બ્રહ્મ પુરાણ · અધ્યાય 195

જરાસંધસુતે કંસ ઉપયેમે મહાબલઃ
અસ્તિઃ પ્રાપ્તિશ્ ચ ભો વિપ્રાસ્ તયોર્ ભર્તૃહણં હરિમ્ ॥

મહાબલપરીવારો માગધાધિપતિર્ બલી
હન્તુમ્ અભ્યાયયૌ કોપાજ્ જરાસંધઃ સયાદવમ્ ॥

ઉપેત્ય મથુરાં સો ઽથ રુરોધ મગધેશ્વરઃ
અક્ષૌહિણીભિઃ સૈન્યસ્ય ત્રયોવિંશતિભિર્ વૃતઃ ॥

નિષ્ક્રમ્યાલ્પપરીવારાવ્ ઉભૌ રામજનાર્દનૌ
યુયુધાતે સમં તસ્ય બલિનૌ બલિસૈનિકૈઃ ॥

તતો બલશ્ ચ કૃષ્ણશ્ ચ મતિં ચક્રે મહાબલઃ
આયુધાનાં પુરાણાનામ્ આદાને મુનિસત્તમાઃ ॥

અનન્તરં ચક્રશાર્ઙ્ગે તૂણૌ ચાપ્ય્ અક્ષયૌ શરૈઃ
આકાશાદ્ આગતૌ વીરૌ તદા કૌમોદકી ગદા ॥

હલં ચ બલભદ્રસ્ય ગગનાદ્ આગમત્ કરમ્
બલસ્યાભિમતં વિપ્રાઃ સુનન્દં મુશલં તથા ॥

તતો યુદ્ધે પરાજિત્ય સ્વસૈન્યં મગધાધિપમ્
પુરીં વિવિશતુર્ વીરાવ્ ઉભૌ રામજનાર્દનૌ ॥

જિતે તસ્મિન્ સુદુર્વૃત્તે જરાસંધે દ્વિજોત્તમાઃ
જીવમાને ગતે તત્ર કૃષ્ણો મેને ન તં જિતમ્ ॥

પુનર્ અપ્ય્ આજગામાથ જરાસંધો બલાન્વિતઃ
જિતશ્ ચ રામકૃષ્ણાભ્યામ્ અપકૃત્ય દ્વિજોત્તમાઃ ॥

દશ ચાષ્ટૌ ચ સંગ્રામાન્ એવમ્ અત્યન્તદુર્મદઃ
યદુભિર્ માગધો રાજા ચક્રે કૃષ્ણપુરોગમૈઃ ॥

સર્વેષ્વ્ એવ ચ યુદ્ધેષુ યદુભિઃ સ પરાજિતઃ
અપક્રાન્તો જરાસંધઃ સ્વલ્પસૈન્યૈર્ બલાધિકઃ ॥

તદ્ બલં યાદવાનાં વૈ રક્ષિતં યદ્ અનેકશઃ
તત્ તુ સંનિધિમાહાત્મ્યં વિષ્ણોર્ અંશસ્ય ચક્રિણઃ ॥

મનુષ્યધર્મશીલસ્ય લીલા સા જગતઃ પતેઃ
અસ્ત્રાણ્ય્ અનેકરૂપાણિ યદ્ અરાતિષુ મુઞ્ચતિ ॥

મનસૈવ જગત્સૃષ્ટિ સંહારં તુ કરોતિ યઃ
તસ્યારિપક્ષક્ષપણે કિયાન્ ઉદ્યમવિસ્તરઃ ॥

તથાપિ ચ મનુષ્યાણાં ધર્મસ્ તદનુવર્તનમ્
કુર્વન્ બલવતા સંધિં હીનૈર્ યુદ્ધં કરોત્ય્ અસૌ ॥

સામ ચોપપ્રદાનં ચ તથા ભેદં ચ દર્શયન્
કરોતિ દણ્ડપાતં ચ ક્વચિદ્ એવ પલાયનમ્ ॥

મનુષ્યદેહિનાં ચેષ્ટામ્ ઇત્ય્ એવમ્ અનુવર્તતે
લીલા જગત્પતેસ્ તસ્ય ચ્છન્દતઃ સંપ્રવર્તતે ॥