બ્રહ્મ પુરાણ · અધ્યાય 198

વને વિહરતસ્ તસ્ય સહ ગોપૈર્ મહાત્મનઃ
માનુષચ્છદ્મરૂપસ્ય શેષસ્ય ધરણીભૃતઃ ॥

નિષ્પાદિતોરુકાર્યસ્ય કાર્યેણૈવાવતારિણઃ
ઉપભોગાર્થમ્ અત્યર્થં વરુણઃ પ્રાહ વારુણીમ્ ॥

અભીષ્ટાં સર્વદા હ્ય્ અસ્ય મદિરે ત્વં મહૌજસઃ
અનન્તસ્યોપભોગાય તસ્ય ગચ્છ મુદે શુભે ॥

ઇત્ય્ ઉક્તા વારુણી તેન સંનિધાનમ્ અથાકરોત્
વૃન્દાવનતટોત્પન્ન કદમ્બતરુકોટરે ॥

વિચરન્ બલદેવો ઽપિ મદિરાગન્ધમ્ ઉદ્ધતમ્
આઘ્રાય મદિરાહર્ષમ્ અવાપાથ પુરાતનમ્ ॥

તતઃ કદમ્બાત્ સહસા મદ્યધારાં સ લાઙ્ગલી
પતન્તીં વીક્ષ્ય મુનયઃ પ્રયયૌ પરમાં મુદમ્ ॥

પપૌ ચ ગોપગોપીભિઃ સમવેતો મુદાન્વિતઃ
ઉપગીયમાનો લલિતં ગીતવાદ્યવિશારદૈઃ ॥

શ્રમતો ઽત્યન્તઘર્મામ્ભઃ કણિકામૌક્તિકોજ્જ્વલઃ
આગચ્છ યમુને સ્નાતુમ્ ઇચ્છામીત્ય્ આહ વિહ્વલઃ ॥

તસ્ય વાચં નદી સા તુ મત્તોક્તામ્ અવમન્ય વૈ
નાજગામ તતઃ ક્રુદ્ધો હલં જગ્રાહ લાઙ્ગલી ॥

ગૃહીત્વા તાં તટેનૈવ ચકર્ષ મદવિહ્વલઃ
પાપે નાયાસિ નાયાસિ ગમ્યતામ્ ઇચ્છયાન્યતઃ ॥

સા કૃષ્ટા તેન સહસા માર્ગં સંત્યજ્ય નિમ્નગા
યત્રાસ્તે બલદેવો ઽસૌ પ્લાવયામ્ આસ તદ્ વનમ્ ॥

શરીરિણી તથોપેત્ય ત્રાસવિહ્વલલોચના
પ્રસીદેત્ય્ અબ્રવીદ્ રામં મુઞ્ચ માં મુશલાયુધ ॥

સો ઽબ્રવીદ્ અવજાનાસિ મમ શૌર્યબલં યદિ
સો ઽહં ત્વાં હલપાતેન નયિષ્યામિ સહસ્રધા ॥

ઇત્ય્ ઉક્તયાતિસંત્રસ્તસ્ તયા નદ્યા પ્રસાદિતઃ
ભૂભાગે પ્લાવિતે તત્ર મુમોચ યમુનાં બલઃ ॥

તતઃ સ્નાતસ્ય વૈ કાન્તિર્ આજગામ મહાવને
અવતંસોત્પલં ચારુ ગૃહીત્વૈકં ચ કુણ્ડલમ્ ॥

વરુણપ્રહિતાં ચાસ્મૈ માલામ્ અમ્લાનપઙ્કજામ્
સમુદ્રાર્હે તથા વસ્ત્રે નીલે લક્ષ્મીર્ અયચ્છત ॥

કૃતાવતંસઃ સ તદા ચારુકુણ્ડલભૂષિતઃ
નીલામ્બરધરઃ સ્રગ્વી શુશુભે કાન્તિસંયુતઃ ॥

ઇત્થં વિભૂષિતો રેમે તત્ર રામસ્ તદા વ્રજે
માસદ્વયેન યાતશ્ ચ પુનઃ સ મથુરાં પુરીમ્ ॥

રેવતીં ચૈવ તનયાં રૈવતસ્ય મહીપતેઃ
ઉપયેમે બલસ્ તસ્યાં જજ્ઞાતે નિશઠોલ્મુકૌ ॥