Brahma Purana · Chapter 153

bhāvatīrtham iti proktaṃ yatra sākṣād bhavaḥ sthitaḥ
aśeṣajagadantastho bhūtātmā saccidākṛtiḥ //

tatremāṃ śṛṇu vakṣyāmi kathāṃ puṇyatamāṃ śubhām
sūryavaṃśakaraḥ śrīmān kṣatriyāṇāṃ dhuraṃdharaḥ //

prācīnabarhir ākhyātaḥ sarvadharmeṣu pāragaḥ
tisraḥ koṭyo 'rdhakoṭiś ca varṣāṇāṃ rājya āsthitaḥ //

tasyedṛśaṃ vrataṃ cāsīd yad ahaṃ yauvanacyutaḥ
bhaveyaṃ priyayā vāpi putrair vā priyavastubhiḥ //

viyujyeyaṃ tato rājyaṃ tyakṣye 'haṃ nātra saṃśayaḥ
vivekināṃ kulīnānām idam evocitaṃ nṛṇām //

sthīyate vijane kvāpi viraktair vibhavakṣaye
tasmin praśāsati mahīṃ na viyogaḥ priyaiḥ kvacit //

nādhivyādhī na durbhikṣaṃ na bandhukalaho nṛṇām
tasmiñ śāsati rājyaṃ tu na ca kaścid viyujyate //

tataḥ putrārtham akarod yajñaṃ rājā mahāmatiḥ
tataḥ prasanno bhagavān varaṃ prādād yathepsitam //

gautamītīrasaṃsthāya rājñe devo maheśvaraḥ
putraṃ dehīti rājā vai bhavaṃ prāha sa bhāryayā //

bhavaḥ prāha nṛpaṃ prītyā paśya netraṃ tṛtīyakam
tataḥ paśyati rājendre bhavasyākṣi tu mānada //

cakṣurdīptyābhavat putro mahimā nāma viśrutaḥ
yenākāri stutiḥ puṇyā mahimna iti viśrutā //

kim alabhyaṃ bhagavati prasanne tripurāntake
yaṃ nityam anuvartante haribrahmādayaḥ surāḥ //

prāptaputraś ca nṛpatis tīrthaśraiṣṭhyam ayācata
mahāpāpamahāroga mahāvyasanināṃ nṛṇām //

nānāvipadgaṇārtānāṃ sarvābhimatalabdhaye
prādāj jyaiṣṭhyaṃ bhavaś cāpi bhāvatīrthaṃ tad ucyate //

tatra snānena dānena sarvān kāmān avāpnuyāt
bhavaprasādād abhavat sutaḥ prācīnabarhiṣaḥ //

mahimā gautamītīre bhāvatīrthaṃ tad ucyate
tatra saptati tīrthāni puṇyāny akhiladāni ca //