બ્રહ્મ પુરાણ · અધ્યાય 191

અક્રૂરો ઽપિ વિનિષ્ક્રમ્ય સ્યન્દનેનાશુગામિના
કૃષ્ણસંદર્શનાસક્તઃ પ્રયયૌ નન્દગોકુલે ॥

ચિન્તયામ્ આસ ચાક્રૂરો નાસ્તિ ધન્યતરો મયા
યો ઽહમ્ અંશાવતીર્ણસ્ય મુખં દ્રક્ષ્યામિ ચક્રિણઃ ॥

અદ્ય મે સફલં જન્મ સુપ્રભાતા ચ મે નિશા
યદ્ ઉન્નિદ્રાબ્જપત્ત્રાક્ષં વિષ્ણોર્ દ્રક્ષ્યામ્ય્ અહમ્ મુખમ્ ॥

પાપં હરતિ યત્ પુંસાં સ્મૃતં સંકલ્પનામયમ્
તત્ પુણ્ડરીકનયનં વિષ્ણોર્ દ્રક્ષ્યામ્ય્ અહં મુખમ્ ॥

નિર્જગ્મુશ્ ચ યતો વેદા વેદાઙ્ગાન્ય્ અખિલાનિ ચ
દ્રક્ષ્યામિ યત્ પરં ધામ દેવાનાં ભગવન્મુખમ્ ॥

યજ્ઞેષુ યજ્ઞપુરુષઃ પુરુષૈઃ પુરુષોત્તમઃ
ઇજ્યતે યો ઽખિલાધારસ્ તં દ્રક્ષ્યામિ જગત્પતિમ્ ॥

ઇષ્ટ્વા યમ્ ઇન્દ્રો યજ્ઞાનાં શતેનામરરાજતામ્
અવાપ તમ્ અનન્તાદિમ્ અહં દ્રક્ષ્યામિ કેશવમ્ ॥

ન બ્રહ્મા નેન્દ્રરુદ્રાશ્વિ વસ્વાદિત્યમરુદ્ગણાઃ
યસ્ય સ્વરૂપં જાનન્તિ સ્પૃશત્ય્ અદ્ય સ મે હરિઃ ॥

સર્વાત્મા સર્વગઃ સર્વઃ સર્વભૂતેષુ સંસ્થિતઃ
યો ભવત્ય્ અવ્યયો વ્યાપી સ વીક્ષ્યતે મયાદ્ય હ ॥

મત્સ્યકૂર્મવરાહાદ્યૈઃ સિંહરૂપાદિભિઃ સ્થિતમ્
ચકાર યોગતો યોગં સ મામ્ આલાપયિષ્યતિ ॥

સાંપ્રતં ચ જગત્સ્વામી કાર્યજાતે વ્રજે સ્થિતિમ્
કર્તું મનુષ્યતાં પ્રાપ્તઃ સ્વેચ્છાદેહધૃગ્ અવ્યયઃ ॥

યો ઽનન્તઃ પૃથિવીં ધત્તે શિખરસ્થિતિસંસ્થિતામ્
સો ઽવતીર્ણો જગત્યર્થે મામ્ અક્રૂરેતિ વક્ષ્યતિ ॥

પિતૃબન્ધુસુહૃદ્ભ્રાતૃ માતૃબન્ધુમયીમ્ ઇમામ્
યન્માયાં નાલમ્ ઉદ્ધર્તું જગત્ તસ્મૈ નમો નમઃ ॥

તરન્ત્ય્ અવિદ્યાં વિતતાં હૃદિ યસ્મિન્ નિવેશિતે
યોગમાયામ્ ઇમાં મર્ત્યાસ્ તસ્મૈ વિદ્યાત્મને નમઃ ॥

યજ્વભિર્ યજ્ઞપુરુષો વાસુદેવશ્ ચ શાશ્વતૈઃ
વેદાન્તવેદિભિર્ વિષ્ણુઃ પ્રોચ્યતે યો નતો ઽસ્મિ તમ્ ॥

તથા યત્ર જગદ્ ધામ્નિ ધાર્યતે ચ પ્રતિષ્ઠિતમ્
સદસત્ત્વં સ સત્ત્વેન મય્ય્ અસૌ યાતુ સૌમ્યતામ્ ॥

સ્મૃતે સકલકલ્યાણ ભાજનં યત્ર જાયતે
પુરુષપ્રવરં નિત્યં વ્રજામિ શરણં હરિમ્ ॥

ઇત્થં સ ચિન્તયન્ વિષ્ણું ભક્તિનમ્રાત્મમાનસઃ
અક્રૂરો ગોકુલં પ્રાપ્તઃ કિંચિત્ સૂર્યે વિરાજતિ ॥

સ દદર્શ તદા તત્ર કૃષ્ણમ્ આદોહને ગવામ્
વત્સમધ્યગતં ફુલ્લ નીલોત્પલદલચ્છવિમ્ ॥

પ્રફુલ્લપદ્મપત્ત્રાક્ષં શ્રીવત્સાઙ્કિતવક્ષસમ્
પ્રલમ્બબાહુમ્ આયામ તુઙ્ગોરસ્થલમ્ ઉન્નસમ્ ॥

સવિલાસસ્મિતાધારં બિભ્રાણં મુખપઙ્કજમ્
તુઙ્ગરક્તનખં પદ્ભ્યાં ધરણ્યાં સુપ્રતિષ્ઠિતમ્ ॥

બિભ્રાણં વાસસી પીતે વન્યપુષ્પવિભૂષિતમ્
સાન્દ્રનીલલતાહસ્તં સિતામ્ભોજાવતંસકમ્ ॥

હંસેન્દુકુન્દધવલં નીલામ્બરધરં દ્વિજાઃ
તસ્યાનુ બલભદ્રં ચ દદર્શ યદુનન્દનમ્ ॥

પ્રાંશુમ્ ઉત્તુઙ્ગબાહું ચ વિકાશિમુખપઙ્કજમ્
મેઘમાલાપરિવૃતં કૈલાસાદ્રિમ્ ઇવાપરમ્ ॥

તૌ દૃષ્ટ્વા વિકસદ્વક્ત્ર સરોજઃ સ મહામતિઃ
પુલકાઞ્ચિતસર્વાઙ્ગસ્ તદાક્રૂરો ઽભવદ્ દ્વિજાઃ ॥

ય એતત્ પરમં ધામ એતત્ તત્ પરમં પદમ્
અભવદ્ વાસુદેવો ઽસૌ દ્વિધા યો ઽયં વ્યવસ્થિતઃ ॥

સાફલ્યમ્ અક્ષ્ણોર્ યુગપન્ મમાસ્તુ દૃષ્ટે જગદ્ધાતરિ હાસમ્ ઉચ્ચૈઃ
અપ્ય્ અઙ્ગમ્ એતદ્ ભગવત્પ્રસાદાદ્ દત્તાઙ્ગસઙ્ગે ફલવર્ત્મ તત્ સ્યાત્

અદ્યૈવ સ્પૃષ્ટ્વા મમ હસ્તપદ્મં કરિષ્યતિ શ્રીમદનન્તમૂર્તિઃ
યસ્યાઙ્ગુલિસ્પર્શહતાખિલાઘૈર્ અવાપ્યતે સિદ્ધિર્ અનુત્તમા નરૈઃ

તથાશ્વિરુદ્રેન્દ્રવસુપ્રણીતા દેવાઃ પ્રયચ્છન્તિ વરં પ્રહૃષ્ટાઃ
ચક્રં ઘ્નતા દૈત્યપતેર્ હૃતાનિ દૈત્યાઙ્ગનાનાં નયનાન્તરાણિ

યત્રામ્બુ વિન્યસ્ય બલિર્ મનોભ્યામ્ અવાપ ભોગાન્ વસુધાતલસ્થઃ
તથામરેશસ્ ત્રિદશાધિપત્યં મન્વન્તરં પૂર્ણમ્ અવાપ શક્રઃ

અથેશ માં કંસપરિગ્રહેણ દોષાસ્પદીભૂતમ્ અદોષયુક્તમ્
કર્તા ન માનોપહિતં ધિગ્ અસ્તુ યસ્માન્ મનઃ સાધુબહિષ્કૃતો યઃ

જ્ઞાનાત્મકસ્યાખિલસત્ત્વરાશેર્ વ્યાવૃત્તદોષસ્ય સદાસ્ફુટસ્ય
કિં વા જગત્ય્ અત્ર સમસ્તપુંસામ્ અજ્ઞાતમ્ અસ્યાસ્તિ હૃદિ સ્થિતસ્ય

તસ્માદ્ અહં ભક્તિવિનમ્રગાત્રો વ્રજામિ વિશ્વેશ્વરમ્ ઈશ્વરાણામ્
અંશાવતારં પુરુષોત્તમસ્ય અનાદિમધ્યાન્તમ્ અજસ્ય વિષ્ણોઃ