Brahma Purana · Chapter 172

sāmudraṃ tīrtham ākhyātaṃ sarvatīrthaphalapradam
tasya svarūpaṃ vakṣyāmi śṛṇu nārada tanmanāḥ //

visṛṣṭā gautamenāsau gaṅgā pāpapraṇāśanī
lokānām upakārārthaṃ prāyāt pūrvārṇavaṃ prati //

āgacchantī devanadī kamaṇḍaludhṛtā mayā
śirasā ca dhṛtā devī śaṃbhunā paramātmanā //

viṣṇupādāt prasūtāṃ tāṃ brāhmaṇena mahātmanā
ānītāṃ martyabhavanaṃ smaraṇād aghanāśanīm //

guror gurutamāṃ sindhur dṛṣṭvā kṛtyam acintayat
yā vandyā jagatām īśā brahmeśādyair namaskṛtā //

tām ahaṃ pratigaccheyaṃ no cet syād dharmadūṣaṇam
āgacchantaṃ mahātmānaṃ yo mohān nopatiṣṭhate //

na tasya kopi trātāsti pāpino lokayor dvayoḥ
evaṃ vimṛśya ratneśo mūrtimān vinayānvitaḥ
kṛtāñjalipuṭo gaṅgām āhedaṃ saritāṃpatiḥ //

rasātalagataṃ vāri pṛthivyāṃ yan nabhastale
tan mām evātra viśatu nāhaṃ vakṣyāmi kiṃcana //

mayi ratnāni pīyūṣaṃ parvatā rākṣasāsurāḥ
etān apy akhilān anyān bhīmān saṃdhārayāmy aham //

mamāntaḥ kamalāyukto viṣṇuḥ svapiti nityadā
mamāśakyaṃ na kimapi vidyate sacarācare //

mahaty abhyāgate kuryāt pratyutthānaṃ na yo madāt
sa dharmādiparibhraṣṭo nirayaṃ tu samāpnuyāt //

na tān me bibhrataḥ khedo vināgastyaparābhavāt
kiṃ tu tvaṃ gauraveṇaiṣām atiriktā tatas tv aham //

bravīmi devi gaṅge māṃ tvaṃ sāmyāt saṃgatā bhava
naikarūpām ahaṃ śaktaḥ saṃgantuṃ bahudhā yadi //

saṅgam eṣyasi devi tvaṃ saṃgacche 'haṃ na cānyathā
gaṅge sameṣyasi yadi bahudhā tad vicāraye //

tam evaṃvādinaṃ sindhum apām īśaṃ tadābravīt
gaṅgā sā gautamī devī kuru caitad vaco mama //

saptarṣīṇāṃ ca yā bhāryā arundhatipurogamāḥ
bhartṛbhiḥ sahitāḥ sarvā ānaya tvaṃ tadā tv aham //

alpabhūtā bhaviṣyāmi tataḥ syāṃ tava saṃgatā
tathety uktvā saptarṣīṇāṃ bhāryābhir ṛṣibhir vṛtaḥ //

ānayām āsa tāṃ devī saptadhā sā vyabhajyata
sā ceyaṃ gautamī gaṅgā saptadhā sāgaraṃ gatā //

saptarṣīṇāṃ tu nāmnā tu sapta gaṅgās tato 'bhavan
tatra snānaṃ ca dānaṃ ca śravaṇaṃ paṭhanaṃ tathā //

smaraṇaṃ cāpi yad bhaktyā sarvakāmapradaṃ bhavet
nāsmād anyat paraṃ tīrthaṃ samudrād bhuvanatraye
pāpahānau bhuktimukti prāptau ca manaso mude //