Brahma Purana · Chapter 142

devasthānam iti khyātaṃ tīrthaṃ trailokyaviśrutam
tasya prabhāvaṃ vakṣyāmi śṛṇu yatnena nārada //

purā kṛtayugasyādau devadānavasaṃgare
pravṛtte vā siṃhiketi vikhyātā daityasundarī //

tasyāḥ putro mahādaityo rāhur nāma mahābalaḥ
amṛte tu samutpanne saiṃhikeye ca bhedite //

tasya putro mahādaityo meghahāsa iti śrutaḥ
pitaraṃ ghātitaṃ śrutvā tapas tepe 'tiduḥkhitaḥ //

tapasyantaṃ rāhusutaṃ gautamītīram āśritam
devāś ca ṛṣayaḥ sarve tam ūcur atibhītavat //

tapo jahi mahābāho yat te manasi saṃsthitam
sarvaṃ bhavatu nāmedaṃ śivagaṅgāprasādataḥ
śivagaṅgāprasādena kiṃ nāmāsty atra durlabham //

paribhūtaḥ pitā pūjyo yuṣmābhir mama daivatam
tasyāpi mama cātyantaṃ prītiś ca kriyate yadi //

bhavadbhis tapaso 'smāc ca ahaṃ vairān nivartaye
vairaniryātanaṃ kāryaṃ putreṇa pitur ādarāt
prārthayante bhavantaś cet pūrṇās tan me manorathāḥ //

tataḥ suragaṇāḥ sarve rāhuṃ cakrur grahānugam
taṃ cāpi meghahāsaṃ te cakrū rākṣasapuṃgavam //

tato 'bhavad rāhusuto nairṛtādhipatiḥ prabhuḥ
punaś cāha surān daityo mama khyātir yathā bhavet //

tīrthasyāsya prabhāvaś ca dātavya iti me matiḥ
tathety uktvā dadur devāḥ sarvam eva manogatam //

daityeśvarasya devarṣe tannāmnā tīrtham ucyate
devā yato 'bhavan sarve tatra sthāne mahāmate //

devasthānaṃ tu tat tīrthaṃ devānām api durlabham
yatra deveśvaro devo devatīrthaṃ tataḥ smṛtam //

tatrāṣṭādaśa tīrthāni daityapūjyāni nārada
teṣu snānaṃ ca dānaṃ ca mahāpātakanāśanam //