બ્રહ્મ પુરાણ · અધ્યાય 156

શઙ્ખહ્રદં નામ તીર્થં યત્ર શઙ્ખગદાધરઃ
તત્ર સ્નાત્વા ચ તં દૃષ્ટ્વા મુચ્યતે ભવબન્ધનાત્ ॥

તત્રેદં વૃત્તમ્ આખ્યાસ્યે ભુક્તિમુક્તિપ્રદાયકમ્
પુરા કૃતયુગસ્યાદૌ બ્રહ્મણઃ સામગાયિનઃ ॥

બ્રહ્માણ્ડાગારસંભૂતા રાક્ષસા બહુરૂપિણઃ
બ્રહ્માણં ખાદિતું પ્રાપ્તા બલોન્મત્તા ધૃતાયુધાઃ ॥

તદાહમ્ અબ્રવં વિષ્ણું રક્ષણાય જગદ્ગુરુમ્
સ વિષ્ણુસ્ તાનિ રક્ષાંસિ હન્તું ચક્રેણ ચોદ્યતઃ ॥

છિત્ત્વા ચક્રેણ રક્ષાંસિ શઙ્ખમ્ આપૂરયત્ તદા
નિષ્કણ્ટકં તલં કૃત્વા સ્વર્ગં નિર્વૈરમ્ એવ ચ ॥

તતો હર્ષપ્રકર્ષેણ શઙ્ખમ્ આપૂરયદ્ ધરિઃ
તતો રક્ષાંસિ સર્વાણિ હ્ય્ અનીનશુર્ અશેષતઃ ॥

યત્રૈતદ્ વૃત્તમ્ અખિલં વિષ્ણુશઙ્ખપ્રભાવતઃ
શઙ્ખતીર્થં તુ તત્ પ્રોક્તં સર્વક્ષેમકરં નૃણામ્ ॥

સર્વાભીષ્ટપ્રદં પુણ્યં સ્મરણાન્ મઙ્ગલપ્રદમ્
આયુરારોગ્યજનનં લક્ષ્મીપુત્રપ્રવર્ધનમ્ ॥

સ્મરણાત્ પઠનાદ્ વાપિ સર્વકામાન્ અવાપ્નુયાત્
તીર્થાનામ્ અયુતં તત્ર સર્વપાપનુદં મુને ॥

તીર્થાન્ય્ અયુતસંખ્યાનિ સર્વપાપહરાણિ ચ
યેષાં પ્રભાવં જાનાતિ વક્તું દેવો મહેશ્વરઃ ॥

પાપક્ષયપ્રતિનિધિર્ નૈતેભ્યો ઽસ્ત્ય્ અપરઃ ક્વચિત્ ॥