Brahma Purana · Chapter 194

tau samutpannavijñānau bhagavatkarmadarśanāt
devakīvasudevau tu dṛṣṭvā māyāṃ punar hariḥ //

mohāya yaducakrasya vitatāna sa vaiṣṇavīm
uvāca cāmba bhos tāta cirād utkaṇṭhitena tu //

bhavantau kaṃsabhītena dṛṣṭau saṃkarṣaṇena ca
kurvatāṃ yāti yaḥ kālo mātāpitror apūjanam //

sa vṛthā kleśakārī vai sādhūnām upajāyate
gurudevadvijātīnāṃ mātāpitroś ca pūjanam //

kurvataḥ saphalaṃ janma dehinas tāta jāyate
tat kṣantavyam idaṃ sarvam atikramakṛtaṃ pitaḥ
kaṃsavīryapratāpābhyām āvayoḥ paravaśyayoḥ //

ity uktvātha praṇamyobhau yaduvṛddhān anukramāt
pādānatibhiḥ sasnehaṃ cakratuḥ pauramānasam //

kaṃsapatnyas tataḥ kaṃsaṃ parivārya hataṃ bhuvi
vilepur mātaraś cāsya śokaduḥkhapariplutāḥ //

bahuprakāram asvasthāḥ paścāttāpāturā hariḥ
tāḥ samāśvāsayām āsa svayam asrāvilekṣaṇaḥ //

ugrasenaṃ tato bandhān mumoca madhusūdanaḥ
abhyaṣiñcat tathaivainaṃ nijarājye hatātmajam //

rājye 'bhiṣiktaḥ kṛṣṇena yadusiṃhaḥ sutasya saḥ
cakāra pretakāryāṇi ye cānye tatra ghātitāḥ //

kṛtordhvadaihikaṃ cainaṃ siṃhāsanagataṃ hariḥ
uvācājñāpaya vibho yat kāryam aviśaṅkayā //

yayātiśāpād vaṃśo 'yam arājyārho 'pi sāṃpratam
mayi bhṛtye sthite devān ājñāpayatu kiṃ nṛpaiḥ //

ity uktvā cograsenaṃ tu vāyuṃ prati jagāda ha
nṛvācā caiva bhagavān keśavaḥ kāryamānuṣaḥ //

gacchendraṃ brūhi vāyo tvam alaṃ garveṇa vāsava
dīyatām ugrasenāya sudharmā bhavatā sabhā //

kṛṣṇo bravīti rājārham etad ratnam anuttamam
sudharmākhyā sabhā yuktam asyāṃ yadubhir āsitum //

ity uktaḥ pavano gatvā sarvam āha śacīpatim
dadau so 'pi sudharmākhyāṃ sabhāṃ vāyoḥ puraṃdaraḥ //

vāyunā cāhṛtāṃ divyāṃ te sabhāṃ yadupuṃgavāḥ
bubhujuḥ sarvaratnāḍhyāṃ govindabhujasaṃśrayāḥ //

viditākhilavijñānau sarvajñānamayāv api
śiṣyācāryakramaṃ vīrau khyāpayantau yadūttamau //

tataḥ sāṃdīpaniṃ kāśyam avantipuravāsinam
astrārthaṃ jagmatur vīrau baladevajanārdanau //

tasya śiṣyatvam abhyetya guruvṛttiparau hi tau
darśayāṃ cakratur vīrāv ācāram akhile jane //

sarahasyaṃ dhanurvedaṃ sasaṃgraham adhīyatām
ahorātraiś catuḥṣaṣṭyā tad adbhutam abhūd dvijāḥ //

sāṃdīpanir asaṃbhāvyaṃ tayoḥ karmātimānuṣam
vicintya tau tadā mene prāptau candradivākarau //

astragrāmam aśeṣaṃ ca proktamātram avāpya tau
ūcatur vriyatāṃ yā te dātavyā gurudakṣiṇā //

so 'py atīndriyam ālokya tayoḥ karma mahāmatiḥ
ayācata mṛtaṃ putraṃ prabhāse lavaṇārṇave //

gṛhītāstrau tatas tau tu gatvā taṃ lavaṇodadhim
ūcutuś ca guroḥ putro dīyatām iti sāgaram //

kṛtāñjalipuṭaś cābdhis tāv atha dvijasattamāḥ
uvāca na mayā putro hṛtaḥ sāṃdīpaner iti //

daityaḥ pañcajano nāma śaṅkharūpaḥ sa bālakam
jagrāha so 'sti salile mamaivāsurasūdana //

ity ukto 'ntar jalaṃ gatvā hatvā pañcajanaṃ tathā
kṛṣṇo jagrāha tasyāsthi prabhavaṃ śaṅkham uttamam //

yasya nādena daityānāṃ balahāniḥ prajāyate
devānāṃ vardhate tejo yāty adharmaś ca saṃkṣayam //

taṃ pāñcajanyam āpūrya gatvā yamapurīṃ hariḥ
baladevaś ca balavāñ jitvā vaivasvataṃ yamam //

taṃ bālaṃ yātanāsaṃsthaṃ yathāpūrvaśarīriṇam
pitre pradattavān kṛṣṇo balaś ca balināṃ varaḥ //

mathurāṃ ca punaḥ prāptāv ugrasenena pālitām
prahṛṣṭapuruṣastrīkāv ubhau rāmajanārdanau //