Brahma Purana · Chapter 134

cakratīrtham iti khyātaṃ smaraṇāt pāpanāśanam
tasya prabhāvaṃ vakṣyāmi śṛṇu yatnena nārada //

ṛṣayaḥ sapta vikhyātā vasiṣṭhapramukhā mune
gautamyās tīram āśritya sattrayajñam upāsate //

tatra vighna upakrānte rakṣobhir atibhīṣaṇe
mām abhyetyātha munayo rakṣaḥkṛtyaṃ nyavedayan //

tadāhaṃ pramadārūpaṃ māyayāsṛjya nārada
yasyāś ca darśanād eva nāśaṃ yānty atha rākṣasāḥ //

evam uktvā tu tāṃ prādām ṛṣibhyaḥ pramadāṃ mune
madvākyād ṛṣayo māyām ādāya punar āgaman //

ajaikā yā samākhyātā kṛṣṇalohitarūpiṇī
muktakeśīty abhidhayā sāste 'dyāpi svarūpiṇī //

lokatritayasaṃmoha dāyinī kāmarūpiṇī
tadbalāt svasthamanasaḥ sarve ca munipuṃgavaḥ //

gautamīṃ saritāṃ śreṣṭhāṃ punar yajñāya dīkṣitāḥ
punas tanmakhanāśāya rākṣasāḥ samupāgaman //

yakṣavāṭāntike māyāṃ dṛṣṭvā rākṣasapuṃgavāḥ
tato nṛtyanti gāyanti hasanti ca rudanti ca //

māheśvarī mahāmāyā prabhāveṇātidarpitā
teṣāṃ madhye daityapatiḥ śambaro nāma vīryavān //

māyārūpāṃ tu pramadāṃ bhakṣayām āsa nārada
tad adbhutam atīvāsīt tanmāyābaladarśinām //

makhe vidhvaṃsyamāne tu te viṣṇuṃ śaraṇaṃ yayuḥ
prādād viṣṇuś cakram atho munīnāṃ rakṣaṇāya tu //

cakraṃ tad rākṣasān ājau daityāṃś ca danujāṃs tathā
ciccheda tadbhayād eva mṛtā rākṣasapuṃgavāḥ //

ṛṣibhis tan mahāsattraṃ saṃpūrṇam abhavat tadā
viṣṇoḥ prakṣālitaṃ cakraṃ gaṅgāmbhobhiḥ sudarśanam //

tataḥ prabhṛti tat tīrthaṃ cakratīrtham udāhṛtam
tatra snānena dānena sattrayāgaphalaṃ labhet //

tatra pañca śatāny āsaṃs tīrthānāṃ pāpahāriṇām
teṣu snānaṃ tathā dānaṃ pratyekaṃ muktidāyakam //