Brahma Purana · Chapter 176

nahi nas tṛptir astīha śṛṇvatāṃ bhagavatkathām
punar eva paraṃ guhyaṃ vaktum arhasy aśeṣataḥ //

anantavāsudevasya na samyag varṇitaṃ tvayā
śrotum icchāmahe deva vistareṇa vadasva naḥ //

pravakṣyāmi muniśreṣṭhāḥ sārāt sārataraṃ param
anantavāsudevasya māhātmyaṃ bhuvi durlabham //

ādikalpe purā viprās tv aham avyaktajanmavān
viśvakarmāṇam āhūya vacanaṃ proktavān idam //

variṣṭhaṃ devaśilpīndraṃ viśvakarmāgrakarmiṇam
pratimāṃ vāsudevasya kuru śailamayīṃ bhuvi //

yāṃ prekṣya vidhivad bhaktāḥ sendrā vai mānuṣādayaḥ
yena dānavarakṣobhyo vijñāya sumahad bhayam //

tridivaṃ samanuprāpya sumeruśikharaṃ ciram
vāsudevaṃ samārādhya nirātaṅkā vasanti te //

mama tad vacanaṃ śrutvā viśvakarmā tu tatkṣaṇāt
cakāra pratimāṃ śuddhāṃ śaṅkhacakragadādharām //

sarvalakṣaṇasaṃyuktāṃ puṇḍarīkāyatekṣaṇām
śrīvatsalakṣmasaṃyuktām atyugrāṃ pratimottamām //

vanamālāvṛtoraskāṃ mukuṭāṅgadadhāriṇīm
pītavastrāṃ supīnāṃsāṃ kuṇḍalābhyām alaṃkṛtām //

evaṃ sā pratimā divyā guhyamantrais tadā svayam
pratiṣṭhākālam āsādya mayāsau nirmitā purā //

tasmin kāle tadā śakro devarāṭ khecaraiḥ saha
jagāma brahmasadanam āruhya gajam uttamam //

prasādya pratimāṃ śakraḥ snānadānaiḥ punaḥ punaḥ
pratimāṃ tāṃ samārādhya svapuraṃ punar āgamat //

tāṃ samārādhya suciraṃ yatavākkāyamānasaḥ
vṛtrādyān asurān krūrān namucipramukhān sa ca //

nihatya dānavān bhīmān bhuktavān bhuvanatrayam
dvitīye ca yuge prāpte tretāyāṃ rākṣasādhipaḥ //

babhūva sumahāvīryo daśagrīvaḥ pratāpavān
daśa varṣasahasrāṇi nirāhāro jitendriyaḥ //

cacāra vratam atyugraṃ tapaḥ paramaduścaram
tapasā tena tuṣṭo 'haṃ varaṃ tasmai pradattavān //

avadhyaḥ sarvadevānāṃ sa daityoragarakṣasām
śāpapraharaṇair ugrair avadhyo yamakiṃkaraiḥ //

varaṃ prāpya tadā rakṣo yakṣān sarvagaṇān imān
dhanādhyakṣaṃ vinirjitya śakraṃ jetuṃ samudyataḥ //

saṃgrāmaṃ sumahāghoraṃ kṛtvā devaiḥ sa rākṣasaḥ
devarājaṃ vinirjitya tadā indrajiteti vai //

rākṣasas tatsuto nāma meghanādaḥ pralabdhavān
amarāvatīṃ tataḥ prāpya devarājagṛhe śubhe //

dadarśāñjanasaṃkāśāṃ rāvaṇas tu balānvitaḥ
pratimāṃ vāsudevasya sarvalakṣaṇasaṃyutām //

śrīvatsalakṣmasaṃyuktāṃ padmapattrāyatekṣaṇām
vanamālāvṛtoraskāṃ mukuṭāṅgadabhūṣitām //

śaṅkhacakragadāhastāṃ pītavastrāṃ caturbhujām
sarvābharaṇasaṃyuktāṃ sarvakāmaphalapradām //

vihāya ratnasaṃghāṃś ca pratimāṃ śubhalakṣaṇām
puṣpakeṇa vimānena laṅkāṃ prāsthāpayad drutam //

purādhyakṣaḥ sthitaḥ śrīmān dharmātmā sa vibhīṣaṇaḥ
rāvaṇasyānujo mantrī nārāyaṇaparāyaṇaḥ //

dṛṣṭvā tāṃ pratimāṃ divyāṃ devendrabhavanacyutām
romāñcitatanur bhūtvā vismayaṃ samapadyata //

praṇamya śirasā devaṃ prahṛṣṭenāntarātmanā
adya me saphalaṃ janma adya me saphalaṃ tapaḥ //

ity uktvā sa tu dharmātmā praṇipatya muhur muhuḥ
jyeṣṭhaṃ bhrātaram āsādya kṛtāñjalir abhāṣata //

rājan pratimayā tvaṃ me prasādaṃ kartum arhasi
yām ārādhya jagannātha nistareyaṃ bhavārṇavam //

bhrātur vacanam ākarṇya rāvaṇas taṃ tadābravīt
gṛhāṇa pratimāṃ vīra tv anayā kiṃ karomy aham //

svayaṃbhuvaṃ samārādhya trailokyaṃ vijaye tv aham
nānāścaryamayaṃ devaṃ sarvabhūtabhavodbhavam //

vibhīṣaṇo mahābuddhis tadā tāṃ pratimāṃ śubhām
śatam aṣṭottaraṃ cābdaṃ samārādhya janārdanam //

ajarāmaraṇaṃ prāptam aṇimādiguṇair yutam
rājyaṃ laṅkādhipatyaṃ ca bhogān bhuṅkte yathepsitān //

aho no vismayo jātaḥ śrutvedaṃ paramāmṛtam
anantavāsudevasya saṃbhavaṃ bhuvi durlabham //

śrotum icchāmahe deva vistareṇa yathātatham
tasya devasya māhātmyaṃ vaktum arhasy aśeṣataḥ //

tadā sa rākṣasaḥ krūro devagandharvakiṃnarān
lokapālān samanujān munisiddhāṃś ca pāpakṛt //

vijitya samare sarvān ājahāra tadaṅganāḥ
saṃsthāpya nagarīṃ laṅkāṃ punaḥ sītārthamohitaḥ //

śaṅkito mṛgarūpeṇa sauvarṇena ca rāvaṇaḥ
tataḥ kruddhena rāmeṇa raṇe saumitriṇā saha //

rāvaṇasya vadhārthāya hatvā vāliṃ manojavam
abhiṣiktaś ca sugrīvo yuvarājo 'ṅgadas tathā //

hanumān nalanīlaś ca jāmbavān panasas tathā
gavayaś ca gavākṣaś ca pāṭhīnaḥ paramaujasaḥ //

etaiś cānyaiś ca bahubhir vānaraiḥ samahābalaiḥ
samāvṛto mahāghorai rāmo rājīvalocanaḥ //

girīṇāṃ sarvasaṃghātaiḥ setuṃ baddhvā mahodadhau
balena mahatā rāmaḥ samuttīrya mahodadhim //

saṃgrāmam atulaṃ cakre rakṣogaṇasamanvitaḥ
yamahastaṃ prahastaṃ ca nikumbhaṃ kumbham eva ca //

narāntakaṃ mahāvīryaṃ tathā caiva yamāntakam
mālāḍhyaṃ mālikāḍhyaṃ ca hatvā rāmas tu vīryavān //

punar indrajitaṃ hatvā kumbhakarṇaṃ sarāvaṇam
vaidehīṃ cāgnināśodhya dattvā rājyaṃ vibhīṣaṇe //

vāsudevaṃ samādāya yānaṃ puṣpakam āruhat
līlayā samanuprāpad ayodhyāṃ pūrvapālitām //

kaniṣṭhaṃ bharataṃ snehāc chatrughnaṃ bhaktavatsalaḥ
abhiṣicya tadā rāmaḥ sarvarājye 'dhirājavat //

purātanīṃ svamūrtiṃ ca samārādhya tato hariḥ
daśa varṣasahasrāṇi daśa varṣaśatāni ca //

bhuktvā sāgaraparyantāṃ medinīṃ sa tu rāghavaḥ
rājyam āsādya sugatiṃ vaiṣṇavaṃ padam āviśat //

tāṃ cāpi pratimāṃ rāmaḥ samudreśāya dattavān
dhanyo rakṣayitāsi tvaṃ toyaratnasamanvitaḥ //

dvāparaṃ yugam āsādya yadā devo jagatpatiḥ
dharaṇyāś cānurodhena bhāvaśaithilyakāraṇāt //

avatīrṇaḥ sa bhagavān vasudevakule prabhuḥ
kaṃsādīnāṃ vadhārthāya saṃkarṣaṇasahāyavān //

tadā tāṃ pratimāṃ viprāḥ sarvavāñchāphalapradām
sarvalokahitārthāya kasyacit kāraṇāntare //

tasmin kṣetravare puṇye durlabhe puruṣottame
ujjahāra svayaṃ toyāt samudraḥ saritāṃ patiḥ //

tadā prabhṛti tatraiva kṣetre muktiprade dvijāḥ
āste sa devo devānāṃ sarvakāmaphalapradaḥ //

ye saṃśrayanti cānantaṃ bhaktyā sarveśvaraṃ prabhum
vāṅmanaḥkarmabhir nityaṃ te yānti paramaṃ padam //

dṛṣṭvānantaṃ sakṛd bhaktyā saṃpūjya praṇipatya ca
rājasūyāśvamedhābhyāṃ phalaṃ daśaguṇaṃ labhet //

sarvakāmasamṛddhena kāmagena suvarcasā
vimānenārkavarṇena kiṅkiṇījālamālinā //

triḥsaptakulam uddhṛtya divyastrīgaṇasevitaḥ
upagīyamāno gandharvair naro viṣṇupuraṃ vrajet //

tatra bhuktvā varān bhogāñ jarāmaraṇavarjitaḥ
divyarūpadharaḥ śrīmān yāvad ābhūtasaṃplavam //

puṇyakṣayād ihāyātaś caturvedī dvijottamaḥ
vaiṣṇavaṃ yogam āsthāya tato mokṣam avāpnuyāt //

evaṃ mayā tv ananto 'sau kīrtito munisattamāḥ
kaḥ śaknoti guṇān vaktuṃ tasya varṣaśatair api //