Brahma Purana · Chapter 160

devāgamaṃ nāma tīrthaṃ sarvakāmapradaṃ śivam
bhuktimuktipradaṃ nṝṇāṃ pitṝṇāṃ tṛptikārakam //

tatra vṛttaṃ samākhyāsye tava yatnena nārada
devānām asurāṇāṃ ca spardhābhūd dhanahetave //

svargaḥ surāṇām abhavad asurāṇām ilābhavat
karmabhūmim avaṣṭabhya asurāḥ sarvato 'bhavan //

devānāṃ yajñabhāgāṃś ca dātṝn ghnanty asurās tataḥ
tataḥ suragaṇāḥ sarve yajñabhāgair vinā kṛtāḥ //

vyathitā mām upājagmuḥ kiṃ kṛtyam iti cābruvan
mayā coktāḥ suragaṇā yuddhe jitvāsurān balāt //

bhuvaṃ prāpsyatha karmāṇi havīṃṣi ca yaśāṃsi ca
tathety uktvā gatā devā bhūmiṃ te samarārthinaḥ //

daityāś ca dānavāś caiva rākṣasā baladarpitāḥ
ekībhūtvā yayus te 'pi jayino yuddhakāṅkṣiṇaḥ //

ahir vṛtro balis tvāṣṭrir namuciḥ śambaro mayaḥ
ete cānye ca bahavo yoddhāro baladarpitāḥ //

agnir indro 'tha varuṇas tvaṣṭā pūṣā tathāśvinau
maruto lokapālāś ca nānāyuddhaviśāradāḥ //

te dānavāḥ sarva eva yāmyāṃ vai diśi saṃgare
akurvanta mahāyatnaṃ dakṣiṇārṇavasaṃsthitāḥ //

trikūṭaḥ parvataśreṣṭho rākṣasānāṃ purābhavat
tadvanena yayuḥ sarve taiḥ sārdhaṃ dakṣiṇārṇavam //

sarveṣāṃ melanaṃ yatra parvato malayas tu saḥ
malayasyāpi deśo 'sau devārīṇām abhūt tadā //

devānāṃ gautamītīre tatra saṃnihitaḥ śivaḥ
iti teṣāṃ samāyogo devānām abhavat kila //

devāḥ svaratham ārūḍhās tatra tatra samāgaman
gautamyāḥ saridambāyāḥ puline vimalāśayāḥ //

prasannābhīṣṭadā yā syāt pitṝṇām akhilasya tu
tato devagaṇāḥ sarve stutvā devaṃ maheśvaram
abhayaṃ cintayām āsus te sarve 'tha parasparam //

atrāpy upāyaḥ ko 'smākaṃ nirjitānāṃ parair haṭhāt
ekam evātra naḥ śreyo vijayo vāthavā mṛtiḥ
sapatnair abhibhūtānāṃ jīvitaṃ dhiṅ manasvinām //

etasminn antare putra vāg uvācāśarīriṇī //

kleśenālaṃ suragaṇā gautamīm āśu gacchata
bhaktyā hariharau tatra samārādhayateśvarau //

godāvaryās tayoś caiva prasādāt kiṃ tu duṣkaram //

prasannābhyāṃ harīśābhyāṃ devā jayam abhīpsitam
avāpya sarvato jagmuḥ pālayanto divaukasaḥ //

yatra devāgamo jātas tat tīrthaṃ tena viśrutam
devāgamaṃ praśaṃsanti munayas tattvadarśinaḥ //

tatrāśītisahasrāṇi śivaliṅgāni nārada
devāgamaḥ parvato 'sau priya ity api kathyate
tataḥ prabhṛti tat tīrthaṃ devapriyam ato viduḥ //