Brahma Purana · Chapter 145

mārkaṇḍeyaṃ nāma tīrthaṃ sarvapāpavimocanam
sarvakratuphalaṃ puṇyam aghaughavinivāraṇam //

tasya prabhāvaṃ vakṣyāmi śṛṇu nārada yatnataḥ
mārkaṇḍeyo bharadvājo vasiṣṭho 'triś ca gautamaḥ //

yājñavalkyaś ca jābālir munayo 'nye 'pi nārada
ete śāstrapraṇetāro vedavedāṅgapāragāḥ //

purāṇanyāyamīmāṃsā kathāsu pariniṣṭhitāḥ
mithaḥ samūcur vidvāṃso muktiṃ prati yathāmati //

kecij jñānaṃ praśaṃsanti kecit karma tathobhayam
evaṃ vivadamānās te mām ūcur ubhayaṃ matam //

madīyaṃ tu mataṃ jñātvā yayuś cakragadādharam
tasya cāpi mataṃ jñātvā ṛṣayas te mahaujasaḥ //

punar vivadamānās te śaṃkaraṃ praṣṭum udyatāḥ
gaṅgāyāṃ ca bhavaṃ pūjya tam evārthaṃ śaśaṃsire //

karmaṇas tu pradhānatvam uvāca tripurāntakaḥ
kriyārūpaṃ ca taj jñānaṃ kriyā saiva tad ucyate //

tasmāt sarvāṇi bhūtāni karmaṇā siddhim āpnuyuḥ
karmaiva viśvatovyāpi tadṛte nāsti kiṃcana //

vidyābhyāso yajñakṛtir yogābhyāsaḥ śivārcanam
sarvaṃ karmaiva nākarmī prāṇī kvāpy atra vidyate //

karmaiva kāraṇaṃ tasmād anyad unmattaceṣṭitam
ṛṣīṇāṃ yatra saṃvādo yatra devo maheśvaraḥ //

cakāra nirṇayaṃ sarvaṃ karmaṇāvāpyate nṛbhiḥ
mārkaṇḍaṃ mukhyataḥ kṛtvā tato mārkaṇḍam ucyate //

tīrtham ṛṣigaṇākīrṇaṃ gaṅgāyā uttare taṭe
pitṝṇāṃ pāvanaṃ puṇyaṃ smaraṇād api sarvadā //

tatrāṣṭau navatis tāta tīrthāny āha jaganmayaḥ
vedena cāpi tat proktam ṛṣayo menire ca tat //