બ્રહ્મ પુરાણ · અધ્યાય 183

કંસસ્ ત્વ્ અથોદ્વિગ્નમનાઃ પ્રાહ સર્વાન્ મહાસુરાન્
પ્રલમ્બકેશિપ્રમુખાન્ આહૂયાસુરપુંગવાન્ ॥

હે પ્રલમ્બ મહાબાહો કેશિન્ ધેનુક પૂતને
અરિષ્ટાદ્યૈસ્ તથા ચાન્યૈઃ શ્રૂયતાં વચનં મમ ॥

માં હન્તુમ્ અમરૈર્ યત્નઃ કૃતઃ કિલ દુરાત્મભિઃ
મદ્વીર્યતાપિતાન્ વીરાન્ ન ત્વ્ એતાન્ ગણયામ્ય્ અહમ્ ॥

આશ્ચર્યં કન્યયા ચોક્તં જાયતે દૈત્યપુંગવાઃ
હાસ્યં મે જાયતે વીરાસ્ તેષુ યત્નપરેષ્વ્ અપિ ॥

તથાપિ ખલુ દુષ્ટાનાં તેષામ્ અપ્ય્ અધિકં મયા
અપકારાય દૈત્યેન્દ્રા યતનીયં દુરાત્મનામ્ ॥

ઉત્પન્નશ્ ચાપિ મૃત્યુર્ મે ભૂતભવ્યભવત્પ્રભુઃ
ઇત્ય્ એતદ્ બાલિકા પ્રાહ દેવકીગર્ભસંભવા ॥

તસ્માદ્ બાલેષુ પરમો યત્નઃ કાર્યો મહીતલે
યત્રોદ્રિક્તં બલં બાલે સ હન્તવ્યઃ પ્રયત્નતઃ ॥

ઇત્ય્ આજ્ઞાપ્યાસુરાન્ કંસઃ પ્રવિશ્યાત્મગૃહં તતઃ
ઉવાચ વસુદેવં ચ દેવકીમ્ અવિરોધતઃ ॥

યુવયોર્ ઘાતિતા ગર્ભા વૃથૈવૈતે મયાધુના
કો ઽપ્ય્ અન્ય એવ નાશાય બાલો મમ સમુદ્ગતઃ ॥

તદ્ અલં પરિતાપેન નૂનં યદ્ ભાવિનો હિ તે
અર્ભકા યુવયોઃ કો વા આયુષો ઽન્તે ન હન્યતે ॥

ઇત્ય્ આશ્વાસ્ય વિમુચ્યૈવ કંસસ્ તૌ પરિતોષ્ય ચ
અન્તર્ગૃહં દ્વિજશ્રેષ્ઠાઃ પ્રવિવેશ પુનઃ સ્વકમ્ ॥