Brahma Purana · Chapter 195

jarāsaṃdhasute kaṃsa upayeme mahābalaḥ
astiḥ prāptiś ca bho viprās tayor bhartṛhaṇaṃ harim //

mahābalaparīvāro māgadhādhipatir balī
hantum abhyāyayau kopāj jarāsaṃdhaḥ sayādavam //

upetya mathurāṃ so 'tha rurodha magadheśvaraḥ
akṣauhiṇībhiḥ sainyasya trayoviṃśatibhir vṛtaḥ //

niṣkramyālpaparīvārāv ubhau rāmajanārdanau
yuyudhāte samaṃ tasya balinau balisainikaiḥ //

tato balaś ca kṛṣṇaś ca matiṃ cakre mahābalaḥ
āyudhānāṃ purāṇānām ādāne munisattamāḥ //

anantaraṃ cakraśārṅge tūṇau cāpy akṣayau śaraiḥ
ākāśād āgatau vīrau tadā kaumodakī gadā //

halaṃ ca balabhadrasya gaganād āgamat karam
balasyābhimataṃ viprāḥ sunandaṃ muśalaṃ tathā //

tato yuddhe parājitya svasainyaṃ magadhādhipam
purīṃ viviśatur vīrāv ubhau rāmajanārdanau //

jite tasmin sudurvṛtte jarāsaṃdhe dvijottamāḥ
jīvamāne gate tatra kṛṣṇo mene na taṃ jitam //

punar apy ājagāmātha jarāsaṃdho balānvitaḥ
jitaś ca rāmakṛṣṇābhyām apakṛtya dvijottamāḥ //

daśa cāṣṭau ca saṃgrāmān evam atyantadurmadaḥ
yadubhir māgadho rājā cakre kṛṣṇapurogamaiḥ //

sarveṣv eva ca yuddheṣu yadubhiḥ sa parājitaḥ
apakrānto jarāsaṃdhaḥ svalpasainyair balādhikaḥ //

tad balaṃ yādavānāṃ vai rakṣitaṃ yad anekaśaḥ
tat tu saṃnidhimāhātmyaṃ viṣṇor aṃśasya cakriṇaḥ //

manuṣyadharmaśīlasya līlā sā jagataḥ pateḥ
astrāṇy anekarūpāṇi yad arātiṣu muñcati //

manasaiva jagatsṛṣṭi saṃhāraṃ tu karoti yaḥ
tasyāripakṣakṣapaṇe kiyān udyamavistaraḥ //

tathāpi ca manuṣyāṇāṃ dharmas tadanuvartanam
kurvan balavatā saṃdhiṃ hīnair yuddhaṃ karoty asau //

sāma copapradānaṃ ca tathā bhedaṃ ca darśayan
karoti daṇḍapātaṃ ca kvacid eva palāyanam //

manuṣyadehināṃ ceṣṭām ity evam anuvartate
līlā jagatpates tasya cchandataḥ saṃpravartate //