બ્રહ્મ પુરાણ · અધ્યાય 186

ગાઃ પાલયન્તૌ ચ પુનઃ સહિતૌ રામકેશવૌ
ભ્રમમાણૌ વને તત્ર રમ્યં તાલવનં ગતૌ ॥

તચ્ ચ તાલવનં નિત્યં ધેનુકો નામ દાનવઃ
નૃગોમાંસકૃતાહારઃ સદાધ્યાસ્તે ખરાકૃતિઃ ॥

તત્ર તાલવનં રમ્યં ફલસંપત્સમન્વિતમ્
દૃષ્ટ્વા સ્પૃહાન્વિતા ગોપાઃ ફલાદાને ઽબ્રુવન્ વચઃ ॥

હે રામ હે કૃષ્ણ સદા ધેનુકેનૈવ રક્ષ્યતે
ભૂપ્રદેશો યતસ્ તસ્માત્ ત્યક્તાનીમાનિ સન્તિ વૈ ॥

ફલાનિ પશ્ય તાલાનાં ગન્ધમોદયુતાનિ વૈ
વયમ્ એતાન્ય્ અભીપ્સામઃ પાત્યન્તાં યદિ રોચતે ॥

ઇતિ ગોપકુમારાણાં શ્રુત્વા સંકર્ષણો વચઃ
કૃષ્ણશ્ ચ પાતયામ્ આસ ભુવિ તાલફલાનિ વૈ ॥

તાલાનાં પતતાં શબ્દમ્ આકર્ણ્યાસુરરાટ્ તતઃ
આજગામ સ દુષ્ટાત્મા કોપાદ્ દૈતેયગર્દભઃ ॥

પદ્ભ્યામ્ ઉભાભ્યાં સ તદા પશ્ચિમાભ્યાં ચ તં બલી
જઘાનોરસિ તાભ્યાં ચ સ ચ તેનાપ્ય્ અગૃહ્યત ॥

ગૃહીત્વા ભ્રામણેનૈવ ચામ્બરે ગતજીવિતમ્
તસ્મિન્ન્ એવ પ્રચિક્ષેપ વેગેન તૃણરાજનિ ॥

તતઃ ફલાન્ય્ અનેકાનિ તાલાગ્રાન્ નિપતન્ ખરઃ
પૃથિવ્યાં પાતયામ્ આસ મહાવાતો ઽમ્બુદાન્ ઇવ ॥

અન્યાન્ અપ્ય્ અસ્ય વૈ જ્ઞાતીન્ આગતાન્ દૈત્યગર્દભાન્
કૃષ્ણશ્ ચિક્ષેપ તાલાગ્રે બલભદ્રશ્ ચ લીલયા ॥

ક્ષણેનાલંકૃતા પૃથ્વી પક્વૈસ્ તાલફલૈસ્ તદા
દૈત્યગર્દભદેહૈશ્ ચ મુનયઃ શુશુભે ઽધિકમ્ ॥

તતો ગાવો નિરાબાધાસ્ તસ્મિંસ્ તાલવને દ્વિજાઃ
નવશષ્પં સુખં ચેરુર્ યત્ર ભુક્તમ્ અભૂત્ પુરા ॥