Brahma Purana · Chapter 156

śaṅkhahradaṃ nāma tīrthaṃ yatra śaṅkhagadādharaḥ
tatra snātvā ca taṃ dṛṣṭvā mucyate bhavabandhanāt //

tatredaṃ vṛttam ākhyāsye bhuktimuktipradāyakam
purā kṛtayugasyādau brahmaṇaḥ sāmagāyinaḥ //

brahmāṇḍāgārasaṃbhūtā rākṣasā bahurūpiṇaḥ
brahmāṇaṃ khādituṃ prāptā balonmattā dhṛtāyudhāḥ //

tadāham abravaṃ viṣṇuṃ rakṣaṇāya jagadgurum
sa viṣṇus tāni rakṣāṃsi hantuṃ cakreṇa codyataḥ //

chittvā cakreṇa rakṣāṃsi śaṅkham āpūrayat tadā
niṣkaṇṭakaṃ talaṃ kṛtvā svargaṃ nirvairam eva ca //

tato harṣaprakarṣeṇa śaṅkham āpūrayad dhariḥ
tato rakṣāṃsi sarvāṇi hy anīnaśur aśeṣataḥ //

yatraitad vṛttam akhilaṃ viṣṇuśaṅkhaprabhāvataḥ
śaṅkhatīrthaṃ tu tat proktaṃ sarvakṣemakaraṃ nṛṇām //

sarvābhīṣṭapradaṃ puṇyaṃ smaraṇān maṅgalapradam
āyurārogyajananaṃ lakṣmīputrapravardhanam //

smaraṇāt paṭhanād vāpi sarvakāmān avāpnuyāt
tīrthānām ayutaṃ tatra sarvapāpanudaṃ mune //

tīrthāny ayutasaṃkhyāni sarvapāpaharāṇi ca
yeṣāṃ prabhāvaṃ jānāti vaktuṃ devo maheśvaraḥ //

pāpakṣayapratinidhir naitebhyo 'sty aparaḥ kvacit //