Brahma Purana · Chapter 155

kapilatīrtham ākhyātaṃ tad evāṅgirasaṃ smṛtam
tad evādityam ākhyātaṃ saiṃhikeyaṃ tad ucyate //

gautamyā dakṣiṇe pāre ādityān munisattama
ayājayann aṅgiraso dakṣiṇāṃ te bhuvaṃ daduḥ //

aṅgirobhyas tadādityās tapase 'ṅgiraso yayuḥ
sā bhūmiḥ saiṃhikī bhūtvā janān sarvān abhakṣayat //

tatrasus te janāḥ sarve aṅgirobhyo nyavedayan
vibhītā jñānato jñātvā bhuvaṃ tāṃ saiṃhikīm iti //

ādityān anugatvātha vācam aṅgiraso 'bruvan
bhuvaṃ gṛhṇantu yā dattā nety ādityās tadābruvan //

nivṛttāṃ dakṣiṇāṃ naiva pratigṛhṇanti sūrayaḥ
svadattāṃ paradattāṃ vā yo hareta vasuṃdharām //

ṣaṣṭir varṣasahasrāṇi viṣṭhāyāṃ jāyate kṛmiḥ
bhūmeḥ svaparadattāyā haraṇān nādhikaṃ kvacit //

pāpam asti mahāraudraṃ na svīkurmaḥ punas tu tām
evaṃ yadā svadattāyā haraṇe kiṃ tadā bhavet //

tathāpi krayarūpeṇa gṛhṇīmo dakṣiṇāṃ bhuvam
tathety ukte tu te devāḥ kapilāṃ śubhalakṣaṇām //

gaṅgāyā dakṣiṇe pāre bhuvaḥ sthāne tu tāṃ daduḥ
bhuktimuktipradaḥ sākṣād viṣṇus tiṣṭhati mūrtimān //

kapilāsaṃgamaṃ tac ca sarvāghaughavināśanam
tatrābhavad dānatoyād āpagā kapilābhidhā //

sasyavatyā api bhuvo dānād godānam uttamam
lokarakṣāṃ cakārāsau kṛtvā vinimayaṃ muniḥ //

yatra tīrthe ca tad vṛttaṃ gotīrthaṃ tad udāhṛtam
puṇyadaṃ tatra tīrthānāṃ śatam uktaṃ manīṣibhiḥ //

tatra snānena dānena bhūmidānaphalaṃ labhet
saṃgatā gaṅgayā tac ca kapilāsaṃgamaṃ viduḥ //