Brahma Purana · Chapter 157

kiṣkindhātīrtham ākhyātaṃ sarvakāmapradaṃ nṛṇām
sarvapāpapraśamanaṃ yatra saṃnihito bhavaḥ //

tasya svarūpaṃ vakṣyāmi yatnena śṛṇu nārada
purā dāśarathī rāmo rāvaṇaṃ lokarāvaṇam //

kiṣkindhāvāsibhiḥ sārdhaṃ jaghāna raṇamūrdhani
saputraṃ sabalaṃ hatvā sītām ādāya śatruhā //

bhrātrā saumitriṇā sārdhaṃ vānaraiś ca mahābalaiḥ
vibhīṣaṇena balinā devaiḥ pratyāgato nṛpaḥ //

kṛtasvastyayanaḥ śrīmān puṣpakeṇa virājitaḥ
yad āsīd dhanarājasya kāmagenāśugāminā //

ayodhyām agaman sarve gacchan gaṅgām apaśyata
rāmo virāmaḥ śatrūṇāṃ śaraṇyaḥ śaraṇārthinām //

gautamīṃ tu jagatpuṇyāṃ sarvakāmapradāyinīm
manonayanasaṃtāpa nivāraṇaparāyaṇām //

tāṃ dṛṣṭvā nṛpatiḥ śrīmān gaṅgātīram athāviśat
tāṃ dṛṣṭvā prāha nṛpatir harṣagadgadayā girā
harīn sarvān athāmantrya hanumatpramukhān mune //

asyāḥ prabhāvād dharayo yo 'sau mama pitā prabhuḥ
sarvapāpavinirmuktas tato yātas triviṣṭapam //

iyaṃ janitrī sakalasya jantor bhuktipradā muktim athāpi dadyāt
pāpāni hanyād api dāruṇāni kānyānayāsty atra nadī samānā

hatāni śaśvad duritāni caiva asyāḥ prabhāvād arayaḥ sakhāyaḥ
vibhīṣaṇo maitram upaiti nityaṃ sītā ca labdhā hanumāṃś ca bandhuḥ

laṅkā ca bhagnā sagaṇaṃ hi rakṣo hataṃ hi yasyāḥ parisevanena
yāṃ gautamo devavaraṃ prapūjya śivaṃ śaraṇyaṃ sajaṭām avāpa

seyaṃ janitrī sakalepsitānām amaṅgalānām api saṃnihantrī
jagatpavitrīkaraṇaikadakṣā dṛṣṭādya sākṣāt saritāṃ savitrī

etat samākarṇya vaco nṛpasya tatrāplavan harayaḥ sarva eva
pūjāṃ cakrur vidhivat te pṛthak ca puṣpair anekaiḥ sarvalokopahāraiḥ

saṃpūjya śarvaṃ nṛpatir yathāvat stutvā vākyaiḥ sarvabhāvopayuktaiḥ
te vānarā muditāḥ sarva eva nṛtyaṃ ca gītaṃ ca tathaiva cakruḥ

sukhoṣitas tāṃ rajanīṃ mahātmā priyānuyuktaḥ saṃvṛtaḥ premavadbhiḥ
duḥkhaṃ jahau sarvam amitrasaṃbhavaṃ kiṃ nāpyate gautamīsevanena

savismayaḥ paśyati bhṛtyavargaṃ godāvarīṃ stauti ca saṃprahṛṣṭaḥ
saṃmānayan bhṛtyagaṇaṃ samagram avāpa rāmaḥ kamapi pramodam

nādyāpi tṛptās tu bhavāma tīrthe kaṃcic ca kālaṃ nivasāma cātra
vatsyāma cātraiva parāś catasro rātrīr atho yāma vṛtās tv ayodhyām

tasyātha vākyaṃ harayo 'numenire tathaiva rātrīr aparāś catasraḥ
saṃpūjya devaṃ sakaleśvaraṃ taṃ bhrātṛpriyaṃ tīrtham atho jagāma

siddheśvaraṃ nāma jagatprasiddhaṃ yasya prabhāvāt prabalo daśāsyaḥ
evaṃ tu pañcāham athoṣire te svaṃ svaṃ pratiṣṭhāpitaliṅgam arcya

śuśrūṣaṇaṃ tatra karoti vāyoḥ suto 'nugāmī hanumān nṛpasya
gacchan nṛpendro hanumantam āha liṅgāni sarvāṇi visarjayasva

matsthāpitāny uttamamantravidbhis tathetaraiḥ śaṃkarakiṃkaraiś ca
nodvāsya pūjāṃ paraśaṃkareṇa bāhyaṃ samāyojyam aho bhavasya

tiṣṭhanti susthās tadanādareṇa te khaḍgapattrādiṣu saṃbhavanti
ye 'śraddadhānāḥ śivaliṅgapūjāṃ vidhāya kṛtyaṃ na samācaranti

yathocitaṃ te yamakiṃkarair hi pacyanta evākhiladurgatīṣu
rāmājñayā vāyusuto jagāma dorbhyāṃ na cotpāṭayituṃ śaśāka

tataḥ svapucchena grahītukāmaḥ saṃveṣṭya liṅgaṃ tu visṛṣṭakāmaḥ
naivāśakat tan mahad adbhutaṃ syāt kapīśvarāṇāṃ nṛpates tathaiva

kaś cālayel labdhamahānubhāvaṃ maheśaliṅgaṃ puruṣo manasvī
tan niścalaṃ prekṣya mahānubhāvo nṛpapravīraḥ sahasā jagāma

viprān athāmantrya vidhāya pūjāṃ pradakṣiṇīkṛtya ca rāmacandraḥ
śuddhātiśuddhena hṛdākhilais tair liṅgāni sarvāṇi nanāma rāmaḥ

kiṣkindhavāsipravarair aśeṣaiḥ saṃsevitaṃ tīrtham ato babhūva
atrāplavād eva mahānti pāpāny api kṣayaṃ yānti na saṃśayo 'tra

punaś ca gaṅgāṃ praṇanāma bhaktyā prasīda mātar mama gautamīti
jalpan muhur vismitacittavṛttir vilokayan praṇaman gautamīṃ tām

tataḥ prabhṛty etad atīva puṇyaṃ kiṣkindhatīrthaṃ vibudhā vadanti
paṭhet smared vāpi śṛṇoti bhaktyā pāpāpahaṃ kiṃ punaḥ snānadānaiḥ