ jagrāha lāṅgalī //

gṛhītvā tāṃ taṭenaiva cakarṣa madavihvalaḥ
pāpe nāyāsi nāyāsi gamyatām icchayānyataḥ //

sā kṛṣṭā tena sahasā mārgaṃ saṃtyajya nimnagā
yatrāste baladevo 'sau plāvayām āsa tad vanam //

śarīriṇī tathopetya trāsavihvalalocanā
prasīdety abravīd rāmaṃ muñca māṃ muśalāyudha //

so 'bravīd avajānāsi mama śauryabalaṃ yadi
so 'haṃ tvāṃ halapātena nayiṣyāmi sahasradhā //

ity uktayātisaṃtrastas tayā nadyā prasāditaḥ
bhūbhāge plāvite tatra mumoca yamunāṃ balaḥ //

tataḥ snātasya vai kāntir ājagāma mahāvane
avataṃsotpalaṃ cāru gṛhītvaikaṃ ca kuṇḍalam //

varuṇaprahitāṃ cāsmai mālām amlānapaṅkajām
samudrārhe tathā vastre nīle lakṣmīr ayacchata //

kṛtāvataṃsaḥ sa tadā cārukuṇḍalabhūṣitaḥ
nīlāmbaradharaḥ sragvī śuśubhe kāntisaṃyutaḥ //

itthaṃ vibhūṣito reme tatra rāmas tadā vraje
māsadvayena yātaś ca punaḥ sa mathurāṃ purīm //

revatīṃ caiva tanayāṃ raivatasya mahīpateḥ
upayeme balas tasyāṃ jajñāte niśaṭholmukau //