Brahma Purana · Chapter 143

siddhatīrtham iti khyātaṃ yatra siddheśvaro haraḥ
tasya prabhāvaṃ vakṣyāmi sarvasiddhikaraṃ nṛṇām //

pulastyavaṃśasaṃbhūto rāvaṇo lokarāvaṇaḥ
diśo vijitya sarvāś ca somalokam ajīgamat //

somena saha yotsyantaṃ daśāsyam aham abravam
mantraṃ dāsye nivartasva somayuddhād daśānana //

ity uktvāṣṭottaraṃ mantraṃ śatanāmabhir anvitam
śivasya rākṣasendrāya prādāṃ nārada śāntaye //

niḥśrīkāṇāṃ vipannānāṃ nānākleśajuṣāṃ nṛṇām
śaraṇaṃ śiva evātra saṃsāre 'nyo na kaścana //

tato nivṛttaḥ sa ha mantriyuktas tat somalokāj jayam āpya rakṣaḥ
sa puṣpakārūḍhagatiḥ sagarvo lokān punaḥ prāpa javād daśāsyaḥ

sa prekṣamāṇo devam antarikṣaṃ bhuvaṃ ca nāgāṃś ca gajāṃś ca viprān
ālokayām āsa nagaṃ mahāntaṃ kailāsam āvāsa umāpater yaḥ

ko vā girāv atra vasen mahātmā giriṃ nayāmy enam athādhi bhūmeḥ
laṅkāgato 'yaṃ girir āśu śobhāṃ laṅkāpi satyaṃ śriyam ātanoti

itthaṃ vaco rākṣasamantriṇau tau niśamya rakṣodhipateś ca bhāvam
na yuktam ity ūcatur iṣṭabuddhyā niśācaras tadvacanaṃ na mene

saṃsthāpya tat puṣpakam āśu rakṣaḥ puplāva kailāsagireś ca mūle
hindolayām āsa giriṃ daśāsyo jñātvā bhavaḥ kṛtyam idaṃ cakāra

jitvā digīśāṃś ca sagarvitasya kailāsam āndolayataḥ surāreḥ
aṅguṣṭhakṛtyaiva rasātalādi lokāṃś ca yātasya daśānanasya

ālūnakāyasya giraṃ niśamya vihasya devyā saha dattam iṣṭam
tasmai prasannaḥ kupito 'pi śaṃbhur ayuktadāteti na saṃśayo 'tra

tato 'yam āvāpya varān suvīro bhavaprasādāt kusumaṃ jagāma
gacchan sa laṅkāṃ bhavapūjanāya gaṅgām agāc chaṃbhujaṭāprasūtām

saṃpūjayitvā vividhaiś ca mantrair gaṅgājalaiḥ śaṃbhum adīnasattvaḥ
asiṃ sa lebhe śaśikhaṇḍabhūṣāt siddhiṃ ca sarvarddhim abhīpsitāṃ ca

maddattamantraṃ śaśirakṣaṇāya sa sādhayām āsa bhavaṃ prapūjya
siddhe tu mantre punar eva laṅkām ayāt sa rakṣodhipatiḥ sa tuṣṭaḥ

tataḥ prabhṛty etad atiprabhāvaṃ tīrthaṃ mahāsiddhidam iṣṭadaṃ ca
samastapāpaughavināśanaṃ ca siddhair aśeṣaiḥ parisevitaṃ ca