બ્રહ્મ પુરાણ · અધ્યાય 143

સિદ્ધતીર્થમ્ ઇતિ ખ્યાતં યત્ર સિદ્ધેશ્વરો હરઃ
તસ્ય પ્રભાવં વક્ષ્યામિ સર્વસિદ્ધિકરં નૃણામ્ ॥

પુલસ્ત્યવંશસંભૂતો રાવણો લોકરાવણઃ
દિશો વિજિત્ય સર્વાશ્ ચ સોમલોકમ્ અજીગમત્ ॥

સોમેન સહ યોત્સ્યન્તં દશાસ્યમ્ અહમ્ અબ્રવમ્
મન્ત્રં દાસ્યે નિવર્તસ્વ સોમયુદ્ધાદ્ દશાનન ॥

ઇત્ય્ ઉક્ત્વાષ્ટોત્તરં મન્ત્રં શતનામભિર્ અન્વિતમ્
શિવસ્ય રાક્ષસેન્દ્રાય પ્રાદાં નારદ શાન્તયે ॥

નિઃશ્રીકાણાં વિપન્નાનાં નાનાક્લેશજુષાં નૃણામ્
શરણં શિવ એવાત્ર સંસારે ઽન્યો ન કશ્ચન ॥

તતો નિવૃત્તઃ સ હ મન્ત્રિયુક્તસ્ તત્ સોમલોકાજ્ જયમ્ આપ્ય રક્ષઃ
સ પુષ્પકારૂઢગતિઃ સગર્વો લોકાન્ પુનઃ પ્રાપ જવાદ્ દશાસ્યઃ

સ પ્રેક્ષમાણો દેવમ્ અન્તરિક્ષં ભુવં ચ નાગાંશ્ ચ ગજાંશ્ ચ વિપ્રાન્
આલોકયામ્ આસ નગં મહાન્તં કૈલાસમ્ આવાસ ઉમાપતેર્ યઃ

કો વા ગિરાવ્ અત્ર વસેન્ મહાત્મા ગિરિં નયામ્ય્ એનમ્ અથાધિ ભૂમેઃ
લઙ્કાગતો ઽયં ગિરિર્ આશુ શોભાં લઙ્કાપિ સત્યં શ્રિયમ્ આતનોતિ

ઇત્થં વચો રાક્ષસમન્ત્રિણૌ તૌ નિશમ્ય રક્ષોધિપતેશ્ ચ ભાવમ્
ન યુક્તમ્ ઇત્ય્ ઊચતુર્ ઇષ્ટબુદ્ધ્યા નિશાચરસ્ તદ્વચનં ન મેને

સંસ્થાપ્ય તત્ પુષ્પકમ્ આશુ રક્ષઃ પુપ્લાવ કૈલાસગિરેશ્ ચ મૂલે
હિન્દોલયામ્ આસ ગિરિં દશાસ્યો જ્ઞાત્વા ભવઃ કૃત્યમ્ ઇદં ચકાર

જિત્વા દિગીશાંશ્ ચ સગર્વિતસ્ય કૈલાસમ્ આન્દોલયતઃ સુરારેઃ
અઙ્ગુષ્ઠકૃત્યૈવ રસાતલાદિ લોકાંશ્ ચ યાતસ્ય દશાનનસ્ય

આલૂનકાયસ્ય ગિરં નિશમ્ય વિહસ્ય દેવ્યા સહ દત્તમ્ ઇષ્ટમ્
તસ્મૈ પ્રસન્નઃ કુપિતો ઽપિ શંભુર્ અયુક્તદાતેતિ ન સંશયો ઽત્ર

તતો ઽયમ્ આવાપ્ય વરાન્ સુવીરો ભવપ્રસાદાત્ કુસુમં જગામ
ગચ્છન્ સ લઙ્કાં ભવપૂજનાય ગઙ્ગામ્ અગાચ્ છંભુજટાપ્રસૂતામ્

સંપૂજયિત્વા વિવિધૈશ્ ચ મન્ત્રૈર્ ગઙ્ગાજલૈઃ શંભુમ્ અદીનસત્ત્વઃ
અસિં સ લેભે શશિખણ્ડભૂષાત્ સિદ્ધિં ચ સર્વર્દ્ધિમ્ અભીપ્સિતાં ચ

મદ્દત્તમન્ત્રં શશિરક્ષણાય સ સાધયામ્ આસ ભવં પ્રપૂજ્ય
સિદ્ધે તુ મન્ત્રે પુનર્ એવ લઙ્કામ્ અયાત્ સ રક્ષોધિપતિઃ સ તુષ્ટઃ

તતઃ પ્રભૃત્ય્ એતદ્ અતિપ્રભાવં તીર્થં મહાસિદ્ધિદમ્ ઇષ્ટદં ચ
સમસ્તપાપૌઘવિનાશનં ચ સિદ્ધૈર્ અશેષૈઃ પરિસેવિતં ચ