Brahma Purana · Chapter 196

gārgyaṃ goṣṭhe dvijo śyālaḥ ṣaṇḍha ity uktavān dvijāḥ
yadūnāṃ saṃnidhau sarve jahasur yādavās tadā //

tataḥ kopasamāviṣṭo dakṣiṇāpatham etya saḥ
sutam icchaṃs tapas tepe yaducakrabhayāvaham //

ārādhayan mahādevaṃ so 'yaś cūrṇam abhakṣayat
dadau varaṃ ca tuṣṭo 'sau varṣe dvādaśake haraḥ //

saṃbhāvayām āsa sa taṃ yavaneśo hy anātmajam
tadyoṣitsaṃgamāc cāsya putro 'bhūd alisaprabhaḥ //

taṃ kālayavanaṃ nāma rājye sve yavaneśvaraḥ
abhiṣicya vanaṃ yāto vajrāgrakaṭhinorasam //

sa tu vīryamadonmattaḥ pṛthivyāṃ balino nṛpān
papraccha nāradaś cāsmai kathayām āsa yādavān //

mlecchakoṭisahasrāṇāṃ sahasraiḥ so 'pi saṃvṛtaḥ
gajāśvarathasaṃpannaiś cakāra paramodyamam //

prayayau cātavacchinnaiḥ prayāṇaiḥ sa dine dine
yādavān prati sāmarṣo munayo mathurāṃ purīm //

kṛṣṇo 'pi cintayām āsa kṣapitaṃ yādavaṃ balam
yavanena samālokya māgadhaḥ saṃprayāsyati //

māgadhasya balaṃ kṣīṇaṃ sa kālayavano balī
hantā tad idam āyātaṃ yadūnāṃ vyasanaṃ dvidhā //

tasmād durgaṃ kariṣyāmi yadūnām atidurjayam
striyo 'pi yatra yudhyeyuḥ kiṃ punar vṛṣṇiyādavāḥ //

mayi matte pramatte vā supte pravasite 'pi vā
yādavābhibhavaṃ duṣṭā mā kurvan vairiṇo 'dhikam //

iti saṃcintya govindo yojanāni mahodadhim
yayāce dvādaśa purīṃ dvārakāṃ tatra nirmame //

mahodyānāṃ mahāvaprāṃ taḍāgaśataśobhitām
prākāraśatasaṃbādhām indrasyevāmarāvatīm //

mathurāvāsinaṃ lokaṃ tatrānīya janārdanaḥ
āsanne kālayavane mathurāṃ ca svayaṃ yayau //

bahir āvāsite sainye mathurāyā nirāyudhaḥ
nirjagāma sa govindo dadarśa yavanaś ca tam //

sa jñātvā vāsudevaṃ taṃ bāhupraharaṇo nṛpaḥ
anuyāto mahāyogi cetobhiḥ prāpyate na yaḥ //

tenānuyātaḥ kṛṣṇo 'pi praviveśa mahāguhām
yatra śete mahāvīryo mucukundo nareśvaraḥ //

so 'pi praviṣṭo yavano dṛṣṭvā śayyāgataṃ naram
pādena tāḍayām āsa kṛṣṇaṃ matvā sa durmatiḥ //

dṛṣṭamātraś ca tenāsau jajvāla yavano 'gninā
tatkrodhajena munayo bhasmībhūtaś ca tatkṣaṇāt //

sa hi devāsure yuddhe gatvā jitvā mahāsurān
nidrārtaḥ sumahākālaṃ nidrāṃ vavre varaṃ surān //

proktaś ca devaiḥ saṃsuptaṃ yas tvām utthāpayiṣyati
dehajenāgninā sadyaḥ sa tu bhasmībhaviṣyati //

evaṃ dagdhvā sa taṃ pāpaṃ dṛṣṭvā ca madhusūdanam
kas tvam ity āha so 'py āha jāto 'haṃ śaśinaḥ kule //

vasudevasya tanayo yaduvaṃśasamudbhavaḥ
mucukundo 'pi tac chrutvā vṛddhagārgyavacaḥ smaran //

saṃsmṛtya praṇipatyainaṃ sarvaṃ sarveśvaraṃ harim
prāha jñāto bhavān viṣṇor aṃśas tvaṃ parameśvaraḥ //

purā gārgyeṇa kathitam aṣṭāviṃśatime yuge
dvāparānte harer janma yaduvaṃśe bhaviṣyati //

sa tvaṃ prāpto na saṃdeho martyānām upakārakṛt
tathā hi sumahat tejo nālaṃ soḍhum ahaṃ tava //

tathā hi sumahāmbhoda dhvanidhīrataraṃ tataḥ
vākyaṃ tam iti hovāca yuṣmatpādasulālitam //

devāsure mahāyuddhe daityāś ca sumahābhaṭāḥ
na śekus te mahat tejas tat tejo na sahāmy aham //

saṃsārapatitasyaiko jantos tvaṃ śaraṇaṃ param
saṃprasīda prapannārti hartā hara mamāśubham //

tvaṃ payonidhayaḥ śailāḥ saritaś ca vanāni ca
medinī gaganaṃ vāyur āpo 'gnis tvaṃ tathā pumān //

puṃsaḥ parataraṃ sarvaṃ vyāpya janma vikalpavat
śabdādihīnam ajaraṃ vṛddhikṣayavivarjitam //

tvatto 'marās tu pitaro yakṣagandharvarākṣasāḥ
siddhāś cāpsarasas tvatto manuṣyāḥ paśavaḥ khagāḥ //

sarīsṛpā mṛgāḥ sarve tvattaś caiva mahīruhāḥ
yac ca bhūtaṃ bhaviṣyad vā kiṃcid atra carācare //

amūrtaṃ mūrtam athavā sthūlaṃ sūkṣmataraṃ tathā
tat sarvaṃ tvaṃ jagatkartar nāsti kiṃcit tvayā vinā //

mayā saṃsāracakre 'smin bhramatā bhagavan sadā
tāpatrayābhibhūtena na prāptā nirvṛtiḥ kvacit //

duḥkhāny eva sukhānīti mṛgatṛṣṇājalāśayaḥ
mayā nātha gṛhītāni tāni tāpāya me 'bhavan //

rājyam urvī balaṃ kośo mitrapakṣas tathātmajāḥ
bhāryā bhṛtyajanā ye ca śabdādyā viṣayāḥ prabho //

sukhabuddhyā mayā sarvaṃ gṛhītam idam avyaya
pariṇāme ca deveśa tāpātmakam abhūn mama //

devalokagatiṃ prāpto nātha devagaṇo 'pi hi
mattaḥ sāhāyyakāmo 'bhūc chāśvatī kutra nirvṛtiḥ //

tvām anārādhya jagatāṃ sarveṣāṃ prabhavāspadam
śāśvatī prāpyate kena parameśvara nirvṛtiḥ //

tvanmāyāmūḍhamanaso janmamṛtyujarādikān
avāpya pāpān paśyanti pretarājānam antarā //

tataḥ pāśaśatair baddhā narakeṣv atidāruṇam
prāpnuvanti mahad duḥkhaṃ viśvarūpam idaṃ tava //

aham atyantaviṣayī mohitas tava māyayā
mamatvāgādhagartānte bhramāmi parameśvara //

so 'haṃ tvāṃ śaraṇam apāram īśam īḍyaṃ saṃprāptaḥ paramapadaṃ yato na kiṃcit
saṃsāraśramaparitāpataptacetā nirviṇṇe pariṇatadhāmni sābhilāṣaḥ