બ્રહ્મ પુરાણ · અધ્યાય 134

ચક્રતીર્થમ્ ઇતિ ખ્યાતં સ્મરણાત્ પાપનાશનમ્
તસ્ય પ્રભાવં વક્ષ્યામિ શૃણુ યત્નેન નારદ ॥

ઋષયઃ સપ્ત વિખ્યાતા વસિષ્ઠપ્રમુખા મુને
ગૌતમ્યાસ્ તીરમ્ આશ્રિત્ય સત્ત્રયજ્ઞમ્ ઉપાસતે ॥

તત્ર વિઘ્ન ઉપક્રાન્તે રક્ષોભિર્ અતિભીષણે
મામ્ અભ્યેત્યાથ મુનયો રક્ષઃકૃત્યં ન્યવેદયન્ ॥

તદાહં પ્રમદારૂપં માયયાસૃજ્ય નારદ
યસ્યાશ્ ચ દર્શનાદ્ એવ નાશં યાન્ત્ય્ અથ રાક્ષસાઃ ॥

એવમ્ ઉક્ત્વા તુ તાં પ્રાદામ્ ઋષિભ્યઃ પ્રમદાં મુને
મદ્વાક્યાદ્ ઋષયો માયામ્ આદાય પુનર્ આગમન્ ॥

અજૈકા યા સમાખ્યાતા કૃષ્ણલોહિતરૂપિણી
મુક્તકેશીત્ય્ અભિધયા સાસ્તે ઽદ્યાપિ સ્વરૂપિણી ॥

લોકત્રિતયસંમોહ દાયિની કામરૂપિણી
તદ્બલાત્ સ્વસ્થમનસઃ સર્વે ચ મુનિપુંગવઃ ॥

ગૌતમીં સરિતાં શ્રેષ્ઠાં પુનર્ યજ્ઞાય દીક્ષિતાઃ
પુનસ્ તન્મખનાશાય રાક્ષસાઃ સમુપાગમન્ ॥

યક્ષવાટાન્તિકે માયાં દૃષ્ટ્વા રાક્ષસપુંગવાઃ
તતો નૃત્યન્તિ ગાયન્તિ હસન્તિ ચ રુદન્તિ ચ ॥

માહેશ્વરી મહામાયા પ્રભાવેણાતિદર્પિતા
તેષાં મધ્યે દૈત્યપતિઃ શમ્બરો નામ વીર્યવાન્ ॥

માયારૂપાં તુ પ્રમદાં ભક્ષયામ્ આસ નારદ
તદ્ અદ્ભુતમ્ અતીવાસીત્ તન્માયાબલદર્શિનામ્ ॥

મખે વિધ્વંસ્યમાને તુ તે વિષ્ણું શરણં યયુઃ
પ્રાદાદ્ વિષ્ણુશ્ ચક્રમ્ અથો મુનીનાં રક્ષણાય તુ ॥

ચક્રં તદ્ રાક્ષસાન્ આજૌ દૈત્યાંશ્ ચ દનુજાંસ્ તથા
ચિચ્છેદ તદ્ભયાદ્ એવ મૃતા રાક્ષસપુંગવાઃ ॥

ઋષિભિસ્ તન્ મહાસત્ત્રં સંપૂર્ણમ્ અભવત્ તદા
વિષ્ણોઃ પ્રક્ષાલિતં ચક્રં ગઙ્ગામ્ભોભિઃ સુદર્શનમ્ ॥

તતઃ પ્રભૃતિ તત્ તીર્થં ચક્રતીર્થમ્ ઉદાહૃતમ્
તત્ર સ્નાનેન દાનેન સત્ત્રયાગફલં લભેત્ ॥

તત્ર પઞ્ચ શતાન્ય્ આસંસ્ તીર્થાનાં પાપહારિણામ્
તેષુ સ્નાનં તથા દાનં પ્રત્યેકં મુક્તિદાયકમ્ ॥