Brahma Purana · Chapter 197

itthaṃ stutas tadā tena mucukundena dhīmatā
prāheśaḥ sarvabhūtānām anādinidhano hariḥ //

yathābhivāñchitāṃl lokān divyān gaccha nareśvara
avyāhataparaiśvaryo matprasādopabṛṃhitaḥ //

bhuktvā divyān mahābhogān bhaviṣyasi mahākule
jātismaro matprasādāt tato mokṣam avāpsyasi //

ity uktaḥ praṇipatyeśaṃ jagatām acyutaṃ nṛpaḥ
guhāmukhād viniṣkrānto dadṛśe so 'lpakān narān //

tataḥ kaliyugaṃ jñātvā prāptaṃ taptuṃ tato nṛpaḥ
naranārāyaṇasthānaṃ prayayau gandhamādanam //

kṛṣṇo 'pi ghātayitvārim upāyena hi tadbalam
jagrāha mathurām etya hastyaśvasyandanojjvalam //

ānīya cograsenāya dvāravatyāṃ nyavedayat
parābhibhavaniḥśaṅkaṃ babhūva ca yadoḥ kulam //

baladevo 'pi viprendrāḥ praśāntākhilavigrahaḥ
jñātidarśanasotkaṇṭhaḥ prayayau nandagokulam //

tato gopāś ca gopyaś ca yathāpūrvam amitrajit
tathaivābhyavadat premṇā bahumānapuraḥsaram //

kaiś cāpi saṃpariṣvaktaḥ kāṃścit sa pariṣasvaje
hāsaṃ cakre samaṃ kaiścid gopagopījanais tathā //

priyāṇy anekāny avadan gopās tatra halāyudham
gopyaś ca premamuditāḥ procuḥ serṣyam athāparāḥ //

gopyaḥ papracchur aparā nāgarījanavallabhaḥ
kaccid āste sukhaṃ kṛṣṇaś calatpremarasākulaḥ //

asmacceṣṭopahasanaṃ na kaccit purayoṣitām
saubhāgyamānam adhikaṃ karoti kṣaṇasauhṛdaḥ //

kaccit smarati naḥ kṛṣṇo gītānugamanaṃ kṛtam
apy asau mātaraṃ draṣṭuṃ sakṛd apy āgamiṣyati //

athavā kiṃ tadālāpaiḥ kriyantām aparāḥ kathāḥ
yad asmābhir vinā tena vināsmākaṃ bhaviṣyati //

pitā mātā tathā bhrātā bhartā bandhujanaś ca kaḥ
na tyaktas tatkṛte śmābhir akṛtajñas tato hi saḥ //

tathāpi kaccid ātmīyam ihāgamanasaṃśrayam
karoti kṛṣṇo vaktavyaṃ bhavatā vacanāmṛtam //

dāmodaro 'sau govindaḥ purastrīsaktamānasaḥ
apetaprītir asmāsu durdarśaḥ pratibhāti naḥ //

āmantritaḥ sa kṛṣṇeti punar dāmodareti ca
jahasuḥ susvaraṃ gopyo hariṇā kṛṣṭacetasaḥ //

saṃdeśaiḥ saumyamadhuraiḥ premagarbhair agarvitaiḥ
rāmeṇāśvāsitā gopyaḥ kṛṣṇasyātimadhusvaraiḥ //

gopaiś ca pūrvavad rāmaḥ parihāsamanoharaiḥ
kathāś cakāra premṇā ca saha tair vrajabhūmiṣu //