Brahma Purana · Chapter 150

paiśācaṃ tīrtham ākhyātaṃ gaṅgāyā uttare taṭe
piśācatvāt purā vipro muktim āpa mahāmate //

suyavasyātmajo loke jīgartir iti viśrutaḥ
kuṭumbabhāraduḥkhārto durbhikṣeṇa tu pīḍitaḥ //

madhyamaṃ tu śunaḥśepaṃ putraṃ brahmavidāṃ varam
vikrītavān kṣatriyāya vadhāya bahulair dhanaiḥ //

kiṃ nāmāpadgataḥ pāpaṃ nācaraty api paṇḍitaḥ
śamitṛtve dhanaṃ cāpi jagṛhe bahulaṃ muniḥ //

vidāraṇārthaṃ ca dhanaṃ jagṛhe brāhmaṇādhamaḥ
tato 'pratisamādheya mahāroganipīḍitaḥ //

sa mṛtaḥ kālaparyāye narakeṣv atha pātitaḥ
bhogād ṛte na kṣayo 'sti prāktanānām ihāṃhasām //

kiṃkarair yamavākyena bahuyonyantaraṃ gataḥ
tataḥ piśāco hy abhavad dāruṇo dāruṇākṛtiḥ //

śuṣkakāṣṭheṣv athāraṇye nirjale nirjane tathā
grīṣme grīṣmadavavyāpte kṣipyate yamakiṃkaraiḥ //

kanyāputramahīvāji gavāṃ vikrayakāriṇaḥ
narakān na nivartante yāvad ābhūtasaṃplavam //

svakṛtāghavipākena dāruṇair yamakiṃkaraiḥ
saṃghāte pacyamāno 'sau rurodoccaiḥ kṛtaṃ smaran //

pathi gacchan kadācit sa jīgarter madhyamaḥ sutaḥ
śuśrāva rudato vāṇīṃ piśācasya muhur muhuḥ //

putrakretur brahmahantur jīgartes tu pitus tadā
pāpinaḥ putravikretur brahmahantuḥ pituś ca tām //

śunaḥśepas tadovāca ko bhavān atiduḥkhitaḥ
jīgartir abravīd duḥkhāc chunaḥśepapitā hy aham //

pāpīyasīṃ kriyāṃ kṛtvā yoniṃ prāpto 'smi dāruṇām
narakeṣv atha pakvaś ca punaḥ prāpto 'ntarālakam
ye ye duṣkṛtakarmāṇas teṣāṃ teṣām iyaṃ gatiḥ //

jīgartiputras tam uvāca duḥkhāt so 'haṃ sutas te mama doṣeṇa tāta
vikrītvā māṃ narakān evam āptas tataḥ kariṣye svargataṃ tvām idānīm

evaṃ pratijñāya sa gādhiputra putratvam āpto 'tha munipravīraḥ
gaṅgām abhidhyāya pituś ca lokān anuttamān īhamāno jagāma

aśeṣaduḥkhānaladhūpitānāṃ nimajjatāṃ mohamahāsamudre
śarīriṇāṃ nānyad aho trilokyām ālambanaṃ viṣṇupadīṃ vihāya

evaṃ viniścitya munir mahātmā samuddidhīrṣuḥ pitaraṃ sa durgateḥ
śucis tato gautamīm āśu gatvā tatra snātvā saṃsmarañ chaṃbhuviṣṇū

dadau jalaṃ pretarūpāya pitre piśācarūpāya suduḥkhitāya
taddānamātreṇa tadaiva pūto jīgartir āvāpa vapuḥ supuṇyam

vimānayuktaḥ surasaṃghajuṣṭaṃ viṣṇoḥ padaṃ prāpa sutaprabhāvāt
gaṅgāprabhāvāc ca hareś ca śaṃbhor vidhātur arkāyutatulyatejāḥ

tataḥ prabhṛty etad atiprasiddhaṃ paiśācanāśaṃ ca mahāgadaṃ ca
mahānti pāpāni ca nāśam āśu prayānti yasya smaraṇena puṃsām

tīrthasya cedaṃ gaditaṃ tavādya māhātmyam etat triśatāni yatra
tīrthāny athānyāni bhavanti bhukti muktipradāyīni kim anyad atra

sarvasiddhidam ākhyātam ityādy atra śatatrayam
tīrthānāṃ munijuṣṭānāṃ smaraṇād apy abhīṣṭadam //