Brahma Purana · Chapter 132

yakṣiṇīsaṃgamaṃ nāma tīrthaṃ sarvaphalapradam
tatra snānena dānena sarvān kāmān avāpnuyāt //

yatra yakṣeśvaro devo darśanād bhuktimuktidaḥ
tatra ca snānamātreṇa sattrayāgaphalaṃ labhet //

viśvāvasoḥ svasā nāmnā pippalā guruhāsinī
ṛṣīṇāṃ sattram agamad gautamītīravartinām //

dṛṣṭvā tatra ṛṣīn kṣāmān sā jahāsātigarvitā
yā gatvāśrāvaya vauṣaḍ astu śrauṣaḍ iti sthiram //

visvareṇa bruvatī tāṃ te śepuḥ srāviṇī bhava
tato nady abhavat tatra yakṣiṇīti suviśrutā //

tato viśvāvasuḥ pūjya ṛṣīn devaṃ trilocanam
saṃgamya caiva gautamyā tāṃ viśāpām athākarot //

tataḥ prabhṛti tat tīrthaṃ yakṣiṇīsaṃgamaṃ smṛtam
tatra snānādidānena sarvān kāmān avāpnuyāt //

viśvāvasoḥ prasanno 'bhūd yatra śaṃbhuḥ śivānvitaḥ
śaivaṃ tat paramaṃ tīrthaṃ durgātīrthaṃ ca viśrutam //

sarvapāpaughaharaṇaṃ sarvadurgatināśanam
sarveṣāṃ tīrthamukhyānāṃ tad dhi sāraṃ mahāmune
tīrthaṃ munivaraiḥ khyātaṃ sarvasiddhipradaṃ nṛṇām //