Brahma Purana · Chapter 148

koṭitīrtham iti khyātaṃ gaṅgāyā dakṣiṇe taṭe
yasyānusmaraṇād eva sarvapāpaiḥ pramucyate //

yatra koṭīśvaro devaḥ sarvaṃ koṭiguṇaṃ bhavet
koṭidvayaṃ tatra pūrṇaṃ tīrthānāṃ śubhadāyinām //

tatra vyuṣṭiṃ pravakṣyāmi śṛṇu nārada tanmanāḥ
kaṇvasya tu suto jyeṣṭho bāhlīka iti viśrutaḥ //

kāṇvaś ceti janaiḥ khyāto vedavedāṅgapāragaḥ
iṣṭīḥ pārvāyaṇānīr yāḥ sabhāryo vedapāragaḥ //

kurvann āste sa gautamyās tīrastho lokapūjitaḥ
prātaḥkāle sabhāryo 'sau juhvad agnau samāhitaḥ //

sarvadāste kadācit tu havanāya samudyataḥ
ekāhutiṃ sa hutvā tu samiddhe havyavāhane //

āhutyantaradānāya havir dravyaṃ kare 'grahīt
etasminn antare vahnir upaśānto 'bhavat tadā //

tataś cintāparaḥ kāṇvaḥ kartavyaṃ kiṃ bhaved iti
antar vicārayām āsa viṣādaṃ paramaṃ gataḥ //

āhutyoś ca dvayor madhya upaśānto hutāśanaḥ
agnyantaram upādeyaṃ vaidikaṃ laukikaṃ tathā //

kva hoṣyaṃ syād dvitīyaṃ tu āhutyantaram eva ca
evaṃ mīmāṃsamāne tu daivī vāg abravīt tadā //

agnyantaraṃ naiva te 'tra upādeyaṃ bhaviṣyati
yāni tatra bhaviṣyanti śakalāni samīpataḥ //

ardhadagdheṣu kāṣṭheṣu viprarāja prahūyatām
nety uvāca tadā kāṇvaḥ saiva vāg abravīt punaḥ //

agneḥ putro hiraṇyas tu pitā putraḥ sa eva tu
putre dattaṃ priyāyaiva pituḥ prītyai bhaviṣyati //

pitre deyaṃ sute dadyāt koṭiprītiguṇaṃ bhavet
daivī vāg abravīd evaṃ tataḥ sarve maharṣayaḥ //

niścitya dharmasarvasvaṃ tathā cakrur yathoditam
etaj jñātvā jagaty atra putre dattaṃ pitur bhavet //

apatyādyupakāreṇa pitroḥ prītir yathā bhavet
tathā nānyena kenāpi jagaty etad dhi viśrutam //

suprasiddhaṃ jagaty etat sarvalokeṣu pūjitam
tasmin datte bhavet puṇyaṃ sarvaṃ koṭiguṇaṃ suta //

manoglāninivṛttiś ca jāyate ca mahat sukham
punar apy āha sā vāṇī kāṇve 'smiṃs tīrtha uttame //

abhavat tan mahat tīrthaṃ kāṇva puṇyaprabhāvataḥ
lokatrayāśrayāśeṣa tīrthebhyo 'pi mahāphalam //

snānadānādikaṃ kiṃcid bhaktyā kurvan samāhitaḥ
phalaṃ prāpsyasy aśeṣeṇa sarvaṃ koṭiguṇaṃ mune //

yat kiṃcit kriyate cātra snānadānādikaṃ naraiḥ
sarvaṃ koṭiguṇaṃ vidyāt koṭitīrthaṃ tato viduḥ //

yatraitad vṛttam āgneyaṃ kāṇvaṃ pautraṃ hiraṇyakam
vāṇīsaṃjñaṃ koṭitīrthaṃ koṭitīrthaphalaṃ yataḥ //

koṭitīrthasya māhātmyam atra vaktuṃ na śakyate
vācaspatiprabhṛtibhir athavānyaiḥ surair api //

yatrānuṣṭhīyamānaṃ hi sarvaṃ karma yathā tathā
godāvaryāḥ prasādena sarvaṃ koṭiguṇaṃ bhavet //

koṭitīrthe dvijāgryāya gām ekāṃ yaḥ prayacchati
tasya tīrthasya māhātmyād gokoṭiphalam aśnute //

tasmiṃs tīrthe śucir bhūtvā bhūmidānaṃ karoti yaḥ
śraddhāyuktena manasā syāt tatkoṭiguṇottaram //

sarvatra gautamītīre pitṝṇāṃ dānam uttamam
viśeṣataḥ koṭitīrthe tad anantaphalapradam
atraikanyūnapañcāśat tīrthāni munayo viduḥ //