Brahma Purana · Chapter 174

sā saṃgatā pūrvam apāṃpatiṃ taṃ gaṅgā surāṇām api vandanīyā
devaiś ca sarvair anugamyamānā saṃstūyamānā munibhir marudbhiḥ

vasiṣṭhajābālisayājñavalkya kratvaṅgirodakṣamarīcivaiṣṇavāḥ
śātātapaḥ śaunakadevarāta bhṛgvagniveśyātrimarīcimukhyāḥ

sudhūtapāpā manugautamādayaḥ sakauśikās tumbaruparvatādyāḥ
agastyamārkaṇḍasapippalādyāḥ sagālavā yogaparāyaṇāś ca

savāmadevāṅgiraso 'tha bhārgavāḥ smṛtipravīṇāḥ śrutibhir manojñāḥ
sarve purāṇārthavido bahujñās te gautamīṃ devanadīṃ tu gatvā

stoṣyanti mantraiḥ śrutibhiḥ prabhūtair hṛdyaiś ca tuṣṭair muditair manobhiḥ
tāṃ saṃgatāṃ vīkṣya śivo hariś ca ātmānam ādarśayatāṃ munibhyaḥ

ādityā vasavo rudrā maruto lokapālakāḥ
kṛtāñjalipuṭāḥ sarve stuvanti hariśaṃkarau //

saṃgameṣu prasiddheṣu nityaṃ saptasu nārada
samudrasya ca gaṅgāyā nityaṃ devau pratiṣṭhitau //

gautameśvara ākhyāto yatra devo maheśvaraḥ
nityaṃ saṃnihitas tatra mādhavo ramayā saha //

brahmeśvara iti khyāto mayaiva sthāpitaḥ śivaḥ
lokānām upakārārtham ātmanaḥ kāraṇāntare //

cakrapāṇir iti khyātaḥ stuto devair mayā saha
tatra saṃnihito viṣṇur devaiḥ saha marudgaṇaiḥ //

aindratīrtham iti khyātaṃ tad eva hayamūrdhakam
hayamūrdhā tatra viṣṇus tanmūrdhani surā api
somatīrtham iti khyātaṃ yatra someśvaraḥ śivaḥ //

indrasya somaśravaso devaiś ca ṛṣibhis tathā
prārthitaḥ soma evādāv indrāyendo parisrava //

sapta diśo nānāsūryāḥ sapta hotāra ṛtvijaḥ
devā ādityā ye sapta tebhiḥ somābhirakṣa na //

yat te rājañ chṛtaṃ havis tena somābhirakṣa naḥ
arātīvā mā nas tārīn mo ca naḥ kiṃcanāmamad //

ṛṣe mantrakṛtāṃ stomaiḥ kaśyapodvardhayan giraḥ
somaṃ namasya rājānaṃ yo jajñe vīrudhāṃ patir //

kārur ahaṃ tato bhiṣag upalaprakṣiṇī nanā
nānādhiyo vasūyavo 'nu gā iva tasthima //

evam uktvā ca ṛṣibhiḥ somaṃ prāpya ca vajriṇe
tebhyo dattvā tato yajñaḥ pūrṇo jātaḥ śatakratoḥ //

tat somatīrtham ākhyātam āgneyaṃ puratas tu tat
agnir iṣṭvā mahāyajñair mām ārādhya manīṣitam //

saṃprāptavān matprasādād ahaṃ tatraiva nityaśaḥ
sthito lokopakārārthaṃ tatra viṣṇuḥ śivas tathā //

tasmād āgneyam ākhyātam ādityaṃ tadanantaram
yatrādityo vedamayo nityam eti upāsitum //

rūpāntareṇa madhyāhne draṣṭuṃ māṃ śaṃkaraṃ harim
namaskāryas tatra sadā madhyāhne sakalo janaḥ //

rūpeṇa kena savitā samāyātīty aniścayāt
tasmād ādityam ākhyātaṃ bārhaspatyam anantaram //

bṛhaspatiḥ suraiḥ pūjāṃ tasmāt tīrthād avāpa ha
īje ca yajñān vividhān bārhaspatyaṃ tato viduḥ //

tattīrthasmaraṇād eva grahaśāntir bhaviṣyati
tasmād apy aparaṃ tīrtham indragope nagottame //

pratiṣṭhitaṃ mahāliṅgaṃ kasmiṃścit kāraṇāntare
himālayena tat tīrtham adritīrthaṃ tad ucyate //

tatra snānaṃ ca dānaṃ ca sarvakāmapradaṃ śubham
evaṃ sā gautamī gaṅgā brahmādreś ca viniḥsṛtā //

yāvat sāgaragā devī tatra tīrthāni kānicit
saṃkṣepeṇa mayoktāni rahasyāni śubhāni ca //

vede purāṇe ṛṣibhiḥ prasiddhā yā gautamī lokanamaskṛtā ca
vaktuṃ kathaṃ tām atisuprabhāvām aśeṣato nārada kasya śaktiḥ

bhaktyā pravṛttasya yathākathaṃcin naivāparādho 'sti na saṃśayo 'tra
tasmāc ca diṅmātramatiprayāsāt saṃsūcitaṃ lokahitāya tasyāḥ

kas tasyāḥ pratitīrthaṃ tu prabhāvaṃ vaktum īśvaraḥ
api lakṣmīpatir viṣṇur alaṃ someśvaraḥ śivaḥ //

kvacit kasmiṃś ca tīrthāni kālayoge bhavanti hi
guṇavanti mahāprājña gautamī tu sadā nṛṇām //

sarvatra sarvadā puṇyā ko nv asyā guṇakīrtanam
vaktuṃ śaktas tatas tasyai nama ity eva yujyate //