બ્રહ્મ પુરાણ · અધ્યાય 155

કપિલતીર્થમ્ આખ્યાતં તદ્ એવાઙ્ગિરસં સ્મૃતમ્
તદ્ એવાદિત્યમ્ આખ્યાતં સૈંહિકેયં તદ્ ઉચ્યતે ॥

ગૌતમ્યા દક્ષિણે પારે આદિત્યાન્ મુનિસત્તમ
અયાજયન્ન્ અઙ્ગિરસો દક્ષિણાં તે ભુવં દદુઃ ॥

અઙ્ગિરોભ્યસ્ તદાદિત્યાસ્ તપસે ઽઙ્ગિરસો યયુઃ
સા ભૂમિઃ સૈંહિકી ભૂત્વા જનાન્ સર્વાન્ અભક્ષયત્ ॥

તત્રસુસ્ તે જનાઃ સર્વે અઙ્ગિરોભ્યો ન્યવેદયન્
વિભીતા જ્ઞાનતો જ્ઞાત્વા ભુવં તાં સૈંહિકીમ્ ઇતિ ॥

આદિત્યાન્ અનુગત્વાથ વાચમ્ અઙ્ગિરસો ઽબ્રુવન્
ભુવં ગૃહ્ણન્તુ યા દત્તા નેત્ય્ આદિત્યાસ્ તદાબ્રુવન્ ॥

નિવૃત્તાં દક્ષિણાં નૈવ પ્રતિગૃહ્ણન્તિ સૂરયઃ
સ્વદત્તાં પરદત્તાં વા યો હરેત વસુંધરામ્ ॥

ષષ્ટિર્ વર્ષસહસ્રાણિ વિષ્ઠાયાં જાયતે કૃમિઃ
ભૂમેઃ સ્વપરદત્તાયા હરણાન્ નાધિકં ક્વચિત્ ॥

પાપમ્ અસ્તિ મહારૌદ્રં ન સ્વીકુર્મઃ પુનસ્ તુ તામ્
એવં યદા સ્વદત્તાયા હરણે કિં તદા ભવેત્ ॥

તથાપિ ક્રયરૂપેણ ગૃહ્ણીમો દક્ષિણાં ભુવમ્
તથેત્ય્ ઉક્તે તુ તે દેવાઃ કપિલાં શુભલક્ષણામ્ ॥

ગઙ્ગાયા દક્ષિણે પારે ભુવઃ સ્થાને તુ તાં દદુઃ
ભુક્તિમુક્તિપ્રદઃ સાક્ષાદ્ વિષ્ણુસ્ તિષ્ઠતિ મૂર્તિમાન્ ॥

કપિલાસંગમં તચ્ ચ સર્વાઘૌઘવિનાશનમ્
તત્રાભવદ્ દાનતોયાદ્ આપગા કપિલાભિધા ॥

સસ્યવત્યા અપિ ભુવો દાનાદ્ ગોદાનમ્ ઉત્તમમ્
લોકરક્ષાં ચકારાસૌ કૃત્વા વિનિમયં મુનિઃ ॥

યત્ર તીર્થે ચ તદ્ વૃત્તં ગોતીર્થં તદ્ ઉદાહૃતમ્
પુણ્યદં તત્ર તીર્થાનાં શતમ્ ઉક્તં મનીષિભિઃ ॥

તત્ર સ્નાનેન દાનેન ભૂમિદાનફલં લભેત્
સંગતા ગઙ્ગયા તચ્ ચ કપિલાસંગમં વિદુઃ ॥