Brahma Purana · Chapter 182

yathoktaṃ sā jagaddhātrī devadevena vai purā
ṣaḍgarbhagarbhavinyāsaṃ cakre cānyasya karṣaṇam //

saptame rohiṇīṃ prāpte garbhe garbhe tato hariḥ
lokatrayopakārāya devakyāḥ praviveśa vai //

yoganidrā yaśodāyās tasminn eva tato dine
saṃbhūtā jaṭhare tadvad yathoktaṃ parameṣṭhinā //

tato grahagaṇaḥ samyak pracacāra divi dvijāḥ
viṣṇor aṃśe mahīṃ yāta ṛtavo 'py abhavañ śubhāḥ //

notsehe devakīṃ draṣṭuṃ kaścid apy atitejasā
jājvalyamānāṃ tāṃ dṛṣṭvā manāṃsi kṣobham āyayuḥ //

adṛṣṭāṃ puruṣaiḥ strībhir devakīṃ devatāgaṇāḥ
bibhrāṇāṃ vapuṣā viṣṇuṃ tuṣṭuvus tām aharniśam //

tvaṃ svāhā tvaṃ svadhā vidyā sudhā tvaṃ jyotir eva ca
tvaṃ sarvalokarakṣārtham avatīrṇā mahītale //

prasīda devi sarvasya jagatas tvaṃ śubhaṃ kuru
prītyarthaṃ dhārayeśānaṃ dhṛtaṃ yenākhilaṃ jagat //

evaṃ saṃstūyamānā sā devair devam adhārayat
garbheṇa puṇḍarīkākṣaṃ jagatāṃ trāṇakāraṇam //

tato 'khilajagatpadma bodhāyācyutabhānunā
devakyāḥ pūrvasaṃdhyāyām āvirbhūtaṃ mahātmanā //

madhyarātre 'khilādhāre jāyamāne janārdane
mandaṃ jagarjur jaladāḥ puṣpavṛṣṭimucaḥ surāḥ //

phullendīvarapattrābhaṃ caturbāhum udīkṣya tam
śrīvatsavakṣasaṃ jātaṃ tuṣṭāvānakadundubhiḥ //

abhiṣṭūya ca taṃ vāgbhiḥ prasannābhir mahāmatiḥ
vijñāpayām āsa tadā kaṃsād bhīto dvijottamāḥ //

jñāto 'si devadeveśa śaṅkhacakragadādhara
divyaṃ rūpam idaṃ deva prasādenopasaṃhara //

adyaiva deva kaṃso 'yaṃ kurute mama yātanām
avatīrṇam iti jñātvā tvām asmin mandire mama //

yo 'nantarūpo 'khilaviśvarūpo garbhe 'pi lokān vapuṣā bibharti
prasīdatām eṣa sa devadevaḥ svamāyayāviṣkṛtabālarūpaḥ

upasaṃhara sarvātman rūpam etac caturbhujam
jānātu māvatāraṃ te kaṃso 'yaṃ ditijāntaka //

stuto 'haṃ yat tvayā pūrvaṃ putrārthinyā tad adya te
saphalaṃ devi saṃjātaṃ jāto 'haṃ yat tavodarāt //

ity uktvā bhagavāṃs tūṣṇīṃ babhūva munisattamāḥ
vasudevo 'pi taṃ rātrāv ādāya prayayau bahiḥ //

mohitāś cābhavaṃs tatra rakṣiṇo yoganidrayā
mathurādvārapālāś ca vrajaty ānakadundubhau //

varṣatāṃ jaladānāṃ ca tat toyam ulbaṇaṃ niśi
saṃchādya taṃ yayau śeṣaḥ phaṇair ānakadundubhim //

yamunāṃ cātigambhīrāṃ nānāvartaśatākulām
vasudevo vahan viṣṇuṃ jānumātravahāṃ yayau //

kaṃsasya karam ādāya tatraivābhyāgatāṃs taṭe
nandādīn gopavṛddhāṃś ca yamunāyāṃ dadarśa saḥ //

tasmin kāle yaśodāpi mohitā yoganidrayā
tām eva kanyāṃ munayaḥ prāsūta mohite jane //

vasudevo 'pi vinyasya bālam ādāya dārikām
yaśodāśayane tūrṇam ājagāmāmitadyutiḥ //

dadarśa ca vibuddhvā sā yaśodā jātam ātmajam
nīlotpaladalaśyāmaṃ tato 'tyarthaṃ mudaṃ yayau //

ādāya vasudevo 'pi dārikāṃ nijamandiram
devakīśayane nyasya yathāpūrvam atiṣṭhata //

tato bāladhvaniṃ śrutvā rakṣiṇaḥ sahasotthitāḥ
kaṃsam āvedayām āsur devakīprasavaṃ dvijāḥ //

kaṃsas tūrṇam upetyaināṃ tato jagrāha bālikām
muñca muñceti devakyā sannakaṇṭhaṃ nivāritaḥ //

cikṣepa ca śilāpṛṣṭhe sā kṣiptā viyati sthitim
avāpa rūpaṃ ca mahat sāyudhāṣṭamahābhujam
prajahāsa tathaivoccaiḥ kaṃsaṃ ca ruṣitābravīt //

kiṃ mayākṣiptayā kaṃsa jāto yas tvāṃ haniṣyati
sarvasvabhūto devānām āsīn mṛtyuḥ purā sa te
tad etat saṃpradhāryāśu kriyatāṃ hitam ātmanaḥ //

ity uktvā prayayau devī divyasraggandhabhūṣaṇā
paśyato bhojarājasya stutā siddhair vihāyasā //