બ્રહ્મ પુરાણ · અધ્યાય 153

ભાવતીર્થમ્ ઇતિ પ્રોક્તં યત્ર સાક્ષાદ્ ભવઃ સ્થિતઃ
અશેષજગદન્તસ્થો ભૂતાત્મા સચ્ચિદાકૃતિઃ ॥

તત્રેમાં શૃણુ વક્ષ્યામિ કથાં પુણ્યતમાં શુભામ્
સૂર્યવંશકરઃ શ્રીમાન્ ક્ષત્રિયાણાં ધુરંધરઃ ॥

પ્રાચીનબર્હિર્ આખ્યાતઃ સર્વધર્મેષુ પારગઃ
તિસ્રઃ કોટ્યો ઽર્ધકોટિશ્ ચ વર્ષાણાં રાજ્ય આસ્થિતઃ ॥

તસ્યેદૃશં વ્રતં ચાસીદ્ યદ્ અહં યૌવનચ્યુતઃ
ભવેયં પ્રિયયા વાપિ પુત્રૈર્ વા પ્રિયવસ્તુભિઃ ॥

વિયુજ્યેયં તતો રાજ્યં ત્યક્ષ્યે ઽહં નાત્ર સંશયઃ
વિવેકિનાં કુલીનાનામ્ ઇદમ્ એવોચિતં નૃણામ્ ॥

સ્થીયતે વિજને ક્વાપિ વિરક્તૈર્ વિભવક્ષયે
તસ્મિન્ પ્રશાસતિ મહીં ન વિયોગઃ પ્રિયૈઃ ક્વચિત્ ॥

નાધિવ્યાધી ન દુર્ભિક્ષં ન બન્ધુકલહો નૃણામ્
તસ્મિઞ્ શાસતિ રાજ્યં તુ ન ચ કશ્ચિદ્ વિયુજ્યતે ॥

તતઃ પુત્રાર્થમ્ અકરોદ્ યજ્ઞં રાજા મહામતિઃ
તતઃ પ્રસન્નો ભગવાન્ વરં પ્રાદાદ્ યથેપ્સિતમ્ ॥

ગૌતમીતીરસંસ્થાય રાજ્ઞે દેવો મહેશ્વરઃ
પુત્રં દેહીતિ રાજા વૈ ભવં પ્રાહ સ ભાર્યયા ॥

ભવઃ પ્રાહ નૃપં પ્રીત્યા પશ્ય નેત્રં તૃતીયકમ્
તતઃ પશ્યતિ રાજેન્દ્રે ભવસ્યાક્ષિ તુ માનદ ॥

ચક્ષુર્દીપ્ત્યાભવત્ પુત્રો મહિમા નામ વિશ્રુતઃ
યેનાકારિ સ્તુતિઃ પુણ્યા મહિમ્ન ઇતિ વિશ્રુતા ॥

કિમ્ અલભ્યં ભગવતિ પ્રસન્ને ત્રિપુરાન્તકે
યં નિત્યમ્ અનુવર્તન્તે હરિબ્રહ્માદયઃ સુરાઃ ॥

પ્રાપ્તપુત્રશ્ ચ નૃપતિસ્ તીર્થશ્રૈષ્ઠ્યમ્ અયાચત
મહાપાપમહારોગ મહાવ્યસનિનાં નૃણામ્ ॥

નાનાવિપદ્ગણાર્તાનાં સર્વાભિમતલબ્ધયે
પ્રાદાજ્ જ્યૈષ્ઠ્યં ભવશ્ ચાપિ ભાવતીર્થં તદ્ ઉચ્યતે ॥

તત્ર સ્નાનેન દાનેન સર્વાન્ કામાન્ અવાપ્નુયાત્
ભવપ્રસાદાદ્ અભવત્ સુતઃ પ્રાચીનબર્હિષઃ ॥

મહિમા ગૌતમીતીરે ભાવતીર્થં તદ્ ઉચ્યતે
તત્ર સપ્તતિ તીર્થાનિ પુણ્યાન્ય્ અખિલદાનિ ચ ॥