Brahma Purana · Chapter 166

patatritīrtham ākhyātaṃ rogaghnaṃ pāpanāśanam
tasya śravaṇamātreṇa kṛtakṛtyo bhaven naraḥ //

babhūvatuḥ kaśyapasya sutāv aruṇāv īśvarau
saṃpātiś ca jaṭāyuś ca saṃbhavetāṃ tadanvaye //

tārkṣyaprajāpateḥ putrāv aruṇo garuḍas tathā
tadanvaye saṃbhūtaḥ ca saṃpātiḥ patagottamaḥ //

jaṭāyur iti vikhyāto hy aparaḥ sodaro 'nujaḥ
anyonyaspardhayā yuktāv unmattau svabalena tau //

saṃjagmatur dinakaraṃ namaskartuṃ vihāyasi
yāvat sūryasya sāmīpyaṃ prāptau tau vihagottamau //

dagdhapakṣāv ubhau śrāntau patitau girimūrdhani
bāndhavau patitau dṛṣṭvā niśceṣṭau gatacetasau //

tāvad duḥkhābhibhūto 'sāv aruṇaḥ prāha bhāskaram
tau dṛṣṭvā tv aruṇaḥ sūry.am prāhedaṃ patitau bhuvi
āśvāsayaitau tigmāṃśo yāvan naitau mariṣyataḥ //

tathety uktvā dinakaro jīvayām āsa tau khagau
garuḍo 'pi tayoḥ śrutvā avasthāṃ saha viṣṇunā //

āgatyāśvāsayām āsa sukhaṃ cakre ca nārada
sarva eva tadā jagmur gaṅgāṃ tāpāpanuttaye //

jaṭāyuś cāruṇaś caiva saṃpātir garuḍas tathā
sūryo viṣṇus tat prayayau tat tīrthaṃ bahupuṇyadam //

patatritīrtham ākhyātaṃ viṣaghnaṃ sarvakāmadam
svayaṃ sūryas tathā viṣṇuḥ suparṇenāruṇena ca //

āsate gautamītīre tathaiva vṛṣabhadhvajaḥ
trayāṇām api devānāṃ sthites tat tīrtham uttamam //

tatra snātvā śucir bhūtvā namaskuryāt surān imān
ādhivyādhivinirmuktaḥ sa paraṃ saukhyam āpnuyāt //