Brahma Purana · Chapter 177

evaṃ vo 'nantamāhātmyaṃ kṣetraṃ ca puruṣottamam
bhuktimuktipradaṃ nṝṇāṃ mayā proktaṃ sudurlabham //

yatrāste puṇḍarīkākṣaḥ śaṅkhacakragadādharaḥ
pītāmbaradharaḥ kṛṣṇaḥ kaṃsakeśiniṣūdanaḥ //

ye tatra kṛṣṇaṃ paśyanti surāsuranamaskṛtam
saṃkarṣaṇaṃ subhadrāṃ ca dhanyās te nātra saṃśayaḥ //

trailokyādhipatiṃ devaṃ sarvakāmaphalapradam
ye dhyāyanti sadā kṛṣṇaṃ muktās te nātra saṃśayaḥ //

kṛṣṇe ratāḥ kṛṣṇam anusmaranti rātrau ca kṛṣṇaṃ punar utthitā ye
te bhinnadehāḥ praviśanti kṛṣṇaṃ havir yathā mantrahutaṃ hutāśam

tasmāt sadā muniśreṣṭhāḥ kṛṣṇaḥ kamalalocanaḥ
tasmin kṣetre prayatnena draṣṭavyo mokṣakāṅkṣibhiḥ //

śayanotthāpane kṛṣṇaṃ ye paśyanti manīṣiṇaḥ
halāyudhaṃ subhadrāṃ ca hareḥ sthānaṃ vrajanti te //

sarvakāle 'pi ye bhaktyā paśyanti puruṣottamam
rauhiṇeyaṃ subhadrāṃ ca viṣṇulokaṃ vrajanti te //

āste yaś caturo māsān vārṣikān puruṣottame
pṛthivyās tīrthayātrāyāḥ phalaṃ prāpnoti cādhikam //

ye sarvakālaṃ tatraiva nivasanti manīṣiṇaḥ
jitendriyā jitakrodhā labhante tapasaḥ phalam //

tapas taptvānyatīrtheṣu varṣāṇām ayutaṃ naraḥ
yad āpnoti tad āpnoti māsena puruṣottame //

tapasā brahmacaryeṇa saṅgatyāgena yat phalam
tat phalaṃ satataṃ tatra prāpnuvanti manīṣiṇaḥ //

sarvatīrtheṣu yat puṇyaṃ snānadānena kīrtitam
tat phalaṃ satataṃ tatra prāpnuvanti manīṣiṇaḥ //

samyak tīrthena yat proktaṃ vratena niyamena ca
tat phalaṃ labhate tatra pratyahaṃ prayataḥ śuciḥ //

yas tu nānāvidhair yajñair yat phalaṃ labhate naraḥ
tat phalaṃ labhate tatra pratyahaṃ saṃyatendriyaḥ //

dehaṃ tyajanti puruṣās tatra ye puruṣottame
kalpavṛkṣaṃ samāsādya muktās te nātra saṃśayaḥ //

vaṭasāgarayor madhye ye tyajanti kalevaram
te durlabhaṃ paraṃ mokṣaṃ prāpnuvanti na saṃśayaḥ //

anicchann api yas tatra prāṇāṃs tyajati mānavaḥ
so 'pi duḥkhavinirmukto muktiṃ prāpnoti durlabhām //

kṛmikīṭapataṃgādyās tiryagyonigatāś ca ye
tatra dehaṃ parityajya te yānti paramāṃ gatim //

bhrāntiṃ lokasya paśyadhvam anyatīrthaṃ prati dvijāḥ
puruṣākhyena yat prāptam anyatīrthaphalādikam //

sakṛt paśyati yo martyaḥ śraddhayā puruṣottamam
puruṣāṇāṃ sahasreṣu sa bhaved uttamaḥ pumān //

prakṛteḥ sa paro yasmāt puruṣād api cottamaḥ
tasmād vede purāṇe ca loke 'smin puruṣottamaḥ //

yo 'sau purāṇe vedānte paramātmety udāhṛtaḥ
āste viśvopakārāya tenāsau puruṣottamaḥ //

pāthe śmaśāne gṛhamaṇḍape vā rathyāpradeśeṣv api yatra kutra
icchann anicchann api tatra dehaṃ saṃtyajya mokṣaṃ labhate manuṣyaḥ

tasmāt sarvaprayatnena tasmin kṣetre dvijottamāḥ
dehatyāgo naraiḥ kāryaḥ samyaṅ mokṣābhikāṅkṣibhiḥ //

puruṣākhyasya māhātmyaṃ na bhūtaṃ na bhaviṣyati
tyaktvā yatra naro dehaṃ muktiṃ prāpnoti durlabhām //

guṇānām ekadeśo 'yaṃ mayā kṣetrasya kīrtitaḥ
kaḥ samastān guṇān vaktuṃ śakto varṣaśatair api //

yadi yūyaṃ muniśreṣṭhā mokṣam icchatha śāśvatam
tasmin kṣetravare puṇye nivasadhvam atandritāḥ //

te tasya vacanaṃ śrutvā brahmaṇo 'vyaktajanmanaḥ
nivāsaṃ cakrire tatra avāpuḥ paramaṃ padam //

tasmād yūyaṃ prayatnena nivasadhvaṃ dvijottamāḥ
puruṣākhye vare kṣetre yadi muktim abhīpsatha //