Brahma Purana · Chapter 191

akrūro 'pi viniṣkramya syandanenāśugāminā
kṛṣṇasaṃdarśanāsaktaḥ prayayau nandagokule //

cintayām āsa cākrūro nāsti dhanyataro mayā
yo 'ham aṃśāvatīrṇasya mukhaṃ drakṣyāmi cakriṇaḥ //

adya me saphalaṃ janma suprabhātā ca me niśā
yad unnidrābjapattrākṣaṃ viṣṇor drakṣyāmy aham mukham //

pāpaṃ harati yat puṃsāṃ smṛtaṃ saṃkalpanāmayam
tat puṇḍarīkanayanaṃ viṣṇor drakṣyāmy ahaṃ mukham //

nirjagmuś ca yato vedā vedāṅgāny akhilāni ca
drakṣyāmi yat paraṃ dhāma devānāṃ bhagavanmukham //

yajñeṣu yajñapuruṣaḥ puruṣaiḥ puruṣottamaḥ
ijyate yo 'khilādhāras taṃ drakṣyāmi jagatpatim //

iṣṭvā yam indro yajñānāṃ śatenāmararājatām
avāpa tam anantādim ahaṃ drakṣyāmi keśavam //

na brahmā nendrarudrāśvi vasvādityamarudgaṇāḥ
yasya svarūpaṃ jānanti spṛśaty adya sa me hariḥ //

sarvātmā sarvagaḥ sarvaḥ sarvabhūteṣu saṃsthitaḥ
yo bhavaty avyayo vyāpī sa vīkṣyate mayādya ha //

matsyakūrmavarāhādyaiḥ siṃharūpādibhiḥ sthitam
cakāra yogato yogaṃ sa mām ālāpayiṣyati //

sāṃprataṃ ca jagatsvāmī kāryajāte vraje sthitim
kartuṃ manuṣyatāṃ prāptaḥ svecchādehadhṛg avyayaḥ //

yo 'nantaḥ pṛthivīṃ dhatte śikharasthitisaṃsthitām
so 'vatīrṇo jagatyarthe mām akrūreti vakṣyati //

pitṛbandhusuhṛdbhrātṛ mātṛbandhumayīm imām
yanmāyāṃ nālam uddhartuṃ jagat tasmai namo namaḥ //

taranty avidyāṃ vitatāṃ hṛdi yasmin niveśite
yogamāyām imāṃ martyās tasmai vidyātmane namaḥ //

yajvabhir yajñapuruṣo vāsudevaś ca śāśvataiḥ
vedāntavedibhir viṣṇuḥ procyate yo nato 'smi tam //

tathā yatra jagad dhāmni dhāryate ca pratiṣṭhitam
sadasattvaṃ sa sattvena mayy asau yātu saumyatām //

smṛte sakalakalyāṇa bhājanaṃ yatra jāyate
puruṣapravaraṃ nityaṃ vrajāmi śaraṇaṃ harim //

itthaṃ sa cintayan viṣṇuṃ bhaktinamrātmamānasaḥ
akrūro gokulaṃ prāptaḥ kiṃcit sūrye virājati //

sa dadarśa tadā tatra kṛṣṇam ādohane gavām
vatsamadhyagataṃ phulla nīlotpaladalacchavim //

praphullapadmapattrākṣaṃ śrīvatsāṅkitavakṣasam
pralambabāhum āyāma tuṅgorasthalam unnasam //

savilāsasmitādhāraṃ bibhrāṇaṃ mukhapaṅkajam
tuṅgaraktanakhaṃ padbhyāṃ dharaṇyāṃ supratiṣṭhitam //

bibhrāṇaṃ vāsasī pīte vanyapuṣpavibhūṣitam
sāndranīlalatāhastaṃ sitāmbhojāvataṃsakam //

haṃsendukundadhavalaṃ nīlāmbaradharaṃ dvijāḥ
tasyānu balabhadraṃ ca dadarśa yadunandanam //

prāṃśum uttuṅgabāhuṃ ca vikāśimukhapaṅkajam
meghamālāparivṛtaṃ kailāsādrim ivāparam //

tau dṛṣṭvā vikasadvaktra sarojaḥ sa mahāmatiḥ
pulakāñcitasarvāṅgas tadākrūro 'bhavad dvijāḥ //

ya etat paramaṃ dhāma etat tat paramaṃ padam
abhavad vāsudevo 'sau dvidhā yo 'yaṃ vyavasthitaḥ //

sāphalyam akṣṇor yugapan mamāstu dṛṣṭe jagaddhātari hāsam uccaiḥ
apy aṅgam etad bhagavatprasādād dattāṅgasaṅge phalavartma tat syāt

adyaiva spṛṣṭvā mama hastapadmaṃ kariṣyati śrīmadanantamūrtiḥ
yasyāṅgulisparśahatākhilāghair avāpyate siddhir anuttamā naraiḥ

tathāśvirudrendravasupraṇītā devāḥ prayacchanti varaṃ prahṛṣṭāḥ
cakraṃ ghnatā daityapater hṛtāni daityāṅganānāṃ nayanāntarāṇi

yatrāmbu vinyasya balir manobhyām avāpa bhogān vasudhātalasthaḥ
tathāmareśas tridaśādhipatyaṃ manvantaraṃ pūrṇam avāpa śakraḥ

atheśa māṃ kaṃsaparigraheṇa doṣāspadībhūtam adoṣayuktam
kartā na mānopahitaṃ dhig astu yasmān manaḥ sādhubahiṣkṛto yaḥ

jñānātmakasyākhilasattvarāśer vyāvṛttadoṣasya sadāsphuṭasya
kiṃ vā jagaty atra samastapuṃsām ajñātam asyāsti hṛdi sthitasya

tasmād ahaṃ bhaktivinamragātro vrajāmi viśveśvaram īśvarāṇām
aṃśāvatāraṃ puruṣottamasya anādimadhyāntam ajasya viṣṇoḥ