Brahma Purana · Chapter 183

kaṃsas tv athodvignamanāḥ prāha sarvān mahāsurān
pralambakeśipramukhān āhūyāsurapuṃgavān //

he pralamba mahābāho keśin dhenuka pūtane
ariṣṭādyais tathā cānyaiḥ śrūyatāṃ vacanaṃ mama //

māṃ hantum amarair yatnaḥ kṛtaḥ kila durātmabhiḥ
madvīryatāpitān vīrān na tv etān gaṇayāmy aham //

āścaryaṃ kanyayā coktaṃ jāyate daityapuṃgavāḥ
hāsyaṃ me jāyate vīrās teṣu yatnapareṣv api //

tathāpi khalu duṣṭānāṃ teṣām apy adhikaṃ mayā
apakārāya daityendrā yatanīyaṃ durātmanām //

utpannaś cāpi mṛtyur me bhūtabhavyabhavatprabhuḥ
ity etad bālikā prāha devakīgarbhasaṃbhavā //

tasmād bāleṣu paramo yatnaḥ kāryo mahītale
yatrodriktaṃ balaṃ bāle sa hantavyaḥ prayatnataḥ //

ity ājñāpyāsurān kaṃsaḥ praviśyātmagṛhaṃ tataḥ
uvāca vasudevaṃ ca devakīm avirodhataḥ //

yuvayor ghātitā garbhā vṛthaivaite mayādhunā
ko 'py anya eva nāśāya bālo mama samudgataḥ //

tad alaṃ paritāpena nūnaṃ yad bhāvino hi te
arbhakā yuvayoḥ ko vā āyuṣo 'nte na hanyate //

ity āśvāsya vimucyaiva kaṃsas tau paritoṣya ca
antargṛhaṃ dvijaśreṣṭhāḥ praviveśa punaḥ svakam //