બ્રહ્મ પુરાણ · અધ્યાય 160

દેવાગમં નામ તીર્થં સર્વકામપ્રદં શિવમ્
ભુક્તિમુક્તિપ્રદં નૄણાં પિતૄણાં તૃપ્તિકારકમ્ ॥

તત્ર વૃત્તં સમાખ્યાસ્યે તવ યત્નેન નારદ
દેવાનામ્ અસુરાણાં ચ સ્પર્ધાભૂદ્ ધનહેતવે ॥

સ્વર્ગઃ સુરાણામ્ અભવદ્ અસુરાણામ્ ઇલાભવત્
કર્મભૂમિમ્ અવષ્ટભ્ય અસુરાઃ સર્વતો ઽભવન્ ॥

દેવાનાં યજ્ઞભાગાંશ્ ચ દાતૄન્ ઘ્નન્ત્ય્ અસુરાસ્ તતઃ
તતઃ સુરગણાઃ સર્વે યજ્ઞભાગૈર્ વિના કૃતાઃ ॥

વ્યથિતા મામ્ ઉપાજગ્મુઃ કિં કૃત્યમ્ ઇતિ ચાબ્રુવન્
મયા ચોક્તાઃ સુરગણા યુદ્ધે જિત્વાસુરાન્ બલાત્ ॥

ભુવં પ્રાપ્સ્યથ કર્માણિ હવીંષિ ચ યશાંસિ ચ
તથેત્ય્ ઉક્ત્વા ગતા દેવા ભૂમિં તે સમરાર્થિનઃ ॥

દૈત્યાશ્ ચ દાનવાશ્ ચૈવ રાક્ષસા બલદર્પિતાઃ
એકીભૂત્વા યયુસ્ તે ઽપિ જયિનો યુદ્ધકાઙ્ક્ષિણઃ ॥

અહિર્ વૃત્રો બલિસ્ ત્વાષ્ટ્રિર્ નમુચિઃ શમ્બરો મયઃ
એતે ચાન્યે ચ બહવો યોદ્ધારો બલદર્પિતાઃ ॥

અગ્નિર્ ઇન્દ્રો ઽથ વરુણસ્ ત્વષ્ટા પૂષા તથાશ્વિનૌ
મરુતો લોકપાલાશ્ ચ નાનાયુદ્ધવિશારદાઃ ॥

તે દાનવાઃ સર્વ એવ યામ્યાં વૈ દિશિ સંગરે
અકુર્વન્ત મહાયત્નં દક્ષિણાર્ણવસંસ્થિતાઃ ॥

ત્રિકૂટઃ પર્વતશ્રેષ્ઠો રાક્ષસાનાં પુરાભવત્
તદ્વનેન યયુઃ સર્વે તૈઃ સાર્ધં દક્ષિણાર્ણવમ્ ॥

સર્વેષાં મેલનં યત્ર પર્વતો મલયસ્ તુ સઃ
મલયસ્યાપિ દેશો ઽસૌ દેવારીણામ્ અભૂત્ તદા ॥

દેવાનાં ગૌતમીતીરે તત્ર સંનિહિતઃ શિવઃ
ઇતિ તેષાં સમાયોગો દેવાનામ્ અભવત્ કિલ ॥

દેવાઃ સ્વરથમ્ આરૂઢાસ્ તત્ર તત્ર સમાગમન્
ગૌતમ્યાઃ સરિદમ્બાયાઃ પુલિને વિમલાશયાઃ ॥

પ્રસન્નાભીષ્ટદા યા સ્યાત્ પિતૄણામ્ અખિલસ્ય તુ
તતો દેવગણાઃ સર્વે સ્તુત્વા દેવં મહેશ્વરમ્
અભયં ચિન્તયામ્ આસુસ્ તે સર્વે ઽથ પરસ્પરમ્ ॥

અત્રાપ્ય્ ઉપાયઃ કો ઽસ્માકં નિર્જિતાનાં પરૈર્ હઠાત્
એકમ્ એવાત્ર નઃ શ્રેયો વિજયો વાથવા મૃતિઃ
સપત્નૈર્ અભિભૂતાનાં જીવિતં ધિઙ્ મનસ્વિનામ્ ॥

એતસ્મિન્ન્ અન્તરે પુત્ર વાગ્ ઉવાચાશરીરિણી ॥

ક્લેશેનાલં સુરગણા ગૌતમીમ્ આશુ ગચ્છત
ભક્ત્યા હરિહરૌ તત્ર સમારાધયતેશ્વરૌ ॥

ગોદાવર્યાસ્ તયોશ્ ચૈવ પ્રસાદાત્ કિં તુ દુષ્કરમ્ ॥

પ્રસન્નાભ્યાં હરીશાભ્યાં દેવા જયમ્ અભીપ્સિતમ્
અવાપ્ય સર્વતો જગ્મુઃ પાલયન્તો દિવૌકસઃ ॥

યત્ર દેવાગમો જાતસ્ તત્ તીર્થં તેન વિશ્રુતમ્
દેવાગમં પ્રશંસન્તિ મુનયસ્ તત્ત્વદર્શિનઃ ॥

તત્રાશીતિસહસ્રાણિ શિવલિઙ્ગાનિ નારદ
દેવાગમઃ પર્વતો ઽસૌ પ્રિય ઇત્ય્ અપિ કથ્યતે
તતઃ પ્રભૃતિ તત્ તીર્થં દેવપ્રિયમ્ અતો વિદુઃ ॥