Brahma Purana · Chapter 190

kakudmini hate 'riṣṭe dhenuke ca nipātite
pralambe nidhanaṃ nīte dhṛte govardhanācale //

damite kāliye nāge bhagne tuṅgadrumadvaye
hatāyāṃ pūtanāyāṃ ca śakaṭe parivartite //

kaṃsāya nāradaḥ prāha yathāvṛttam anukramāt
yaśodādevakīgarbha parivartādy aśeṣataḥ //

śrutvā tat sakalaṃ kaṃso nāradād devadarśanāt
vasudevaṃ prati tadā kopaṃ cakre sa durmatiḥ //

so 'tikopād upālabhya sarvayādavasaṃsadi
jagarhe yādavāṃś cāpi kāryaṃ caitad acintayat //

yāvan na balam ārūḍhau balakṛṣṇau subālakau
tāvad eva mayā vadhyāv asādhyau rūḍhayauvanau //

cāṇūro 'tra mahāvīryo muṣṭikaś ca mahābalaḥ
etābhyāṃ mallayuddhe tau ghātayiṣyāmi durmadau //

dhanurmahamahāyāga vyājenānīya tau vrajāt
tathā tathā kariṣyāmi yāsyataḥ saṃkṣayaṃ yathā //

ity ālocya sa duṣṭātmā kaṃso rāmajanārdanau
hantuṃ kṛtamatir vīram akrūraṃ vākyam abravīt //

bho bho dānapate vākyaṃ kriyatāṃ prītaye mama
itaḥ syandanam āruhya gamyatāṃ nandagokulam //

vasudevasutau tatra viṣṇor aṃśasamudbhavau
nāśāya kila saṃbhūtau mama duṣṭau pravardhataḥ //

dhanurmahamahāyāgaś caturdaśyāṃ bhaviṣyati
āneyau bhavatā tau tu mallayuddhāya tatra vai //

cāṇūramuṣṭikau mallau niyuddhakuśalau mama
tābhyāṃ sahānayor yuddhaṃ sarvaloko 'tra paśyatu //

nāgaḥ kuvalayāpīḍo mahāmātrapracoditaḥ
sa tau nihaṃsyate pāpau vasudevātmajau śiśū //

tau hatvā vasudevaṃ ca nandagopaṃ ca durmatim
haniṣye pitaraṃ caiva ugrasenaṃ ca durmatim //

tataḥ samastagopānāṃ godhanāny akhilāny aham
vittaṃ cāpahariṣyāmi duṣṭānāṃ madvadhaiṣiṇām //

tvām ṛte yādavāś ceme duṣṭā dānapate mama
eteṣāṃ ca vadhāyāhaṃ prayatiṣyāmy anukramāt //

tato niṣkaṇṭakaṃ sarvaṃ rājyam etad ayādavam
prasādhiṣye tvayā tasmān matprītyā vīra gamyatām //

yathā ca māhiṣaṃ sarpir dadhi cāpy upahārya vai
gopāḥ samānayanty āśu tvayā vācyās tathā tathā //

ity ājñaptas tadākrūro mahābhāgavato dvijāḥ
prītimān abhavat kṛṣṇaṃ śvo drakṣyāmīti satvaraḥ //

tathety uktvā tu rājānaṃ ratham āruhya satvaraḥ
niścakrāma tadā puryā mathurāyā madhupriyaḥ //

keśī cāpi balodagraḥ kaṃsadūtaḥ pracoditaḥ
kṛṣṇasya nidhanākāṅkṣī vṛndāvanam upāgamat //

sa khurakṣatabhūpṛṣṭhaḥ saṭākṣepadhutāmbudaḥ
punar vikrāntacandrārka mārgo gopāntam āgamat //

tasya hreṣitaśabdena gopālā daityavājinaḥ
gopyaś ca bhayasaṃvignā govindaṃ śaraṇaṃ yayuḥ //

trāhi trāhīti govindas teṣāṃ śrutvā tu tadvacaḥ
satoyajaladadhvāna gambhīram idam uktavān //

alaṃ trāsena gopālāḥ keśinaḥ kiṃ bhayāturaiḥ
bhavadbhir gopajātīyair vīravīryaṃ vilopyate //

kim anenālpasāreṇa hreṣitāropakāriṇā
daiteyabalavāhyena valgatā duṣṭavājinā //

ehy ehi duṣṭa kṛṣṇo 'haṃ pūṣṇas tv iva pinākadhṛk
pātayiṣyāmi daśanān vadanād akhilāṃs tava //

ity uktvā sa tu govindaḥ keśinaḥ saṃmukhaṃ yayau
vivṛtāsyaś ca so 'py enaṃ daiteyaś ca upādravat //

bāhum ābhoginaṃ kṛtvā mukhe tasya janārdanaḥ
praveśayām āsa tadā keśino duṣṭavājinaḥ //

keśino vadanaṃ tena viśatā kṛṣṇabāhunā
śātitā daśanās tasya sitābhrāvayavā iva //

kṛṣṇasya vavṛdhe bāhuḥ keśidehagato dvijāḥ
vināśāya yathā vyādhir āptabhūtair upekṣitaḥ //

vipāṭitauṣṭho bahulaṃ saphenaṃ rudhiraṃ vaman
sṛkkaṇī vivṛte cakre viśliṣṭe muktabandhane //

jagāma dharaṇīṃ pādaiḥ śakṛnmūtraṃ samutsṛjan
svedārdragātraḥ śrāntaś ca niryatnaḥ so 'bhavat tataḥ //

vyāditāsyo mahāraudraḥ so 'suraḥ kṛṣṇabāhunā
nipapāta dvidhābhūto vaidyutena yathā drumaḥ //

dvipādapṛṣṭhapucchārdha śravaṇaikākṣanāsike
keśinas te dvidhā bhūte śakale ca virejatuḥ //

hatvā tu keśinaṃ kṛṣṇo muditair gopakair vṛtaḥ
anāyastatanuḥ svastho hasaṃs tatraiva saṃsthitaḥ //

tato gopāś ca gopyaś ca hate keśini vismitāḥ
tuṣṭuvuḥ puṇḍarīkākṣam anurāgamanoramam //

āyayau tvarito vipro nārado jaladasthitaḥ
keśinaṃ nihataṃ dṛṣṭvā harṣanirbharamānasaḥ //

sādhu sādhu jagannātha līlayaiva yad acyuta
nihato 'yaṃ tvayā keśī kleśadas tridivaukasām //

sukarmāṇy avatāre tu kṛtāni madhusūdana
yāni vai vismitaṃ cetas toṣam etena me gatam //

turagasyāsya śakro 'pi kṛṣṇa devāś ca bibhyati
dhutakesarajālasya hreṣato 'bhrāvalokinaḥ //

yasmāt tvayaiṣa duṣṭātmā hataḥ keśī janārdana
tasmāt keśavanāmnā tvaṃ loke geyo bhaviṣyasi //

svasty astu te gamiṣyāmi kaṃsayuddhe 'dhunā punaḥ
paraśvo 'haṃ sameṣyāmi tvayā keśiniṣūdana //

ugrasenasute kaṃse sānuge vinipātite
bhārāvatārakartā tvaṃ pṛthivyā dharaṇīdhara //

tatrānekaprakāreṇa yuddhāni pṛthivīkṣitām
draṣṭavyāni mayā yuṣmat praṇītāni janārdana //

so 'haṃ yāsyāmi govinda devakāryaṃ mahat kṛtam
tvayā sabhājitaś cāhaṃ svasti te 'stu vrajāmy aham //

nārade tu gate kṛṣṇaḥ saha gopair avismitaḥ
viveśa gokulaṃ gopī netrapānaikabhājanam //