Brahma Purana · Chapter 149

nārasiṃham iti khyātaṃ gaṅgāyā uttare taṭe
tasyānubhāvaṃ vakṣyāmi sarvarakṣāvidhāyakam //

hiraṇyakaśipuḥ pūrvam abhavad balināṃ varaḥ
tapasā vikrameṇāpi devānām aparājitaḥ //

haribhaktātmajadveṣa kaluṣīkṛtamānasaḥ
āvirbhūya sabhāstambhād viśvātmatvaṃ pradarśayan //

taṃ hatvā narasiṃhas tat sainyam adrāvayat tadā
sarvān hatvā mahādaityān krameṇājau mahāmṛgaḥ //

rasātalasthāñ śatrūṃś ca jitvā svarlokam īyivān
tatra jitvā bhuvaṃ gatvā daityān hatvā nagasthitān //

samudrasthān nadīsaṃsthān grāmasthān vanavāsinaḥ
nānārūpadharān daityān nijaghāna mṛgākṛtiḥ //

ākāśagān vāyusaṃsthāñ jyotirlokam upāgatān
vajrapātādhikanakhaḥ samuddhūtamahāsaṭaḥ //

daityagarbhasrāvigarjī nirjitāśeṣarākṣasaḥ
mahānādair vīkṣitaiś ca pralayānalasaṃnibhaiḥ //

capeṭair aṅgavikṣepair asurān paryacūrṇayat
evaṃ hatvā bahuvidhān gautamīm agamad dhariḥ //

svapadāmbujasaṃbhūtāṃ manonayananandinīm
tatrāmbarya iti khyāto daṇḍakādhipate ripuḥ //

devānāṃ durjayo yoddhā balena mahatāvṛtaḥ
tenābhavan mahāraudraṃ bhīṣaṇaṃ lomaharṣaṇam //

śastrāstravarṣaṇaṃ yuddhaṃ hariṇā daityasūnunā
nijaghāna hariḥ śrīmāṃs taṃ ripuṃ hy uttare taṭe //

gaṅgāyāṃ nārasiṃhaṃ tu tīrthaṃ trailokyaviśrutam
snānadānādikaṃ tatra sarvapāpagrahārdanam //

sarvarakṣākaraṃ nityaṃ jarāmaraṇavāraṇam
yathā surāṇāṃ sarveṣāṃ na kopi hariṇā samaḥ //

tīrthānām apy aśeṣāṇāṃ tathā tat tīrtham uttamam
tatra tīrthe naraḥ snātvā kuryān nṛharipūjanam //

svarge martye tale vāpi tasya kiṃcin na durlabham
ityādy aṣṭau mune tatra mahātīrthāni nārada //

pṛthak pṛthak tīrthakoṭi phalam āhur manīṣiṇaḥ
aśraddhayāpi yannāmni smṛte sarvāghasaṃkṣayaḥ //

bhavet sākṣān nṛsiṃho 'sau sarvadā yatra saṃsthitaḥ
tat tīrthasevāsaṃjātaṃ phalaṃ kair iha varṇyate //

yathā na devo nṛharer adhikaḥ kvāpi vartate
tathā nṛsiṃhatīrthena samaṃ tīrthaṃ na kutracit //