Brahma Purana · Chapter 189

gate śakre tu gopālāḥ kṛṣṇam akliṣṭakāriṇam
ūcuḥ prītyā dhṛtaṃ dṛṣṭvā tena govardhanācalam //

vayam asmān mahābhāga bhavatā mahato bhayāt
gāvaś ca bhavatā trātā giridhāraṇakarmaṇā //

bālakrīḍeyam atulā gopālatvaṃ jugupsitam
divyaṃ ca karma bhavataḥ kim etat tāta kathyatām //

kāliyo damitas toye pralambo vinipātitaḥ
dhṛto govardhanaś cāyaṃ śaṅkitāni manāṃsi naḥ //

satyaṃ satyaṃ hareḥ pādau śrayāmo 'mitavikrama
yathā tvadvīryam ālokya na tvāṃ manyāmahe naram //

devo vā dānavo vā tvaṃ yakṣo gandharva eva vā
kiṃ cāsmākaṃ vicāreṇa bāndhavo 'sti namo 'stu te //

prītiḥ sastrīkumārasya vrajasya tava keśava
karma cedam aśakyaṃ yat samastais tridaśair api //

bālatvaṃ cātivīryaṃ ca janma cāsmāsv aśobhanam
cintyamānam ameyātmañ śaṅkāṃ kṛṣṇa prayacchati //

kṣaṇaṃ bhūtvā tv asau tūṣṇīṃ kiṃcit praṇayakopavān
ity evam uktas tair gopair āha kṛṣṇo dvijottamāḥ //

matsaṃbandhena vo gopā yadi lajjā na jāyate
ślāghyo vāhaṃ tataḥ kiṃ vo vicāreṇa prayojanam //

yadi vo 'sti mayi prītiḥ ślāghyo 'haṃ bhavatāṃ yadi
tad arghā bandhusadṛśī bāndhavāḥ kriyatāṃ mayi //

nāhaṃ devo na gandharvo na yakṣo na ca dānavaḥ
ahaṃ vo bāndhavo jāto nātaś cintyam ato 'nyathā //

iti śrutvā harer vākyaṃ baddhamaunās tato balam
yayur gopā mahābhāgās tasmin praṇayakopini //

kṛṣṇas tu vimalaṃ vyoma śaraccandrasya candrikām
tathā kumudinīṃ phullām āmoditadigantarām //

vanarājīṃ tathā kūjad bhṛṅgamālāmanoramām
vilokya saha gopībhir manaś cakre ratiṃ prati //

saha rāmeṇa madhuram atīva vanitāpriyam
jagau kamalapādo 'sau nāma tatra kṛtavrataḥ //

ramyaṃ gītadhvaniṃ śrutvā saṃtyajyāvasathāṃs tadā
ājagmus tvaritā gopyo yatrāste madhusūdanaḥ //

śanaiḥ śanair jagau gopī kācit tasya padānugā
dattāvadhānā kācic ca tam eva manasāsmarat //

kācit kṛṣṇeti kṛṣṇeti coktvā lajjām upāyayau
yayau ca kācit premāndhā tatpārśvam avilajjitā //

kācid āvasathasyāntaḥ sthitvā dṛṣṭvā bahir gurum
tanmayatvena govindaṃ dadhyau mīlitalocanā //

gopīparivṛto rātriṃ śaraccandramanoramām
mānayām āsa govindo rāsārambharasotsukaḥ //

gopyaś ca vṛndaśaḥ kṛṣṇa ceṣṭābhyāyattamūrtayaḥ
anyadeśagate kṛṣṇe cerur vṛndāvanāntaram //

babhramus tās tato gopyaḥ kṛṣṇadarśanalālasāḥ
kṛṣṇasya caraṇaṃ rātrau dṛṣṭvā vṛndāvane dvijāḥ //

evaṃ nānāprakārāsu kṛṣṇaceṣṭāsu tāsu ca
gopyo vyagrāḥ samaṃ cerū ramyaṃ vṛndāvanaṃ vanam //

nivṛttās tās tato gopyo nirāśāḥ kṛṣṇadarśane
yamunātīram āgamya jagus taccaritaṃ dvijāḥ //

tato dadṛśur āyāntaṃ vikāśimukhapaṅkajam
gopyas trailokyagoptāraṃ kṛṣṇam akliṣṭakāriṇam //

kācid ālokya govindam āyāntam atiharṣitā
kṛṣṇa kṛṣṇeti kṛṣṇeti prāhotphullavilocanā //

kācid bhrūbhaṅguraṃ kṛtvā lalāṭaphalakaṃ harim
vilokya netrabhṛṅgābhyāṃ papau tanmukhapaṅkajam //

kācid ālokya govindaṃ nimīlitavilocanā
tasyaiva rūpaṃ dhyāyantī yogārūḍheva sā babhau //

tataḥ kāṃcit priyālāpaiḥ kāṃcid bhrūbhaṅgavīkṣitaiḥ
ninye 'nunayam anyāś ca karasparśena mādhavaḥ //

tābhiḥ prasannacittābhir gopībhiḥ saha sādaram
rarāma rāsagoṣṭhībhir udāracarito hariḥ //

rāsamaṇḍalabaddho 'pi kṛṣṇapārśvam anūdgatā
gopījano na caivābhūd ekasthānasthirātmanā //

haste pragṛhya caikaikāṃ gopikāṃ rāsamaṇḍalam
cakāra ca karasparśa nimīlitadṛśaṃ hariḥ //

tataḥ pravavṛte ramyā caladvalayanisvanaiḥ
anuyātaśaratkāvya geyagītir anukramām //

kṛṣṇaḥ śaraccandramasaṃ kaumudīkumudākaram
jagau gopījanas tv ekaṃ kṛṣṇanāma punaḥ punaḥ //

parivṛttā śrameṇaikā caladvalayatāpinī
dadau bāhulatāṃ skandhe gopī madhuvighātinaḥ //

kācit pravilasadbāhuḥ parirabhya cucumba tam
gopī gītastutivyāja nipuṇā madhusūdanam //

gopīkapolasaṃśleṣam abhipadya harer bhujau
pulakodgamaśasyāya svedāmbughanatāṃ gatau //

rāsageyaṃ jagau kṛṣṇo yāvat tārataradhvaniḥ
sādhu kṛṣṇeti kṛṣṇeti tāvat tā dviguṇaṃ jaguḥ //

gate 'nugamanaṃ cakrur valane saṃmukhaṃ yayuḥ
pratilomānulomena bhejur gopāṅganā harim //

sa tadā saha gopībhī rarāma madhusūdanaḥ
sa varṣakoṭipratimaḥ kṣaṇas tena vinābhavat //

tā vāryamāṇāḥ pitṛbhiḥ patibhir bhrātṛbhis tathā
kṛṣṇaṃ gopāṅganā rātrau ramayanti ratipriyāḥ //

so 'pi kaiśorakavayā mānayan madhusūdanaḥ
reme tābhir ameyātmā kṣapāsu kṣapitāhitaḥ //

tadbhartṛṣu tathā tāsu sarvabhūteṣu ceśvaraḥ
ātmasvarūparūpo 'sau vyāpya sarvam avasthitaḥ //

yathā samastabhūteṣu nabho 'gniḥ pṛthivī jalam
vāyuś cātmā tathaivāsau vyāpya sarvam avasthitaḥ //

pradoṣārdhe kadācit tu rāsāsakte janārdane
trāsayan samado goṣṭhān ariṣṭaḥ samupāgataḥ //

satoyatoyadākāras tīkṣṇaśṛṅgo 'rkalocanaḥ
khurāgrapātair atyarthaṃ dārayan dharaṇītalam //

lelihānaḥ saniṣpeṣaṃ jihvayauṣṭhau punaḥ punaḥ
saṃrambhākṣiptalāṅgūlaḥ kaṭhinaskandhabandhanaḥ //

udagrakakudābhogaḥ pramāṇād duratikramaḥ
viṇmūtrāliptapṛṣṭhāṅgo gavām udvegakārakaḥ //

pralambakaṇṭho 'bhimukhas tarughātāṅkitānanaḥ
pātayan sa gavāṃ garbhān daityo vṛṣabharūpadhṛk //

sūdayaṃs tarasā sarvān vanāny aṭati yaḥ sadā
tatas tam atighorākṣam avekṣyātibhayāturāḥ //

gopā gopastriyaś caiva kṛṣṇa kṛṣṇeti cukruśuḥ
siṃhanādaṃ tataś cakre talaśabdaṃ ca keśavaḥ //

tacchabdaśravaṇāc cāsau dāmodaramukhaṃ yayau
agranyastaviṣāṇāgraḥ kṛṣṇakukṣikṛtekṣaṇaḥ //

abhyadhāvata duṣṭātmā daityo vṛṣabharūpadhṛk
āyāntaṃ daityavṛṣabhaṃ dṛṣṭvā kṛṣṇo mahābalam //

na cacāla tataḥ sthānād avajñāsmitalīlayā
āsannaṃ caiva jagrāha grāhavan madhusūdanaḥ //

jaghāna jānunā kukṣau viṣāṇagrahaṇācalam
tasya darpabalaṃ hatvā gṛhītasya viṣāṇayoḥ //

āpīḍayad ariṣṭasya kaṇṭhaṃ klinnam ivāmbaram
utpāṭya śṛṅgam ekaṃ ca tenaivātāḍayat tataḥ //

mamāra sa mahādaityo mukhāc choṇitam udvaman
tuṣṭuvur nihate tasmin gopā daitye janārdanam
jambhe hate sahasrākṣaṃ purā devagaṇā yathā //