Brahma Purana · Chapter 186

gāḥ pālayantau ca punaḥ sahitau rāmakeśavau
bhramamāṇau vane tatra ramyaṃ tālavanaṃ gatau //

tac ca tālavanaṃ nityaṃ dhenuko nāma dānavaḥ
nṛgomāṃsakṛtāhāraḥ sadādhyāste kharākṛtiḥ //

tatra tālavanaṃ ramyaṃ phalasaṃpatsamanvitam
dṛṣṭvā spṛhānvitā gopāḥ phalādāne 'bruvan vacaḥ //

he rāma he kṛṣṇa sadā dhenukenaiva rakṣyate
bhūpradeśo yatas tasmāt tyaktānīmāni santi vai //

phalāni paśya tālānāṃ gandhamodayutāni vai
vayam etāny abhīpsāmaḥ pātyantāṃ yadi rocate //

iti gopakumārāṇāṃ śrutvā saṃkarṣaṇo vacaḥ
kṛṣṇaś ca pātayām āsa bhuvi tālaphalāni vai //

tālānāṃ patatāṃ śabdam ākarṇyāsurarāṭ tataḥ
ājagāma sa duṣṭātmā kopād daiteyagardabhaḥ //

padbhyām ubhābhyāṃ sa tadā paścimābhyāṃ ca taṃ balī
jaghānorasi tābhyāṃ ca sa ca tenāpy agṛhyata //

gṛhītvā bhrāmaṇenaiva cāmbare gatajīvitam
tasminn eva pracikṣepa vegena tṛṇarājani //

tataḥ phalāny anekāni tālāgrān nipatan kharaḥ
pṛthivyāṃ pātayām āsa mahāvāto 'mbudān iva //

anyān apy asya vai jñātīn āgatān daityagardabhān
kṛṣṇaś cikṣepa tālāgre balabhadraś ca līlayā //

kṣaṇenālaṃkṛtā pṛthvī pakvais tālaphalais tadā
daityagardabhadehaiś ca munayaḥ śuśubhe 'dhikam //

tato gāvo nirābādhās tasmiṃs tālavane dvijāḥ
navaśaṣpaṃ sukhaṃ cerur yatra bhuktam abhūt purā //