Brahma Purana · Chapter 188

mahe pratihate śakro bhṛśaṃ kopasamanvitaḥ
saṃvartakaṃ nāma gaṇaṃ toyadānām athābravīt //

bho bho meghā niśamyaitad vadato vacanaṃ mama
ājñānantaram evāśu kriyatām avicāritam //

nandagopaḥ sudurbuddhir gopair anyaiḥ sahāyavān
kṛṣṇāśrayabalādhmāto mahabhaṅgam acīkarat //

ājīvo yaḥ paraṃ teṣāṃ gopatvasya ca kāraṇam
tā gāvo vṛṣṭipātena pīḍyantāṃ vacanān mama //

aham apy adriśṛṅgābhaṃ tuṅgam āruhya vāraṇam
sāhāyyaṃ vaḥ kariṣyāmi vāyūnāṃ saṃgamena ca //

ity ājñaptāḥ surendreṇa mumucus te balāhakāḥ
vātavarṣaṃ mahābhīmam abhāvāya gavāṃ dvijāḥ //

tataḥ kṣaṇena dharaṇī kakubho 'mbaram eva ca
ekaṃ dhārāmahāsāra pūraṇenābhavad dvijāḥ //

gāvas tu tena patatā varṣavātena veginā
dhutāḥ prāṇāñ jahuḥ sarvās tiryaṅmukhaśirodharāḥ //

kroḍena vatsān ākramya tasthur anyā dvijottamāḥ
gāvo vivatsāś ca kṛtā vāripūreṇa cāparāḥ //

vatsāś ca dīnavadanāḥ pavanākampikaṃdharāḥ
trāhi trāhīty alpaśabdāḥ kṛṣṇam ūcur ivārtakāḥ //

tatas tad gokulaṃ sarvaṃ gogopīgopasaṃkulam
atīvārtaṃ harir dṛṣṭvā trāṇāyācintayat tadā //

etat kṛtaṃ mahendreṇa mahabhaṅgavirodhinā
tad etad akhilaṃ goṣṭhaṃ trātavyam adhunā mayā //

imam adrim ahaṃ vīryād utpāṭyoruśilātalam
dhārayiṣyāmi goṣṭhasya pṛthucchattram ivopari //

iti kṛtvā matiṃ kṛṣṇo govardhanamahīdharam
utpāṭyaikakareṇaiva dhārayām āsa līlayā //

gopāṃś cāha jagannāthaḥ samutpāṭitabhūdharaḥ
viśadhvam atra sahitāḥ kṛtaṃ varṣanivāraṇam //

sunirvāteṣu deśeṣu yathāyogyam ihāsyatām
praviśya nātra bhetavyaṃ giripātasya nirbhayaiḥ //

ity uktās tena te gopā viviśur godhanaiḥ saha
śakaṭāropitair bhāṇḍair gopyaś cāsārapīḍitāḥ //

kṛṣṇo 'pi taṃ dadhāraivaṃ śailam atyantaniścalam
vrajaukovāsibhir harṣa vismitākṣair nirīkṣitaḥ //

gopagopījanair hṛṣṭaiḥ prītivistāritekṣaṇaiḥ
saṃstūyamānacaritaḥ kṛṣṇaḥ śailam adhārayat //

saptarātraṃ mahāmeghā vavarṣur nandagokule
indreṇa coditā meghā gopānāṃ nāśakāriṇā //

tato dhṛte mahāśaile paritrāte ca gokule
mithyāpratijño balabhid vārayām āsa tān ghanān //

vyabhre nabhasi devendre vitathe śakramantrite
niṣkramya gokulaṃ hṛṣṭaḥ svasthānaṃ punar āgamat //

mumoca kṛṣṇo 'pi tadā govardhanamahāgirim
svasthāne vismitamukhair dṛṣṭas tair vrajavāsibhiḥ //

dhṛte govardhane śaile paritrāte ca gokule
rocayām āsa kṛṣṇasya darśanaṃ pākaśāsanaḥ //

so 'dhiruhya mahānāgam airāvatam amitrajit
govardhanagirau kṛṣṇaṃ dadarśa tridaśādhipaḥ //

cārayantaṃ mahāvīryaṃ gāś ca gopavapurdharam
kṛtsnasya jagato gopaṃ vṛtaṃ gopakumārakaiḥ //

garuḍaṃ ca dadarśoccair antardhānagataṃ dvijāḥ
kṛtacchāyaṃ harer mūrdhni pakṣābhyāṃ pakṣipuṃgavam //

avaruhya sa nāgendrād ekānte madhusūdanam
śakraḥ sasmitam āhedaṃ prītivisphāritekṣaṇaḥ //

kṛṣṇa kṛṣṇa śṛṇuṣvedaṃ yadartham aham āgataḥ
tvatsamīpaṃ mahābāho naitac cintyaṃ tvayānyathā //

bhārāvataraṇārdhāya pṛthivyāḥ pṛthivītalam
avatīrṇo 'khilādhāras tvam eva parameśvara //

mahabhaṅgaviruddhena mayā gokulanāśakāḥ
samādiṣṭā mahāmeghās taiś caitat kadanaṃ kṛtam //

trātās tāpāt tvayā gāvaḥ samutpāṭya mahāgirim
tenāhaṃ toṣito vīra karmaṇātyadbhutena te //

sādhitaṃ kṛṣṇa devānām adya manye prayojanam
tvayāyam adripravaraḥ kareṇaikena coddhṛtaḥ //

gobhiś ca noditaḥ kṛṣṇa tvatsamīpam ihāgataḥ
tvayā trātābhir atyarthaṃ yuṣmatkāraṇakāraṇāt //

sa tvāṃ kṛṣṇābhiṣekṣyāmi gavāṃ vākyapracoditaḥ
upendratve gavām indro govindas tvaṃ bhaviṣyasi //

athopavāhyād ādāya ghaṇṭām airāvatād gajāt
abhiṣekaṃ tayā cakre pavitrajalapūrṇayā //

kriyamāṇe 'bhiṣeke tu gāvaḥ kṛṣṇasya tatkṣaṇāt
prasravodbhūtadugdhārdrāṃ sadyaś cakrur vasuṃdharām //

abhiṣicya gavāṃ vākyād devendro vai janārdanam
prītyā sapraśrayaṃ kṛṣṇaṃ punar āha śacīpatiḥ //

gavām etat kṛtaṃ vākyāt tathānyad api me śṛṇu
yad bravīmi mahābhāga bhārāvataraṇecchayā //

mamāṃśaḥ puruṣavyāghraḥ pṛthivyāṃ pṛthivīdhara
avatīrṇo 'rjuno nāma sa rakṣyo bhavatā sadā //

bhārāvataraṇe sakhyaṃ sa te vīraḥ kariṣyati
sa rakṣaṇīyo bhavatā yathātmā madhusūdana //

jānāmi bhārate vaṃśe jātaṃ pārthaṃ tavāṃśataḥ
tam ahaṃ pālayiṣyāmi yāvad asmi mahītale //

yāvan mahītale śakra sthāsyāmy aham ariṃdama
na tāvad arjunaṃ kaścid devendra yudhi jeṣyati //

kaṃso nāma mahābāhur daityo 'riṣṭas tathā paraḥ
keśī kuvalayāpīḍo narakādyās tathāpare //

hateṣu teṣu devendra bhaviṣyati mahāhavaḥ
tatra viddhi sahasrākṣa bhārāvataraṇaṃ kṛtam //

sa tvaṃ gaccha na saṃtāpaṃ putrārthe kartum arhasi
nārjunasya ripuḥ kaścin mamāgre prabhaviṣyati //

arjunārthe tv ahaṃ sarvān yudhiṣṭhirapurogamān
nivṛtte bhārate yuddhe kuntyai dāsyāmi vikṣatān //

ity uktaḥ saṃpariṣvajya devarājo janārdanam
āruhyairāvataṃ nāgaṃ punar eva divaṃ yayau //

kṛṣṇo 'pi sahito gobhir gopālaiś ca punar vrajam
ājagāmātha gopīnāṃ dṛṣṭapūtena vartmanā //